Bombeirus Hahú Fase Estrada Diresaun Tasi-Tolu, Loron 7-11 Estrada Públiku Balun Taka

SAPNewsTL, Dili – Relasiona ho vizita Sua Santidade Papa Francisco iha loron 09-11 Fulan Setembru, Governu liu hosi Sekretaria Estadu Protesaun Sivil hahú orienta Bombeirus fase estrada públiku iha Kapitál Dili.

Iha entrevista, Komandante Unidade Espesial Protesaun Sivil, Fernando da Costa haktuir Bombeirus simu orientasaun husi Primeiru Ministru Kayrala Xanana Gusmão no Sekretaria Estadu Protesaun Sivil Domingos Mariano hodi fase estrada públiku hodi prepara ba vizita Sua Santidade Papa Francisco.

“Parte Bombeiros simu orientasaun husi Primeiru Ministru no Sekretariu Estadu Protesaun Sivil hodi fase estrada, hodi prepara ba vizitasaun Sua Santidade Papa Francisco mai Timor-Leste iha 9-11 Setembru tinan 2024”. Tenik Komandante Unidade Espesial Protesaun Sivil, Fernando da Costa ba SAPNews iha Rotunda Nicolau Lobato, Dili, 02/09/2024

Komandante Unidade Espesial Protesaun Sivil, Fernando da Costa informa parte bombeirus sei fase hotu estrada públiku sira iha kapitál Dili tanba estrada públiku barak nakonu ho rai-rahun.

“Ohin kalan no aban sei kontinua fase estrada diresaun Tasi-Tolu hahú husi rotunda Nicolau Lobato to’o Tasi-Tolu, hafoin sei kontinua halo limpeza no fase estrada públiku iha fatin sira seluk”. Nia informa

Entretantu, Komandu Polísia Nasional Timor-Leste (PNTL) liu husi Departamentu Tránzitu Seguransa Rodoviaria (DTSR) mós sei blokeia mós estrada públiku balun iha kapital Dili.

Tuir Informasaun ne’ebe SAPNews asesu liu hosi Pajina Facebook PNTL, Xefe DTSRN Superintendente Assistente Polísia Luis da Costa informa sei hapara permanente estrada balun ne’ebe Sua Santidade Papa Francisco sei liu durante vizita iha loron 9-11 Setembru.

“Ita nia pontu fokal ne’ebé maka instala iha Forsa Tarefa informa mai Polísia Tránzitu katak dalan hirak ne’ebe maka ita sei blokeia durante loron 07 to’o 11 fulan Setembru maka rute ne’ebe ita nia Santu Papa sei liu, iha momentu ne’ebá ita sei hamate dalan hirak ne’e.”Xefe DTSRN Superintendente Assistente Polísia Luis da Costa informa. SAPNewsTL Screenshoot

Dalan públiku ne’ebe sei hapara maka iha area Nunsiatura (Motael), husi Ministeriu Turizmu, Embaixada Thailandia, Jardim Motael, Kruzamentu Motael, Portu Dili, Postu Colmera no mós iha Hotel Timor nia kotuk, dalan hirak neé iha loron 07 PNTL sei blokeia total.

Xefe DTSRN Superintendente Assistente Polísia Luis da Costa hatutan, iha loron 9 fulan ne’e sei hamate mós dalan protokolu hahú husi area Aeroportu to’o Nunciatura hanesan husi Rotunda Nicolau Lobato, CFP, Ponte CPLP, Cruzamentu Timor Plaza, Eskuadra Dom Aleixo, Kuartél Jeneral F-FDTL, Kampu Alor, Postu Flamboyan (Uma Lafatik).

“Nune’e husu ba komunidade sira dalan hirak ne’ebé ohin mensiona dala ruma labele hetan asesu ba sirkulasaun estrada públiku, dalan balun sei blokeia iha aktividade Amo Papa nian husi Nunciatura ba Palasiu Prezidente liu husi Portu Dili, dalan sira ne’e ita hamate wainhira ita nia Sua Santidade Amo Papa liu”, salienta Superintendente Assistente Polísia.

Xefe DTRSN sublinha, iha loron 10 fulan Setembru, ekipa seguransa sei hamate dalan husi Nunsiatura ba Irmã Alma iha Pantai Kelapa hahú husi Ministeriu Turizmu, Kampu Alor, MNEC, Embaixada Amerika, Pertamina Pantai Kelapa,no IOB.

Nia dehan, husi fatin Irmã Alma atu ba fali Igreja Catedral, Forsa konjunta sei blokeia dalan sira hanesan Catedral, Cruzamentu EDTL, Edifisiu BNCTL Obrigadu Barak, Ministeriu Edukasaun no mós iha entrokamentu Tuana-laran nian tanba Amo Papa nia rute husi Irmã Alma ba Catedral

“Tanba ne’e, dalan sira hanesan husi Timor Plaza nia kotuk no oin, Merkadu Comoro, Eskuadra Dom Aleixo, Kuartél Jeneral F-FDTL, Kampu Alor, Aitarak Laran, Rotunda Tugu Pramuka, mai los fali Colmera, sa’e ba edifisiu EDTL maka sa’e ba Catedral, dalan sira ne’e ita sei taka”.

“Iha loron 10 fulan Setembru husi Nunciatura ba Tasi-tolu, dalan ne’ebe ita blokeia maka dalan hahú husi Rotunda Tugu Pramuka sa’e mai los to’o Tasi-tolu, nune’e mós hafoin misa husi Tasi-tolu mai Nunciatura nafatin liu husi dalan protokolu sira ohin hau temi”, subliña Xefe DTSRN.

Iha loron 11 fulan Setembru, viagem husi Nunciatura ba iha CCD, entaun fatin sira ne’ebe sei blokeia maka hanesan Championes, Caicoli RBC Rumbia, Cruzamentu Balide, Cruzamentu Kintal Boót, entrakamnetu eis edifisiu Suku Santa Cruz, Kintal Kiík no mós entrakamentu Gedung Kebudayaan Indonesia.

“Dalan husi Nunciatura ba CCD maka liu husi Nunciatura, Portu Dili, Palasiu Governu, BCTL, Hidayat, Rotunda Merkadu Lama, hafoin tama iha CCD. Enkuantu, fila fali husi CCD ba Nunciatura husi Championes, Caicoli, Rotunda Ministeriu Justisa, Catedral, Edifisiu Colmera, Postu Tránzitu Kolmera, Portu Dili ba Nunciatura.

Entretantu, husi Nunsiatura ba Aeroportu maka sei taka husi Portu Dili, Postu Tránzitu Kolmera, ETO, Mandarin, Aitarak Laran, Kampu Alor, Kuartél Jeneral F-FDTL, Eskuadra Dom Aleixo, Merkadu Comoro, Timor Plaza, Ponte CPLP, CFP toó Rotunda Nicolau Lobato.

Enkuantu, Ohin Sua Santidade Papa Francisca sai ona husi Vatikanu-Itália, aban sei to’o iha Indonésia husi loron 03-06, hafoin kontinua ba Papua Nova Guine hahu hosi loron 06-09, kontinua mai Timor-Leste iha loron 09-11, no sei konklui nia vizita iha azia pasífiku iha 11-13 iha Singapura hafoin fila fali ba Vatikanu.

Jornalista : Marciana Da Conceição