BTL Falta Atensaun ! Laiha Bee-Moos, Estudante Kontribui $ 3.00 Ba Eskola
Imajem : Professora Pre-escolar Pederos Ana Paula ko’alia Jornalista SAPNewsTL iha nia kna’ar fatin Pederos Likisa, Sesta, (28/03/2025)
SAPNewsTL, Likisa : Laiha atensaun husi Bee Timor-Leste Empreza Publika (BTL.EP) tinan barak ona estudante Pre-eskolar Pederos
Munisiupiu Likisa kontribui osan tres dolar hodi sosa bee uza ba nesesidade eskola nian.
Profésora Pre-escolar Pederos Ana Paula da Silva hateten, problema falta bee moos sai kestaun ba estudante no profésores sira tanba hahu tinan 2021-2025, BTL laiha atensaun, nune’e profesores ho inan aman sira hala’o enkontru hodi deside kada loron inan aman sira lori bee ho voluntariu ba eskola hodi uza ba iha haris fatin bainhira nesesidade obriga.
“Kada fulan estudante sira selu tres dolar entaun ami tenki ko’alia ho inan aman, nune’e osan ne’ebe sira fo ami sosa bee moos, ami sosa tanke ida bot atu tau bee, lae inan aman sira lakohi tanba sira mós haree ba nia fatin ne’ebe tau bee ne’e”. Profésora Pre-escolar Pederos Ana Paula informa SAPNewsTL iha nia kna’ar fatin Pederos Likisa, Sesta, (28/03/2025)
Ana Paula afirma, iha tinan 2020 ba kotuk bainhira kompañia SAS responsabiliza ba kanalizasaun bee moos iha munisípiu Likisa, kada semana responsabel SAS sira oferese bee dala tolu iha semana ida nia laran ba Pre-eskolar Pederos hodi uza ba nesesidade eskola nian, hafoin governu transforma SAS ba BTL.EP eskola refere enfreta kedas bee moos.
“Iha tinan liu ba ne’e bee iha momentu ne’e SAS maka sei kaer ne’e, bee mai estabil agora muda fali parte BTL, ne’e maka konfuzaun uitoan, komesa kedas iha ne’e mak to’o agora ami bee laiha total, SAS mak sei kaer kada semana ida bee mai dala tolu, maibe troka fali BTL ne’e ami nunka hetan bee ida ne’e mak prolema bo’ot ba ami,” Nia Subliña.
Profésora Ana Paula fundamenta, kada loron obrigatoriu inan aman sira ho voluntariu lori bee moos litru lima (5) husi uma ba eskola, nune’e estudante no profésores sira utiliza ba nesesidade eskola nian hanesan sentina.
“Dala ruma uza ba haris fatin nian, ami haruka inan aman sira, kada loron ida lori bee mai masa litru lima ida atu tau ba haris fatin hodi estudante sira uza, bainhira inan aman sira lori bee loron mai sira mos dehan bee laiha entaun ami buka meus seluk maka tenki hola bee no tempu udan ami aproveita ense udan been atu estudante no ami uza ba iha haris fatin” Dehan nia.
Dirijente Pre-eskolar Pederos Ana Paula akresenta nia parte husu ba governu atu bele orienta BTL.EP nia ekipa munisípal sira tun iha komunidade nia le’et inklui eskola sira hodi observa no halo fiskalizasaun ba programa kanalizasaun bee mós ne’ebe laiha vantajen ba konsumidor sira.
“Ami husu ba governu sira liu-liu BTL.EP ne’ebe haree kona ba bee, se bele kada fulan husu ba nasional tun ba baze atu observa kona ba bee, ami-nia eskola refere prezisa tebes bee iha ne’eba, ami susar tebes, ami nia haris fatin atu uza deit bee mos laiha, ami iha merenda escolar mos iha maibé bee-moos laiha, ami sosa bee-moos para bele tein merenda escolar ba estudante sira kada loron” Tenik nia.
Nia salienta dalaruma Ministériu Edukasaun (ME) liuhosi ekipa iha munisípiu hala’o pasa revista ba materias no hahan sira ne’ebe estudante sira konsumu kada loron, nune’e bainhira material ne’ebe profesóres no estudante sira utiliza laiha higene diak ekipa ME fo atensaun ba profesóres sira.
“Ami husu ba governu tenki haree ba ami nia problema bee, tanba bee ne’e importante tebes, bee maka fo moris ba ita, ami prezisa bee tanba edukasaun sira husi nasional, munisipiu sempre mai haree bebeik kuando haree sasan sira ne’ebe estudante sira uza maka foer, sira fo sansaun ba ami no sira dehan tanba sa sasan sira ne’e foer, ami hatan ami bele hamos no fase maibe ami nia problema mak bee”.
Ana Paula rekorda katak falta bee moos sai kestaun ba estudante no profésores sira maibé la hamate vontade sira nian hodi matein funsionamentu iha Pre-eskolar Pederos lao normal hanesan baibain.
“Maske bee laiha maibe estudante sira nia aula la’o nafatin tanba governu haree ami laiha bee entaun tau osan ba iha merenda escolar nian, nune’e sosa bee para atende estudante sira nia merenda lorloron. Kona sintina no haris fatin responsabilidade ba ami profesora sira”.Nia hakotu.
Imajem : ASEMUL & Autoridade Lokal Aldeia Kamalelara hala’o komunikadu imprensa iha Likisa Vila
Iha sorin seluk, Komunidade Leopa Bernadete Palmira do Santos sente triste tebes tanba la asesu bee-moos no dala barak gasta osan hodi sosa maske susar atu hetan osan iha area rural.
“Ami sente triste tebes tanba la hetan bee-moos, kada vez semana ida ami hola bee dala ruma ami uja loron tolu ou haat deit, ami hola hela deit bee ne’e lori saida selu oan sira-nia escola, ami fakar osan ba bee diak liu ami selu ami nia oan sira nia eskola ba sira nia futuru abanbairua”.Nia dehan
Leopa mos husu ba representante povu iha uma fukun Parlamentu Nasional hodi bele defende povu nia lian, nune’e BTL bele tau atensaun ho sériu ba komunidade sira.
“Ami husu ba boot sira iha liquisa ne’ebe tur iha uma fukun Parlamentu Nasional halo favor tau matan ba bee ne’e, ami husu ida ne’e deit, tanba avizu dehan kuidadu saúde maibe bee la iha ne’e, ami atu kuidadu oan sira-nia saúde husi ne’ebe”.
“Ami komunidade ezije ba bo’ot sira para bele resolve tanba uluk Servisu Água e Saneamento (SAS) ne’e sei diak, dala ruma bee la iha sira esforsu no ami bele hetan netik bee agora ida ne’e la iha liu. Durante ne’e ami sosa bee kada litru ida folin $ 3, maibe tenki masa tolu entuan ami sosa $9 maibe kuandu ema barak ita uja la to’o semana hotu ona entaun ita tenki sosa hela deit”.
Grasiano Pires do Santos konsidera BTL ne’e la funsiona, fo sala ba BTL nasional ne’ebe halo rektutamentu, tanba ema na’in 20 ne’ebe uluk serbisu iha SAS ho osan ne’ebe mak $80 maibe bee ami asesu ho diak.
“BTL ne’e la funsiona, ami fo sala BTL, E.P, uluk SAS ema simu fulan ida $ 80 maibe ami asesu bee ho efetivu”.
“Maibe depois entrega ba BTL tanba maioria funsionáriu foun deit no sira nia experiénsia mós menus entaun sira la hatene kanalizasaun kanu bee nian, tanba ida ne’e mak rekomenda ba governu liuliu ba PAM-Likisa hodi fo atensaun tanba dalaruma relatóriu diak deit maibe realidade komunidade nia terus iha Likisa ne’e sira la hatene”. Nia hakotu
Ligadu ho preokupasaun ne’e, SAPNews tenta atu halo konfirmasaun ho parte Presidente Autoridade Munisípiu Likisa no BTL Munisípiu maibe la konsege tanba laiha servisu fatin.
Antes ne’e, SAP News TL mós halo ona konfirmasaun ho parte BTL, E.P nasional hodi aktualiza problema bee-moos maibe to’o agora seidauk fo resposta ba karta refere.
Jornalista : Ermelinda Soares