Imajem : Autor Ne’ebé CAC asegura iha Edifisiu MAPPF Comoro, 17/09/2024. Foto : Média CAC
SAPNewsTL, Dili – Relasiona ho informasaun ne’ebé viral iha sosial média kona ba atu halo ajudikasaun direta ba projetu balun iha Ministériu Agrikultura Peskas, Pekuária no Floresta (MAPPF), CAC bolu obrigatóriu autor na’in rua (2) hodi presta deklarasaun iha CAC.
Tuir informasaun ne’ebé SAP News TL asesu liu hodi Pajina Facebook CAC nian haktuir katak Ekipa Servisu Informasaun Sekreta Comissão Anti Corrupcão (CAC) lidera husi Xefe Unidade Informasaun no Seguransa (UIS) Euclides Madeira iha Tersa-feira (17/9) ne’e bolu obrigatoriu ofisiál ezekutivu na’in rua husi Ministerio Agrikultura no Peskas (MAP) iha edifisiu MAP Comoro Dili hodi mai presta deklarasaun no tuir prosesu identifikasaun iha Edifisiu Sentral CAC Farol Dili.
Ofisial Senior MAP na’in rua ne’e assume kargu nu’udar Diretor Geral (DG) no Diretor Nasional Aprovizionamentu (DNA) iha MAP.
“Objetivu husi asaun polisiál ne’e atu Ekipa Investigasaun kriminal Komisaun nian halo identifikasaun no rekolla informasaun preliminária ba sira durante oras balun nian laran tuir kodigu prosesu penál iha edifisiu sentral CAC Farol”. Sita Xefe Informasaun Seguransa Euclides Vidal Madeira iha Pajina Facebook CAC, SAPNewsTL screenshoot iha Dili, 18/09/2024
Xefe Informasaun Seguransa Euclides Vidal Madeira informa prosesu identifikasaun refere sei la’o durante oras sanulu resin-rua (12 Horas) hafoin sei kontinua ba prosesu tuir mai, entre hetan mandadu detensaun no libertasaun.
“Prosesu identifikasaun sei hala’o durante oras 12 nian laran, Se durante prosesu identifikasaun mak iha evidensias no provas sufisiente mak ekipa sei husu ba prokurador hodi halo mandadu detensaun. Se faktus no evidensias la to’o tuir lei kodigo prosesu penal mak investigador hakarak ka lakohi tenke liberta hodi tuir fali prosesu normál”. Informa Nia
Iha prosesu asaun polisiál ne’e, jerente senior na’in rua ho ninian staff sira iha MAP kolabora di’ak tebes ho ekipa servisu polisial CAC nian hodi mai presta sira nia deklarasaun iha edifisiu CAC Faról.
Aksaun polisial nian hodi bolu obrigatoriu jerente senior MAP nian ne’e bazeia ba lei Kode Prosesu Penal artigu 53. Tuir artigu 53 lei ida ne’e nian estipula:
1). Polisia (polisia espesializada CAC) nian ajente sira bele husu identifikasaun ba ema ne’ebé sira (CAC) suspeita katak prepara-an dadaun atu halo, halo tiha ona krimi ruma ka hola parte ho ema seluk iha krime ruma.
2). Kuandu ema ne’e labele ka lakohi fo nia identifikasaun. Polisi sei lori ema ne’e ba postu polisial ne’ebé besik, ho urbanidade, atu fo meiu nesesariu no disponivel ba nian atu identifika-an.
3). Presija karik, ema suspeitu ne’e tenke sujeita-an ba prova ne’ebé ofende nian dignidade umana, atu hatene lolos nia identifikasaun, hanesan prova diak-tiloskopika no fotografia no rekonhesimentu fizika.
4). Molok liu oras sanulu resin rua, maske dilijensia sira ne’e la iha rezultadu, tenke fo fali liberdade total ba ema ne’e, kuandu la iha motivu atu detensaun ba nia.
5). Aktu sira ne’ebé hala’o tuir númeru sira iha kotuk tenke hakerek hotu iha autu atu entrega kedas ba Ministeriu Públiku.
Jerente Senior MAP nian nain rua ne’ebé koopera diak tebes ho ekipa Investigasaun Kriminal CAC nian hodi mai tuir prosesu identifikasaun tuir lei, Komisaun mos kontinua asegura aplika persumpsaun inosensia (Persumption of inosence) ba jerente senior nain rua iha lei nia oin.
Jornalista : Marciana Da Conceição