CGT-TL Fasilita Formasaun Politika Salva Guarda Labarik Ba Membru Forum Tau Matan
Imajem : Formandu sira hosi Forum Tau Matan
SAPNewsTL, Dili : Core Group Tranparancy Timor-Leste (sigla CGT-TL), realiza formasaun ba membru sosiedade sivil hodi hasa’e kapasidade kona-ba protesaun ba politika salva guarda ba labarik sira iha Timor-Leste.
Diretora Forum Tau Matan, Eduarda Martins Goncalves, hateten Forum Tau Matan parseria hamutuk Organizasaun Non Governamentál no OXFAM hodi realiza reflesaun no treinamentu kona-ba asuntu protesaun labarik nian hodi hasa’e konhesimentu sosiedade sivil no inan aman nian.
“Forum Tau Matan ( FTM), seidauk halo peskiza direitamente kona-ba asuntu protesaun labarik nian maibe parseria hamutuk ho protesaun OXFAM Timor-Leste sempre hamutuk hodi halo refleksaun ka treinamentu kona-ba asuntu Child Protections, ba parseriu sira ne’ebe iha Timor inklui ho direitu fundamental sira no tipu abuzu ba labarik sira”. Dehan Diretora Forum Tau Matan, Eduarda Martins Goncalves, ba Jornalista sira iha edifísiu HAK farol, Quinta-feira,12/02/2026.
Diretor ne’e haktuir lei konstituisaun RDTL iha artigu 18 kona-ba protesaun ba labarik, maibe inan aman balun seidauk iha konsensia, nune’e husik labarik sira nafatin faan iha dalan ninin.
“Labarik sira ne’ebe mak nafatin fa’an iha dalan ninin ne’e razaun primeiru maka konsensia, ita bele dehan atu konesimentu husi inan aman ka parte sira ne’ebe mak fo servisu ba labarik ne’e seidauk iha konesimentu klean kona-ba asuntu protesaun labarik”.
Iha fatin hanesan, Koordenador CGT-TL Jemicarter Moniz dos Reis informa atividade formasaun politika salva ba labarik ne’e hodi hasa’e kunhesimentu sosiedade sivil no estudante sira ba protesaun salva guarda labarik nian.
“Ita ko’alia kona-ba direitu labarik nian, iha konstituisaun ko’alia ona katak labarik presiza hetan protesaun husi familia, estadu no mos inan aman sira, entaun importante tebes husi treinamentu ka formasaun ida ne’e atu bele fahe informasaun sira kona-ba seguransa labarik sira ninian. Liu husi formasaun ne’e bele hasa’e ona ita-nia membru sira-nia konhesimentu no atu sira iha kapasidade oinsa bele uza manual politika salva ba labarik”.
Enkuantu, formasaun ne’e sei aprende kona-ba definisaun labarik, politika salva poder labarik, no risku sira ne’ebe labarik sira hasoru iha sosiedade Timor-Leste.
