Departamentu GeoPet-UNTL, Selebra 20 Maiu Ho Semináriu Sientífiku

SAPNewsTL, Dili : Universidade Nasionál Timor-Lorosa’e (UNTL) nia Departamentu Geolojia no Petróleu (GeoPet) realiza semináriu no reflesaun hodi selebra restaurasaun independénsia ba dala 22.

Diretor Departamentu GeoPet Apolinário Eugébio Alves konsidera loron 20 Maiu ne’e krusial ba jerasaun foun sira hodi konsiente katak ukun rasik an ne’e lori sofrementu no dedikasaun boot, tan ne’e joven sira tenki hakaas an hodi fo onra ba sira luta no kontinua hakat ba oin ho esperansa.

“Ha’u mak deside ita halo semináriu no festa amizade iha 20 Maiu, ita halo reflesaun ida katak ukun an ne’e sosa ho sofrementu no mate barak, atu dehan ba jerasaun foun sira katak ita presiza fo onra ba sira nia luta libertasaun nasionál”. Tenik Diretor Departamentu Geolojia no Petróleu Apolinário Eugébio Alves liu husi diskurus iha auditorium hera, 20/05/2024

Orador Estáqui Amaral haktuir dezempenhu geologu iha dezenvolvimentu induztrializasaun importante maibe presiza investe makaas iha edukasaun tanba rekursu humanu mak determinante ba dezenvolvimentu nasionál.

“Dezempenhu geólogu importante ba dezenvolvimentu industrializasaun, maibe ita presiza investe makaas iha edukasaun hodi prepara rekursu humanu iha area geolojia no petróleu”. Dehan Estáqui Amaral.

Iha fatin hanesan, Presidente Assosiasaun Estudantil FEST-UNTL Sergio Alves da Costa konsidera loron 20 Maiu ne’e sai reflesaun ba estudante sira atu hateke ba dook liu tan katak foinsa’e tenki aprende no aprende para hatene, hatudu, servi, kontribui no tane aas rai doben Timor-Leste.

“Ohin ita selebra 20 Maiu, ispiritu loron restaurasaun ne’e fanun ita atu hateke ba dook liu tan katak ita tenki aprende no aprende para hatene, hatudu, servi, kontribui no tane aas ita nia rai doben Timor-Leste”.

Sergio da Costa husu estudante sira hotu tenki hakaas an hodi hola parte iha programa extrakurikuláriu sira liliu semináriu sira, workshop no formasaun sira tanba oportunidade sira ne’e mak sei halo ema ida sai forte, matenek no susesu.

“Ita tenki esforsu an hodi hola parte iha programa extrakurikulariu sira, liliu semináriu, formasaun no workshop sira, ita mos tenki tahan an hasoru difikuldade sira no limitasaun sira tanba situasaun hirak mak sei halo ita sai forte, metin, matenek, kompetitivu, progresu no susesu iha futuru, ne’e tenki sai ita nia komprimisiu”. Sergio Alves da Costa

Enkuantu, iha oportunidade ne’e xefe nukleu sensante mos entrega mandatu ba xefe nukleu Departamentu GeoPet ba tinan 2024-2025.

Partisipa iha semináriu, reflesaun no festa amizade ne’e mai husi estudante Departamentu GeoPet, alumni sira, representante estudante departamentu sira inklui konvidadu sira

 

Jornalista : Dircia Baptista Belo