Deporta Arnie Teves Ba Filipina ! Oan-Sira Tanis & Laran Susar
Imajem : Arnolfo Arnei Teves Jr nia oan sira iha Aeroporto Internacional Nicolau Lobato, 29/05/2025
SAPNewsTL, Dili : Ohin, Governu Timor-Leste deporta Arnolfo Teves Jr ba Filipina tanba konsidera sidadaun filipinu Arnolfo Teves Jr, deskonfia komete krime grave oioin no hetan akuzasaun formál hosi autoridades judisiais Repúblika Filipinas nian
Daniel da Silva – SAP News TL
Ministériu Interior liu hosi Servisu Migrasaun no Servisu Nasional Inteligência (SNI) halo kapturasaun ba Arnolfo Teves Jr iha loron 27 Maiu 2025.
Hafoin halo detensaun durante loron ida kalan rua, Governu Timor-Leste entrega ba Segurança Filipina iha Aeroportu Internacional Nicolau Lobato Comoro hodi deporta ba Filipina ho Filipine Air 142.
Wainhira segurança lori Arnolfo Teves ba Aviaun, Nia oan feto na’in rua no oan mane ida hamonu matan-ween, tanis no laran-susar tanba lori fila ona nia aman ba Filipina.
Antes ne’e, Prezidénsia Konsellu Ministru liu hosi karta komunikadu imprensa haktuir Arnolfo Teves Jr. nia estadia ne’ebé naruk iha Timor-Leste, liu tinan rua, bele hamosu problemas balun iha relasoins bilaterais entre Estadu rua ne’e no hatudu presedente ida ne’ebé sériu ho implikasaun potensiál ba seguransa interna.
“Persesaun katak Timor-Leste bele haree hanesan refújiu ida ba indivíduu sira ne’ebé halai hosi justisa internasionál fó risku ba integridade hosi ita-nia fronteiras no esforsu hamutuk hodi kombate krime transnasionál”.Sita Presidente Konsellu Ministru Ágio Pereira liu hosi karta komunikadu imprensa iha Dili, 28/05/2025, hafoin halo kapturasaun no detensaun ba sidadaun Filipinu Arnolfo Teves Jr.
Timor-Leste nia adezaun plena ba ASEAN, ne’ebé marka ona ba fulan-outubru tinan ida-ne’e, reforsa liután responsabilidade Estadu Timor-Leste nian hodi koopera ativamente ho parseiru rejionál sira iha defeza justisa, legalidade no estabilidade iha rejiaun ne’e.
Iha ámbitu ida-ne’e, Governu informa katak sidadaun Arnolfo Teves Jr. sei deporta hosi Timor-Leste ho desizaun administrativa hosi Ministériu Interiór, tanba nia iha rai-laran lahó vistu válidu, lahó autorizasaun legál atu hela no ho ninia pasaporte ne’ebé Governu Filipinu kansela.
“Desizaun ho efeitu imediatu, bazeia ba lejizlasaun nasionál kona-ba migrasaun no azilu no bazeia ba risku sira ne’ebé sidadaun nia estadia hamosu ba orden públika no seguransa nasionál”.
Importante mós atu nota katak sidadaun ne’ebé iha kestaun hasoru akuzasaun kriminál oioin iha Filipinas, inklui akuzasaun omisídiu hamutuk 13, tentativa omisídiu 13 no omisídiu frustradu 4, relasiona ho krime sira ne’ebé komete entre tinan 2019 no 2023, inklui asasinatu ba Governadór Negros Orientál, Roel Degamo, iha tempu ne’ebá. Nune’e konsidera faktu sira-ne’e no tuir Lei Migrasaun no Azilu, nia mós hetan bandu atu tama iha territóriu nasionál durante períodu tinan 10 nia laran.
Governu reafirma nia kompromisu ba prinsípius Estadu Direitu nian hodi respeita norma internasionál sira kona-ba kooperasaun entre Estadus, no salvaguarda seguransa no estabilidade la’ós de’it ba territóriu nasionál, maibé mós ba rejiaun Sudeste Aziátiku, hodi halo esforsu hamutuk ho Estadu-membru sira ASEAN nian.
Sidadaun Filipinu Arnolfo Teves Jr hetan kapturasaun hosi Polísia Imigrasaun iha loron tersa-feira kalan haleu tuku ualu iha Dili, 27 Maiu 2025.
Durante detensaun, Arnolfo Teves Jr husu Primeiru Ministru Kay Rala Xanana Gusmão hodi ajuda nia no hakarak mantein hela iha Timor-Leste.
“Bom dia Primeiru Ministru, ami hetan detensaun ilegal, ami husu karik bele ajuda para ami fila ba uma ona”. Hateten Arnolfo Teves Jr iha Kantor Polísia Imigrasaun, 28/05/2025
Governu Timor-Leste deporta tanba konsidera nia halai hosi justiça, maske antes ne’e Teves Jr deklara nia parte hetan akuzasaun ne’ebé lalos, nune’e nia deside halai mai Timor-Leste tanba TL nasaun ne’ebé respeita direitu humanos no bele assegura ninia vida.