Deskonfia Familiarismu Iha Rekrutamentu PNTL ! Deolando Husu MI “Anula Desizaun”, PDHJ Sei “Averigua”

Imajem : Komunikadu Imprensa hosi kandidatu Membru PNTL iha Farol, 05/02/2026

SAPNewsTL, Dili : Relasiona ho rezultadu rekrutamentu Polisia Nasional Timor-Leste (PNTL) ba vaga 400 ne’ebe fo sai foin lailais ne’e, kadetes balun satisfas no konsidera desizaun la justu tanba tendénsia ba familiasimu no grupuismu.

Iha loron 03 fulan Februari 2026, komisaun rekrutamentu PNTL liu husi Porta Voz Antonio da Luz fo sai rezultadu ho total kandidatu rihun sanulu resin rua atus ualu hitu nulu resin haat (12.874). Entre sira kandidatu rihun sanulu atus lima sia nulu resin hitu (10.597) mak aprovadu, no kandidatu rihun rua atus rua hitu nulu resin hitu (2.277) mak la aprovadu.

Portavos Deolando Yano Mendonça konsidera rezultadu rekrutamentu PNTL la justu no diskriminativu tanba konsidera iha alegasaun uza sistema familiarizmu iha prosesu teste no avaliasaun, nune’e husu Ministeriu Interior no PNTL imediatamente atu anula dejisaun.

“Ohin ami realiza konferénsia imprensa hasoru Governu liu husi Ministeriu interior no komandu PNTL ne’ebé halo rekrutamentu ba kadetes foun iha periodu tinan 2025 nian. Tuir ami nia observasaun lista sira ne’ebe ho numeru kiik maioria husi Komandante Polisia nia oan no Komandante Polisia sira familia nia oan”. Dehan Portavos Deolando Yano Mendonça ba Jornalista sira iha Salaun HAK,Kinta-Feira, 05/02/2026.

Porta voz ne’e hatutan, “membru polisia balu ne’ebé tama iha komisaun rekrutamentu halo atendimentu la hatudu profisional no la servisu tuir regulamentu ne’ebé iha maibé halo fali atendimentu espesial iha prosesu rekrutamentu tanba kandidatu balu la priense kritériu bazeia ba regulamentu neʼebé komisaun hatur, maibė ikus naran tama hotu lista aprovadu”. Nia sublinha.

Deolando akresenta husi kandidatu aprovadu kandidatu hamutuk atus haat (400) husi kuota kada munisipiu maka sei tuir teste médiku, “ami ho estatutu kategoria aprovadu hotu maibe limita ami labele tuir teste mediku maibé fo prioridade atu tuir teste mak sira ne’ebe iha numeru kiik tuir kuato Munisipiu ida-idak nian”.

“Husi teste ne’e identifika kandidatu balu kondisaun saude la permite mak sei kontaktu/bolu tuir lista ne’ebe iha”.

Bazeia ba kestaun hirak ne’e, Deolando lamenta no husu Ministériu Interior no PNTL hodi anula desizaun atu bele fo oportunidade ba kandidatu sira ne’ebe pasa hodi tuir teste médiku.

“Husu Ministeriu Interior no PNTL imediatamente atu anula dejisaun, hodi la fo de’it teste mediku ba kandidatu nain atus haat (400) maibe fo oportunidade hotu ba kandidatu sira ne’ebe ho kategoria aprovadu”.

“Husu Ministeriu Interior ho PNTL atu estebelese ekipa independenti hodi halo investigasaun ba prosesu rekrutamentu ne’ebe iha tendensia ba familiarismu no grupuismu iha prosesu rekrutamentu”.Nia husu

Porta voz ne’e mós husu ba CAC no PDHJ imediatamente atu halo investigasaun ne’ebe klean hodi hatene tendensia ba familiarismu no grupuismu iha prosesu rekrutamentu tanba lista ne’ebe ho numeru kiik diskonfia husi Polisia nia oan no ninia familia nia oan sira.

Kandidatu foun ne’e husu ba Parlamentu Nasional Komisaun B ne’ebe trata asuntu Negósiu Estranjeiru, Defeza ho Seguransa atu halo fiskalizasaun imediata ba prosesu rekrutamentu ne’ebe iha tendénsia ba familiarismu no grupuismu iha prosesu rekrutamentu.

Provedor Direitus Humanus no Justisa (PDHJ) Virgilio da Silva Guterres “Lamukan” hatete provedor sei hamutuk ho ekipa sira atu ba halo verifikasaun no ko’alia ho parte relevante atu haree ba asunto ne’e.

“Provedor uza nia kompeténsia atu halo komunikasaun politika ho entidade relevante iha kazu ida ne’ebe kadetes foun sira mai keixa no ko’alia ho Ministeiro Interior ho komisario PNTL nian atu halo publikasaun kona-ba prosesu ne’e atu hatene detalhu kona-ba prosedimentu, atu rona mos husi parte relevante sira-nia resposta, nune’e PDHJ konfirma fali ba kadetes foun sira”.

Lamukan hateten, PDHJ orienta ona diresaun fiskalizasaun hahu ohin atu buka averigua dokumentu liuliu koba-ba dezisaun ne’ebe kandidatu sira mai keixa la admite sira atu ba faze teste mediku ne’e.Teni nia

:Ami nia ekipa haree iha pagina PNTL nian seidauk hetan dezisaun eskrita husi pagina PNTL nian tanba PDHJ hetan ida ne’e sai hanesan dadus atu bele hatene tanba kandidatu sira mos hatete sira-nia naran aprovadu maibe la admite atu tuir iha fase mediku nian”.

PDHJ mos orienta ekipa legal atu analiza ba dokumentu legais sira ne’ebe liga ho prosessu rekrutamentu atu bele haree mekanismu sira ne’ebe mak sai iha jornal Republika, liu-liu atu konfirma jornal Republika ko’alia kona-ba ne’e prosessu eliminatoriu tenke konfirma.

“Nune’e prosessu ne’e konsistente duni ho konteudu Jornal Republika ne’ebe mak iha ou lae. karik Jornal Republika dehan eleminatóriu mai iha prosesu akumulativu, ne’e laiha konsisténsia, parte legal mak haree”.

Provedor sei esforsu hodi responde ba kazu refere liu hosi halo analiza legal, fiskalizasaun no hato’o rekomendasaun tuir prosedimentu legal.

“Aprezentasaun ne’ebe kandidatu sira lori mai ne’e konsidera mos hanesan keixa ida ne’ebe tama, PDHJ sei lori ba komite jestaun keixa, iha nesesidade kalae atu halo investigasaun maibe depende ba relatoriu peliminar husi keixa”. Nia afirma

Ministru Interior Francisco da Costa mós deklara katak nia parte fo loron sanulu ba kandidatu sira hodi halo reklamasaun karik iha alegasaun ruma, nune’e parte ministériu bele haree no tomada desizaun.

Antes ne’e, Sekretariadu Rekrutmentu Membru Polícia Nacional Timor-Leste anúnsia ba públiku resultadu teste kandidatu hamutuk 10.597 Pasa & 2.277 La Pasa husi total 12.874 kandidatus. Entre sira ne’ebe hetan aprovadu kandidatu 400 mak sei tuir teste médiku.

Porta voz sekretariadu Rekrutamentu PNTL “husu ba kandidatu sira bele ba haree orariu teste médiku nian ne’ebe sei taka iha komandu munisipiu ida-idak nian”. Dehan porta voz PNTL Antônio da Luz iha Salaun CFP, Dili, 03/02/2026

Porta voz ne’e deklara prosesu rekrutamentu ba Membru PNTL foun ne’e ho kategoria jeral, laiha ona kouta ba Membru PNTL nia oan no veteranu nia oan tanba antes ne’e Provedoria dos Direitos Humanos e Justiça (PDHJ) halo paraser ba Tribunal Recurso hodi konsidera inkonstitusional.

“Rekrutamentu ne’e jeral, la haree ba povu baibain nia oan, PNTL nia oan no Veteranu nia oan maibe ba hothotu, se mak esforçu mak bele pasa”. Nia inforna

Rezultadu kandidatu ne’ebe aprovadu no la aprovadu iha kada munisípiu :

Munisípiu Aileu mane 484 no feto 234, total hamutuk 718, munisípiu Ainaro mane 446 no feto 141, total 587, munisípiu Atauro mane 63 no feto 16, total 79, munisípiu Baucau mane 576 no feto 147, total 722, munisípiu Bobonaro mane 503 no feto 182, total 685, Covalima mane 424 no feto 124, total 548.

Munisípiu Dili CFP mane 2069 no feto 845, total 3014, Ermera mane 719 no feto 262, total 981, munisípiu Lautém mane 374 no feto 136, total 510, munisípiu Liquiça mane 349 no feto 135, total 475.

Tuir mai, munisípiu Manatuto mane 397 no feto 155, total 552, munisípiu Manufahi mane 429 no feto 138, total 567, munisipiu RAEOA mane 402 no feto 119, total 521 no ikus liu munisípiu Viqueque Mane 491 no feto 147 total 638.

Kalendariu prova medika ba kandidatura sira, iha loron 10/02/2026 Munisípiu Aileu total 20, Ainaro total 25 no Atauro total kandidatu 10. Loron 11/02 munisípiu Baucau ho total kandidatu 40 no Bobonaro 20.

Loron 12/02 munisípiu Bobonaro 20, Covalima 25 no Dili/ Dili CFP 15. Loron 13/02 munisípiu Dili/ Dili CFP 25 no Ermera 37. Loron 16/02 munisípiu Lautém 27 no munisípiu Liquiça 26. Loron 17/02 munisípiu Manatuto 25 no Manufahi 25. Loron 18/02 munisípiu Oé-Cusse 25 no Viqueque 35.