Dinámika Manifestaun ! EUTL Konsistente Iha Desizaun & Firme Defende Lialos
Imajem : Manifestante EUTL sunu roda, hatan hasoru Membru PNTL kona ba la autoriza fatin hodi resulta ba anarkismu iha arena manifestaun, Dili, 16/09/2025. Foto : Daniel da Silva
SAP News TL, Dili : Estudante Universidade Timor-Leste (EUTL) ho kamada sosial sira halo manifestasaun hodi kontesta Parlamento Nasional kona ba asuntu foku haat iha resintu UNTL.
Iha entrevista, Porta Voz EUTL Jose da Costa informa EUTL halo manifestasaun kona ba hapara sosa karreta ba deputadu sira, hapara lei pensaun vitalísia, halakon lei distânsia 100 metrus hosi edifício públiku no tau osan ba setor infra-estrutura, edukasaun, saúde no agricultura.
“Ami-nia manifestasaun ne’e atu halakon sosa karreta, hapara lei pensaun vitalísia, hasai klauzula distânsia 100 metros dook husi edifísiu públiku no tau osan ba setor produtivu sira”.
“Ami defende povu maubere tomak, ami matan, tilun no ibun ba povu maubere tamba ne’e ami firme hodi defende sira-nia direitu, ami sei demo to’o fulan ida”. Hateten Porta Voz EUTL Jose da Costa ba Mídia Sapnews iha kampus sentral UNTL, 15/09/2025
Ligadu ho presença, Polícia Nacional Timor-Leste (PNTL), Jose da Costa hateten ne’e atu asegura no fo segurança ba manifestasaun, tanba ne’e husu ba estudante universitariu sira atu labele tauk hodi partisipa iha manifestasaun.
Jose hatutan, “Ami sei halo manifestasaun ne’e ho paz no estabilidade, ami garante sei laiha anarkismu ka krime ruma durante manifestasaun, mais ami husu atu PN hapara saída mak ami husu ba PN”. Nia Husu
Koordenador Estudante Universitariu Timor-Leste Natalício Nunes komfirma katak iha dialogu ho deputadu Parlamentu Nasional, sira deside kansela imediatamenti prosesu sosa kareta ba deputadu sira, no promete kontinua diskute alterasaun ba Lei manifestasaun no Lei Pensaun Vitalísia antes lori ba plenária.
“Ami representa estudante sira halo dialogu ho Presidente Parlamentu Nasional. Objetivu mak atu bele deside desizaun sira tuir ezizensia EUTL, no sira deklara imediata katak hapara prosesu ezekusaun sosa karreta 65″.
Natalício fundamenta, Primeiru, EUTL husu atu kansela sosa kareta Prado ka hapara prosesu sosa kareta ba deputadu sira, Iha rezultadu dialogu ohin, sira deside kansela imediatamente.
“Segundu, ami husu kona-ba alterasaun ba Lei Manifestasaun no Liberdade Manifestasaun, prosesu sei kontinua iha Parlamentu Nasional, Ami hein desizaun final liu husi rezolusaun ne’ebé sei hato’o. Ami sei kontinua akompaña, no karik rezolusaun la afavor estudante sira nia ezizensia, ami sei kontinua kontra”
Terseru, kona-ba alterasaun ba Lei Pensaun Mensal Vitalísia, iha dialogu ne’e Presidente Parlamentu Nasional hamutuk ho bankada PD, KHUNTO no CNRT hateten katak semana ida ne’e sei iha rezolusaun, sei lori ba plenária no sei fo sai ba públiku
Entretantu, iha loron dahuluk EUTL organiza asaun pasífika kontra Parlamentu Nasionál, mosu konfrontu hodi rezulta estudante balun kanek, no karreta Polisia Nasional Timor-Leste PNTL ida rahun.