Dircia Subliña Jovens Tenki Hatene Kuidadu Labarik, Ferik & Katuas Sira
Imajem : Fundadora Laudato Si Movimentu Timor-Leste, Dirsia Sarmento Belo iha CCD, 11/09/2024. Foto : Marcela Mery da Costa
SAPNewsTL, Díli – Fundadora Laudato Si Movimentu Timor-Leste, Dirsia Sarmento Belo, senti orgulhu bainhira partisipa iha dialogu ne’ebe lidera husi lider masimu katolika mundial Papa Francisco iha sentru Konvensaun Dili (CCD sigla Portugués).
Tuir Fundadora Laudato Si Movimentu Timor-Leste, Dirsia Sarmento Belo, hanesan mos joventude katolika Timor-Leste hateten, nia parte senti kontenti no orgullu tebes, tanba bele hetan oportunidade hodi partisipa iha dialogu ne’ebe Sua Santidade Papa Fransisco hato’o hodi enkoraja foinsa’e katolika sira iha Timor-Leste.
“Ha’u sente orgulhu no kontente ne’e hanesan bensaun bo’ot ida mai ha’u no ba maluk joven sira hodi partisipa dialogu ho Amu Papa no ne’e hanesan grasa bo’ot ida husi Maromak” Dehan Dirsia Sarmento Belo, ba SAPNews iha CCD, Quarta (11/09/2024)
Nia salienta, nu’udar sidadaun Timoroan agradese ba santu Padre nia korajen nu’udar lider igreja katolika mundial, hodi hato’o mensajem ne’ebé nakonu ho inspirasaun, motivasaun, domin no fiar hodi tulun foinsa’e sira atu bele moris iha dalan los.
“Santu Padre bele fo mensagem diak ba ami jovem sira hotu no mensajen ne’ebe mak Amu Papa ohin temi mak Jovem tenke halo barulhu, Jovem tenke iha espiritu badinas no mensagem ida seluk mak tenke kuidadu Labarik oan no mos katuas no ferik sira”. Nia sublinha
Nia hatutan liu husi diskursu Sua Santidade Papa Francisco, sita mós kona-ba Laudato Si ne’ebé mak husu jovem sira iha liberdade atu halo saida deit mak jovem sira hakarak maibe tenke iha responsabilidade hodi tau matan ba uma komum (rai ne’ebé ema hotu moris bá).
“Ha’u nia esperansa liu husi mensagem ne’ebe mak Amu Papa ohin fo bele fo hanoin mai ita halo ita atu foti tempu oituan halo reflesaun, oinsa mak ita renova fila-fali ita nia fiar no hasoru ita nia maluk sira liu-liu ba Maromak no kriasaun ne’ebe mak haleu ita”.Dircia hateten
Entretantu, iha dialogu refere akumula Joventude katolika Timoroan hamutuk 3.000 resin ne’ebe mai husi Aldeia, Suku, Postu Administrativu, Munisipiu no estudante universitariu balun.
Jornalista : Marcela Mery da Costa