Diretor & Xefe Suku Balun Abandona Servisu ! MAE Deklara Avalia & Bolu Ema Foun
Imajem : Ministru Administrasaun Estatal (MAE) Tomas Cabral hamutuk ho PAM Munisipiu Lautém no Manatutu inklui Xefe Suku Foun na’in haat iha Dili, 03/04/2025. Foto : Media MAE
SAPNewsTL, Díli : Ministru Administrasaun Estatal (MAE sigla Portugués) Tomas do Rosario Cabral deklara nia parte sei halo avaliasaun no ordena fila fali autoridade sira ne’ebe laiha vontade atu servisu iha sede suku, administrasaun postu no munisipiu.
Tuir deklarasaun Ministru Administrasaun Estatál hateten, durante ne’e nia parte observa kargu Xefi Suku, Administrador Postu no diretór
balun iha Munisípiu abandona servisu iha oras servisu nian hodi halo viajen mai Munisípiu Dili.
“Ha’u sei halo avaliasaun no ordena fila fali ba autoridade sira ne’ebe laiha vontade atu servisu para bolu fali enerjia foun hodi halo servisu atu apoiu governu sentral” Dehan Ministru Administrasaun Estatál Tomas Cabral liu husi nia diskursu hafoin fó tomada de posse ba Xefe Suku eleitu nain haat (4) iha salaun VIP MAE Kaikoli, Quinta (03/04/2025)
Governante ne’e afirma, nia parte simu informasaun katak sefe suku balun iha territóriu nasionál taka iha oras servisu nian hodi difikulta atendementu ba públiku ligadu ho nesesidade publiku nian.
“Tuir informasaun ne’ebe ha’u rona eskritoriu Suku balun taka iha oras servisu, ha’u foti problema kiik ona ida munisípiu no postu ne’ebe ha’u ba programa balun governu aloka ba iha ne’eba maibe Xefi do suku no Administrador Postu la ba sira nia prezensa laiha”.
MAE Fó kna’ar ba Xefi suku sira organiza komunidade kria paz no estabilidade, Programa Nasionál Dezenvolvimentu Suku (PNDS) munisípiu barak seidauk implementa ho diak, entaun papel Xefi suku atu apoiu autoridade Postu administrativu no autoridade Munisípiu sira hodi hala’o servisu ho diak.
“Ha’u rona Xefi suku sira mai Dili, autoridade la hatene, liliu diretor balun atu ba fatin ruma tun ba Munisípiu PAM la hatene”. Nia informa
Entretantu, Ministru Tomas Cabral kompromete katak sei halo avaliasaun no ordena fila fali servisu autoridade nian hodi melhora servisu administrasaun iha Suku Postu no Munisípiu.
Jornalista : Guilhermino Ramos da Cruz
