Dizitaliza Instituisaun Atus Ida Resin ! Kalohan Hosting Prontu Dezenha Website Ba Entidade Sira
- Imajem : Diretor Kalohan Hosting Armindo de Jesus iha Dili, 01/02/2025.
SAPNewsTL, Díli : Diretor Kalohan Hosting Armindo de Jesus konsidera mundu dijital sai ona parte ida hosi nesesidade moris umanidade nian, Empreza ne’e preparadu hodi halo dizitalizasaun no dezenhu website ba instituisaun ne’ebé deit mak presiza.
“Ohin loron, labarik sira mós tama ona iha mundu dijital, dijital transforma ita nia moris konvensional ne’ebé maka uluk ita nia beiala husik hela ba ita transforma ba mundu ida ne’ebé maka diferente, nakonu ho ferramenta sasan dijital, bainhira Timor ukun an tama kedas iha mundu dijital ne’ebé mai ho komputador laos makina ketik ne’e maibé ita mos tama kedas iha mundu dijital telekomunikasaun no internet”.Tenik Diretor Kalohan Hosting Armindo de Jesus ba SAPNews iha Díli, 01/02/2025
Armindo hatutan, teknolojia dijital laos ona buat foun ba ema hotu tanba iha ema nia moris lor-loron ne’e liu hosi 50% hamutuk ona ho dijital.
Diretor Kalohan Hosting haktuir nia hahú dezenvolve nia abilidade refere, wainhira estuda iha Departamentu Engenharia Informátika, Faculdade Engenharia Ciência e Tecnologia, Universidade Nasional Timor Lorosa’e (UNTL).
“Ha’u pesoal kontribui ba mundu dijital ida ne’e liu hosi ha’u nia hobi ka skills desde 2002, bainhira tama UNTL iha momentu ne’ebá situasaun diferente ho situasaun ida agora, iha momentu ne’eba komputador eziste limitadu, telefone selular ne’ebé maka ohin loron ita uza ne’e iha maibe ema limitadu maka uza”.
“Kontribuisaun ba mundu dijital ida ne’e hahu bainhira ami estuda, komesa hala’o profesionalmente ha’u nia kontribuisaun dahuluk iha Timor Telekom iha 2003 no 2004 hahu tama ona kriasaun baze dadus nian, depois kontribui dijitalijasaun ba entidade seluk ne’ebe labele temi ida-ida maibe hau hahu iha Timor-Telekom no ba ONU, to’o sira lori ha’u ba rai liur”.
“Hafoin fila fali hosi rai liur kontinua nafatin ho empreza kiik ida ne’ebé bolu “kalohan hosting”, liuliu halo dijitalizasaun hodi transforma jornais hosi organizasaun no instituisaun ne’ebe maka momentu ne’ebe laiha website sira bele iha no introduz mos ba sira, oinsa maka bele utiliza website ho nia kestaun teknika sira atu bele intende, entidade barak maka hahu utiliza website iha ho ha’u nia kontribuisaun iha tinan 2008, balu sei nafatin eziste no la’o to’o agora”.
Empreza kalohan hosting estabelese iha 2014, bainhira nia fila hosi rai liur hanesan traballador ba Nasoens Unidas nian tanba hetan hetan esperiénsia barak hosi rai liur.
“Kuandu fila fali mai Timor, ha’u iha hanoin ho kreatividade ne’ebe ha’u iha hodi kria kontribuisaun ruma liuliu iha dijitalizasaun nian, ha’u nia kriasaun laos deit atu hetan osan, laos deit atende governu nia nesesidade hanesan tenderizasaun, ha’u nunka tama iha tenderizasaun governu nian maibe ha’u ajuda entidade kiik sira liuliu jornal sira, ha’u hahu uluk iha radiu Liberdade, iha momentu ne’eba sira bolu Timor Media Development Center sira nia website ne’e eziste kedas iha 2008/2009, iha momentu ne’eba mos iha sentru ida naran sentru investigativu”.
“Ha’u hahu ajuda dijitaliza entidade kiik sira ne’ebe hakarak dijitalija sira nia média, iha entidade lubuk ida maka fó fiar no organizasaun non governamentais ne’ebé mos fó fiar hodi utiliza ha’u nia skils ne’ebé iha hodi transforma sira nia sasan sira ba dijital, to’o ohin loron halo ona website atus ida resin iha rai-laran no rai-liur”.
Dejafiu Sira Iha Konteudu Dijital
“Buat ne’ebé sai dezafiu maka entidade sira ne’ebé hakarak hosi inisiu ita introduz dijital ne’e ba sira intende maibe maibe nia kestaun ka problema ne’e iha sustentabilidade konteudu website, tanba ne’e iha okaziaun ida ne’e ha’u hakarak hateten website ne’e hanesan ita nia indentidade ida ne’ebé maka pertense ba organizasaun, media ka instituisaun ne’ebé sai hanesan janela ba mundu, ema vijita no hatene ita liu hosi ita nia website.
“Website nu’udar identidade uniku ida ne’ebe pertense ba organizasaun refere deit, ita boot sira ne’ebe iha website ne’e tenke orgullu tanba ne’e ita boot sira nia ID uniku ne’ebé maka iha mundu ne’e ema vijita ezemplu hanesan Sapewstl.com karik, laiha ona Sapnewstl.com seluk so úniku iha mundu”.
“Nune’e, ha’u enkoraza organizasaun no kompanha ka entidade sira ne’ebé laiha website bele iha website tanba ida ne’e identidade uniku, ida ne’e mos preparasaun iha hodi ajuda ita nia estadu”.
“Ita rona katak Fibra ótika ne’ebé sei mai no ohin ita koalia kona-ba starlink, tanba ne’e ita nia kontribuisaun ida hodi ajuda estadu halo nakonu konteudu sira, katak internet ne’ebé mai ne’e util no ita utiliza duni hanesan sidadaun, organizasaun no hanesan entidade, util ba ita nia rai Timor no parseiru sira ne’ebé maka eziste iha mundu rai-klaran”.
Pessoa Téiniku ne’e husu mós ba governu hodi dizitaliza institusaun públiku sira estadu nian, nune’e wainhira fibra ótika mai bele fasilita diak liutan servisu ho lais no ekselente.
“Ha’u enkoraza estadu liuliu governu hodi bele dizitalija sira nia sasan, ita mos hatene governu servisu makas hodi dizitalija sasan maibe labele para ho ida ne’e, tenke servisu makas liu tán hodi bele dizitalijasaun ne’e kontinua to’o ita nia fibra ótika to’o mai iha ita nia rain, ema hot-hotu utiliza ona starlink hodi tuur iha uma deit hodi halo keixa, husu ka sosa sasan no seluk tan”. Nia husu
Armindo dehan fasil tebes ba Kalohan Hosting hodi dezenha website ba instituisaun estadu nian tantu instituisaun privadu sira ne’ebé presiza aktualiza an iha mundu dizitalizasaun.
“Atu dezena website ne’e fasil loos ba organizasaun, kompanha ka instituisaun sira ne’ebe hakarak iha website bele konsulta ami ka liu hosi Media SAPNewsTL, bele mos vizita ami nia pajina ofisial Kalohan Hosting”.
“Ami nia kustu dezena profisional hahú hosi $300 dolares, ne’e depende ba kompleksidade webside refere, hanesan Timoroan orgullu loos tanba bele atende ita nia maluk sira, karik buat ruma akontese bele buka ami hodi konsulta gratuita bainhira ami sai ona servisu providor ba kliente sira nia website “.
Jornalista : Marciana da Conceição
