Eleva Sai Kuaze Parokia, Dom Leandro : Mehara Ba Oin Depende Ba Kolaborasaun Servisu

SAPNewsTL, Lautém – Durante Elevasaun Estasaun Missionaria Nossa Senhora de Fátima Mehara sai Kuaze Parokia, Dom Leandro husu sarani sira atu hatudu nafatin sira nia fiar no iha kolaborasaun servisu hodi dudu Mehara ba oin.

Dom Lenadro Maria Alves husu sarani sira hodi fo agradese ba Maromak, agradese ba kongregasaun sira no padre salesianu sira tanba husi sira Mehara to’o iha momentu ne’ebe sai ona kuaze parokia.

“Husi tempu ne’ebe mak naruk Amo sira Missionariu sira mai iha ne’e atu kuda fiar sarani ninian no ohin ita haree katak nia rezultadu eleva husi Estasaun Missionaria ba Kuaze Parokia ne’e duni agradese ba Maromak, agradese ba Kongregasaun Salesiana liuliu ba Amo Salesianu sira, Kuaze Parokia ne’e kuaze hanesan de’it ho Parokia ona so iha buat balun ne’ebe mak sei buka atu prepara di’ak liu tan atu bele foti ba Parokia”. Dehan Bispo Dioseze Baucau Dom Leandro Maria Alves iha durante Prejide Missa ba Ereksaun Kanonika Kuaze Parokia Mehara, 1/06/2024

Amo Bispo hatutan husi ohin ba oin sei la temi tan Estasaun Missionaria maibe temi ona Kuaze Parokia Mehara.

“Ohin mos ita bele dehan Parokia Lospalos hahoris tan nia oan ida ne’e mak ohin sai ona Kuaze Parokia Mehara, ne’e duni ita agradese ba Na’i Maromak, hahú ohin ba oin la temi tan ona Estasaun Missionaria maibe temi ona Kuaze Parokia Mehara”. Tenik Bispo Baucau

Bispo Baucau mos parabeniza sarani Mehara tanba ho fiar no esforsu ne’ebe sira halo Mehara bele sai Kuaze Parokia.

“Ha’u hato’o parabens ba imi tanba ho imi nia domin tomak hatudu an hanesan ema sarani, fiar iha Maromak hodi bele selebra eukaristia no halo elevasaun Estasaun Missionaria Mehara ba Kuaze Parokia, ne’e duni parabens ba Mehara oan sira, parabens ba Postu Administrativu Tutuala ninian”. Dom Leandro parabeniza

Dom Leandro afirma igreja Mehara atu ba oin ne’e depende ba sarani sira nia aktivu no kolaborasaun di’ak.

“Igreja Mehara atu ba oin depende ba sarani sira, wainhira sarani sira aktivu kolabora maka Igreja ne’e sei buras liu tan, igreja ne’e atu buras sai di’ak liu ne’e iha imi sarani sira nia liman tanba Amo Paroku sira ohin ida mai aban ida mai fali troka malu maibe igreja ne’e atu moris ka la moris ne’e iha sarani Mehara sira nia liman”. Bispo Leandro salienta

Aman Dioseze Baucau ne’e mos husu sarani sira atu kontinua hatudu sira nia an nu’udar sarani ne’ebe di’ak hodi kolabora no servisu hamutuk atu kontinua ba Parokia.

“Ba ona Kuaze Parokia buka atu hatudu liu tan imi nia an hanesan sarani diak, kolabora di’ak liu tan atu lalais ka neneik depende ba imi atu sai Parokia ne’e iha imi nia liman, se imi hatudu an maduru liu tan no lalais liu tan Parokia ne’e mos lalais maibe se imi dada Parokia ne’e mos sei dada buat hotu-hotu iha imi nia liman”. Nia hameno

Iha fatin hanesan, Pastor Proprio Kuaze Parokia Mehara Pe. João Jeronimo agradese ba Dioseze Baucau ne’ebe eleva Igreja Estasaun Mehara sai Kuaze Parokia.

“Agradese ba Dioseze Baucau ne’ebe tetu no hola ona desizaun ba Ereksaun Kuaze Parokia Nossa Senhora de Fátima Mehara ne’ebe ohin realiza husi Bispo Dom Leandro, agradese tebes”. Pe. João agradese

Iha oportunidade ne’e mos Bispu Dom Leandro fo krisma ba sarani Tutuala hamutuk atus ida limanulu (150).

Entretantu, Ereksaun Kanonika Kuaze Parokia Mehara ne’e partisipa husi Prezidente Autoridade Munisípiu Lautem, Komandante PNTL Munisípiu Lautem, Administrador Postu Administrativu sira iha Lautem, Veteranus, Xefe Gabinete husi Sekretariu Estadu Kooperativa inklui sarani sira husi Vigararia Lautem.

Jornalista: Luis Pailofo