Estabelese Postu Foun ! Komunidade Iutu Lakohi Tama Laivai
Imajem : Lia na’in no Komunidade Iutu iha Wairoque, 27/07/2025
SAPNewsTL, Lautem: Relasiona ho estabelesimentu Postu Administrativu Foun Laivai ne’ebe inklui mos Suku Wairoque kompostu husi Aldeia Lima ne’ebe atu tama ba Postu foun Laivai maka komunidade Aldeia Iutu rezeita tanba distansia do’ok.
Ekipa Kobertura – SAPNewsTL
Tuir Lia nain Iutu Tomas Freitas hateten Aldeia Iutu la ba hamutuk Laivai tanba distansia do’ok no karik sira ba sei dook husi sira rai no lulik sira nune’e la ba Laivai.
“Uluk Postu Luro moris ne’e kompostu husi Suku Ualu ne’ebe Ililai, Eukusi ne’e Postu Luro no ikus mai Ililai no Eukisi ba fali Laivai, ami Wairoque nafatin tanba ne’e ami Iutu nafatin Luro, ami nia avo sira maka loke Postu Luro”.
“Nune’e ami nafatin Luro, ami ba ne’eba distansia do’ok, ami la ba, ami kuandu ba ami nia to’os no natar dook, ami-nia lulik sira dook, ami tenke besik iha ne’e tanba ami moris husi ne’e, ami nia kultura la fo tanba ami nia kultura iha ne’e laos iha ne’eba”. Deklara Lia nain Aldeia Iutu Tomas Freitas iha Ailembere Aldeia Iutu Suku Wairoque Postu Luro, Domingu, 27/07/2025
Xefe Aldeia Iutu Tomas Gama Marques salienta nia tuir deit inan aman no komunidade sira tanba nia hili husi inan aman nune’e nia labele la’o ketak.
“Ba ha’u, inan aman Aldeia Iutu mak hili ha’u, nune’e ha’u la koalia mesak, ha’u tenke tuir buat ne’ebe sira koalia, ha’u labele la’o ketak, se inan aman sira dehan ba hotu loke Postu foun, ami ba, se dehan la ba ha’u mos la bele ba, ha’u tenke rona sira”. Katak Tomas
“Luro besik maibe ba fali Laivai ne’e do’ok, tanba distansia do’ok maka ami la ba, husi ne’e ba Postu Luro besik, la’o ba to’os no natar mos besik, inan aman Aldeia Iutu lakohi hotu atu ba Laivai hakarak nafatin Postu Luro”.
Xefe Aldeia ne’e sublina durante ne’e parte ekipa instaladora ba estabelesimentu Postu foun laiha konsultasaun ho sira maibe sira ho deit Aldeia seluk iha Suku Wairoque.
“Laiha konsultasaun ba komunidade Aldeia Iutu, ha’u hein sira maibe laiha, sira konsulta deit Aldeia seluk ba ami Iutu sira la mai”. Tenik Tomas
Komunidade Aldeia Iutu Grigorio Hornay informa sira tuir deit buat ne’ebe inan aman sira koalia tanba ba Laivai dook, sira hakarak nafatin iha Postu Luro tanba la’o besik.
“Ami la ba tanba distansia dook, husi foho Legumau to’o Laivai atu sai Postu foun ami lakohi ba, ami-nia inan aman koalia la ba, ami mos dehan la ba tanba iha ne’e ba Postu Luro besik”.
Entretantu, komunidade Iutu ho total populasaun atus lima haat nulu resin tolu (543) kompostu husi feto atus rua limanulu resin lima no mane atus rua ualu nulu resin ualu husi uma kain atus ida sanulu resin lima (115).
