Estudante UNITAL, Ana Paula Kandidata An Ba Xefe Suku HoraiQuic

SAPNewsTL, Dili : Relasiona ho Eleisaun Líderansa Komunitáriu ne’ebe sei hala’o iha loron 28 Fulan Outubru tinan ne’e, Estudante Ativu Universidade Oriental Timor Lorosa’e (UNITAL) Ana Paula de Araújo da Silva deside sei kandidata an ba Xefe Suku HoraiQuic tanba hakarak haburas demokrasia, promove igualdade jéneru no halakon injustiça sira

Iha Âmbitu Talk show ho Kandidatu Xefe Suku HoraiQuic, Postu Administrativu Maubesse Ainaru, Ana Paula de Araújo da Silva haktuir tempu ona feto sira hamrik hodi hola parte iha vida politika no tama iha sistema hodi halo mudansa ba moris diak komunidade nian

“Tempu to’o ona ba feto hodi hola parte iha ukun, nune’e bele hola desizaun ba mudansa no moris diak komunidade nian, halakon injustiça, klase sosial, asegura edukasaun ne’ebe diak no hanesan ba povu nia oan sira iha baze.” Tenik Kandidatu Xefe Suku HoraiQuic, Maubesse, iha Metinaro, 04/10/2023

Kandidata Xefe Suku HoraiQuic ne’e aprofunda, nia parte sei foku ba programa agrikultura, edukasaun, turizmu no saúde tanba setor haat ne’e importante tebes ba moris populasaun nian iha area rural

kandidatu Xefe Suku HoraiQuic Ana Paula ne’ebe hamrik ho motto, vizaun no misaun ho programa ne’ebe hakarak hadia prosesu demokrasia no moris di’ak

“Ha’u nia moto mak, ‘Ha’u mai atu servi, Ha’u mai la’os atu sai Liurai’, ho vizaun ‘Promove Demokrasia ne’ebe justu ba ema hotu’ liu husi misaun ‘estabelese sosiedade foun ida ne’ebé produtivu, inovativu no konstrutivu, liu husi programa hadia setor edukasaun, saude, turizmu no agrikulura”. Dehan Ana Paula

Ana Paula fundamenta, ukun ne’ebe furak no diak presiza iha involvimentu feto ba setor hotu hotu, nune’e bele hola desizaun ne’ebe justu no akomoda interesse komun ne’ebe laiha diskriminasaun ba kualker sidadaun ida

Estudante Ativu UNITAL ne’e deklara, tempu badak sei to’o iha Suku HoraiQuic, Postu Administrativu Maubesse Munisípiu Ainaru hodi konsolida komunidade sira hodi vota ba nia tanba nia fiar katak ho programa ne’ebe nia iha bele halakon injustiça, klase sosial, nune’e bele promove igualdade jéneru no demokrasia iha Timor Leste

Jornalista: Domingos Ferreira Conseição