Evita Familiarizmu ! Polísia Australianu & Portugal Sei Inklui Iha Komisaun Rekrutamentu PNTL
Imajem : Primeiru Ministru Xanana Gusmão iha Palásiu Prezidente Nicolau Lobato, Bairru-Pité, Kuinta-Feira 12/02/2026.
SAPNewsTL,Dili : Ligadu ho polémika Rekrutamentu Membru PNTL ne’ebe hetan ona suspensaun, governu sei kria komisaun ida ne’ebe involve Polísia Australianu no Portugal iha prosesu rekrutamentu kadetes foun Polísia Nasionál Timor-Leste (PNTL) tinan 2026.
Primeiru Ministru Kay Rala Xanana Gusmão hateten governu liu-hosi Konsellu Ministru halo ona verifikasaun bá prosesu tomak rekrutamentu ne’ebé ekipa atuál halo no hasai rezolusaun ida atu suspende tiha tanba iha problema duni.
“Ami verifika katak bele la’ós problema mós haree hanesan problema, ne’ebé suspende hodi kria komisaun ida involve polísia ita-nian ho polísia hosi Portugál no polísia hosi Austrália. Komisaun ita temi karik internasionál hodi haree didi’ak sala iha ne’ebé atu kurize, atu bele hasai desizaun foun ka halo foun fali”. Dehan Primeiru Ministru Xanana Gusmão iha Palásiu Prezidente Nicolau Lobato, Bairru-Pité, Kuinta-Feira 12/02/2026.
Konsellu Ministrus aprova rezolusaun ne’ebé aprezenta hosi Ministru Interiór kona-ba suspensaun temporária no revizaun ba Konkursu Públiku Admisaun iha Kursu Formasaun ba Ajentes PNTL tanba rekunhese katak iha problema no prátika la prátika boa governasaun.
Governu hakarak asegura transparénsia, legalidade, no kredibilidade iha prosesu rekrutamentu hodi konsidera dúvida no preokupasaun sira ne’ebé hato’o hosi kandidatu sira no entidade oioin kona-ba kumprimentu ba rekizitu balun no regularidade iha faze konkursu nian.
“Ba ida-ne’e, Rezolusaun Governu prevee suspensaun temporária ba konkursu no reforsa mekanizmu supervizaun no fiskalizasaun”. Sita Komunikadu Imprensa hosi Portal Governo Timor-Leste. Dili, 11/02/2026
Desizaun ne’e mós determina atu halo reestruturasaun ba Komisaun Monitorizasaun no Fiskalizasaun nian liuhusi integra membru nasionál no internasionál independente sira.
Nune’e mós halo revizaun klean ba faze hotu-hotu hosi prosesu selesaun nian ho nia objetivu atu hatene loloos faktus no potensialmente adota medidas koretivas.
Ho prosedimentu ida ne’e, Governu iha intensaun atu hametin sidadaun sira-nia konfiansa iha instituisoins públikas no atu garante katak asesu ba Polísia Nasionál Timor-Leste ne’e hala’o ho justu, imparsiál, no tuir lei.
