F-FDTL Entrega Uma Ba Família Vulnerável Iha Baucau ! Olinda : “Ha’u Agradese”
Imajem : Família vulneravel ne’ebé simu uma hosi F-FDTL iha Baucau, 01/02/2026
SAPNewsTL, Baucau : FALINTIL- Forsa Defeza Timor-Leste (F-FDTL) inaugura no entrega Uma Esperansa ba familia Olinda Monteiro Lopes iha suku Tirilolo, Postu Administrativu Baucau Vila, Munisípiu Baucau.
Kapitaun Gaspar da Silva ne’ebe lee Xefe Estadu Maiór Jenerál Forsa Armada Tenente Jenerál Domingos Raul Falur Rate Laek nia diskursu ne’e sublina, inaugurasaun uma ba Esperansa ba familia Olinda Monteiro Lopes nu’udar marka dignidade umana ne’ebe ajusta iha visaun F-FDTL.
“Uma ba Esperansa representa visaun Forsa Armada modernu ne’ebé kompriende katak defeza nasionál labele haketak husi seguransa umana nian, misaun primária F-FDTL nian, defeza firme ba soberania nian, atu hatudu vokasaun ba servisu publika iha tempu passadu”, Dehan Kapitaun Gaspar da Silva bainhira lee Xefe Estadu Maiór Jenerál Forsa Armada Tenente Jenerál Domingos Raul Falur Rate Laek iha Baucau suku Tirilolo Aldeia Lutumutu, Domingu, 01/02/2026.
Nia hatutan, konstrusaun uma esperansa sai hanesan lasu amizade ida entre komunidade ho instituisaun defeza.
“Konstrusaun uma esperansa ba família vuneravél hanesan halibur disipliña no kapasidade lojistika forsa armada nian ba nesesidade populasaun nian, hodi hametin lasu neʼebé labele kotu entre populasaun no instituisaun Defeza”.
Kapitaun Gaspar da Silva haktuir konstrusaun uma esperansa ba família Olinda Monteiro iha Tirilolo ne’e atu hametin liu tán konfiansa entre povu no militar sira.
“Pesóal militar sira hotu ne’ebé hala’o serbisu ida ne’e, ita bo’ot sira-nia esforsu hari’i uma no hametin konfiansa ba instituisaun, ita sei kontinua servisu ho rigór no umanizmu, hodi garante katak, iha ita-nia protesaun la iha ema ida maka ita husik hela ba kotuk”.
Iha fatin hanesan, Ministra Solidaridade Sosial no Inklusaun, Verónica das Dores, apresia no agradese ba militár sira ne’ebe konstrui Uma Espera ba Familia Olinda Monteiro.
“Ita agradese teb-tebes ba ita-nia forsa armada sira ne’ebé mak bele halo serbisu ida ne’ebé kualidade tebtebes, no kompromente sei kompleta fasilidade uma laran nian tanba militár sira konstrui de’it uma, maibé sasán sira ne’e responsavél MSSI atu kompleta”.
Governante ne’e kompromete katak Ministeriu Solidaritas Sosiál no Inklusaun sei kontinua fó ba família vulneravel ne’ebé presiza tulun husi governu.
Benefisiariu Olinda Monteiro agradese ba governu no FALINTIL- Forsa Defeza Timor-Leste ba apoiu Uma Esperansa ba nia familia
“Ha’u agradese ba F-FDTL ne’ebé harii Uma mai hau-nia familia”.
Serimonia inaugurasaun Uma Esperansa ba Familia Olinda Monteiro Lopes partisipa husi Ministra Solidaridade Sosial no Inklusaun (MSSI), Verónica das Dores, Kapitaun Gaspar da Silva, Autoridade Municipiu Baucau Veneranda Lemos, Xefe Suku Tirilolo Elbino Freitas Belo, Polisia Nasional Timor-Leste no komunidade aldeia Lutumutu.
