Festa Konsulta Popular ! FOKUPERS Husu Defende Direitu Feto & Kombate Injustisa

Imajem : Kordenador Enpoderamento  Sobrevivente Mercia de Jesus Lopes, Iha Salaun Fokupers, Tersa,20/08/2024.

SAPNewsTL, Dili – Forum Komunikasaun ba Feto Timor-Leste (FOKUPERS) realiza komunikadu imprensa kontra Asaun Violénsia Hasoru Feto no ejize Autoridade Kompetente sira lori kriminozu sira ba justisa

Kordenadora Advocasia Natalia de Jesus hateten,Forum Komunikasaun Feto Timor-Leste (Fokupers) Organizasaun naun-governamental ida ne’ebé servisu iha area Direitus Umanus liu-liu ba Direitu Feto no Labarik Feto ne’ebé sai vítima hósi Violénsia Bazeia ba Jéneru (VBJ).

Fokupers mai ho nia vizaun Feto Timor-Leste Moris iha Dame iha uma-laran, komunidade no nasaun ne’ebé respeita igualidade jéneru no ho misaun hapara violénsia hahu hósi nivel individu, uma laran to’o nivel instituisional nian liu hósi movimentu hodi hakbi’it feto iha aspektu hotu-hotu ho servisu integradu. Nune’e feto no mane iha konsiénsia, kompriensaun no kapasidade atu sai hósi problema injustisa no desigualidade jéneru.

“FOKUPERS iha papel importante ida iha sosiedade hódi haree kona-ba problema Violénsia Doméstika, Violénsia Bazeia ba Jéneru (VBJ) ne’ebé akontese iha Timor-Leste no oinsa mák bele halo prevensaun iha nivel komunidade, familia no sosiedade, liu-liu atu asegura feto no labarik feto livre hósi diskriminasaun, Asédiu Seksuál, Violasaun, Torturasaun, Lakon liberdade no vida”, Dehan kordenadora advocasia Natalia de Jesus ba Jornalista sira iha komunikadu imprensa Iha Salaun Fokupers, Tersa,20/08/2024

Iha tinan hirak ikus ne’e, Fokupers akompaña iha media sosiál hanésan Jornál, Televizaun, Facebook no seluk tan, notisia sira hatudu katak feto no labarik feto barak mák sai vítima hanėsan hósi aktu Asédiu Seksuál, Violénsia Fíziku, Violénsia Psikolojiko, Violénsia Ekonómika no Omesidiu agravadu no mós violénsia sira selúk, nune’e FOKUPERS husu ba :

1. Parlamentu Nasional tenki asegura alokasaun orsamentu sensivél ba jéneru iha Orsamentu Jeral do Estado iha Linas Miniteriu Xave sira ba implementasaun Lei Kontra Violénsia Doméstika (LKVD) no Planu Asaun Nasional Violénsia Bazeia ba Jéneru (PAN VBJ) 2022-2032 no halo fiskalizasaun ho rigorozu ba ninia implementasaun programa sira.
2. Husu ba Igreja Katólika no Konfisaun Reliojiozu sira hotu iha Timor-Leste atú haforsa liután formasaun ba kazál pre-matrimoniu ba komunidae em jeral túir prinsipiu no valores Relijiaun idak-idak nian, promove paz no respeita Direitus Umanus no hakribi violénsia.
3. Husu ba Orgaun Judisiáriu sira atu implementa Lei Kontra Violénsia Domestika (LKVD) no lei sira selúk neʼebé relasiona ho aktu krime ho rigorozu no aplika duni túir normas judisiál ne’ebé iha ona no avalia regularmente tendénsia krime sira ne’ebé julga iha tribunál no pena ne’ebé aplika ba (kondenadu) sira hodi garante protesaun adekuda ba vitima sira no prevene krime seluk akontese iha futuru.
4. Husu ba Polisia Nasional Timor-Leste (PNTL) halo atuasaun imediata ba krime publiku tüir lei haruka no kna’ar PNTL nian ho severidade. Husu ba Sekretária Estadu ba Igualidade (SEI), Atú haluan no haforsa liután sosializasaun ba Lei sira neʼebé liga ho Violénsia Bazeia ba Jéneru (VBJ) hódi abranje ba komunidade iha territoriu tomak, ho kordenasaun besik liu tan ho sosiedade sivil hodi muda norma sosiál sira neʼebé kuntinua haforsa imbalansu poder no dizigualdade iha sosiedade.

5. Husu ba Ministeriu Xáve sira nu’udar implementadór Lei Kontra Violénsia Doméstika no Planu Asaun Nasional Violénsia Bazeia ba Jéneru atu tau iha Planu Asaun Anuál tinan 2025 nia ba oin iha alokasaun Orsamentu Jeral do Estadu ba dezenpeña sira nia funsaun iha prevensaun no responde ba Violénsia Bazeia ba Jéneru. Husu ba Provedór Direitus Humanos no Justiça (PDHJ) atu asegura implementasaun hotu iha Timor-Leste

Iha Fatin hanesan, Kordenador Enpoderamento  Sobrevivente Mercia de Jesus Lopes hateten, Lei liu hósi monitorizasaun ba lei sira Manuais, Regulamentu sira nia implemtasaunho efikas tuir prinsipiu Direitus Humanus no Boa Governasaun.

“Organizasaun sosiedade sivil hotu atu haforsa rede advokasia iha prevensaun, protesaun no prestasaun servisu iha akompañamentu ba Vitima Violénsia Bazeia ba Jéneru (VBJ) iha territoriu tomak. Ba Lideransa komunitariu sira atu garante katak komunidade sira hotu bele iha konsiensia atu prevene violénsia hasoru feto iha komunidade no hala’o kana’ar hódi responde ba Violénsia Bazeia ba Jéneru (VBJ) túir lei haruka”.Nia sublinha

Kordenadora ne’e mos husu ba komunidade sira hotu atu hakribi no hapara Violénsia oi-oin hasoru feto no labarik feto atu halo medidas de prevensaun antes akontese no responde imediata ba violénsia doméstika bainhira akontese, tanba Violénsia doméstika konsidera nu’udár krime públiku. Se deit mak haree no rona violénsia doméstika akontese iha uma ka iha fatin públiku sira hato’o kedas keixa ba polisia atu tulun vítima.

Violasaun hasoru feto no labarik feto ne’ebé akontese iha munisipiu sira hanésan iha Likisa, Baucau, Ainaro, Bobonaro (Batugade, Atabae, Kailaku), Same no Dili – Bebonuk, Comoro, Rai Kotu, no ikus akontese iha Merkadu Taibesi ne’ebe sai ona atensaun públiku.

Relatóriu organizasaun sosiedade sivil (Relatoriu Institusionál JSMP tinan 2022) konfirma katak entre tinan 2020 to’o 2022, kazu VBJ okupa fatin aas liu entre 71% to’o 75% hosi totál kazu krime ne’ebé JSMP monitoriza iha tribunal sira. Fokupers rejista mos 95% sobrevivente Violensia Domestika no maioria hela iha Uma Mahon Fokupers tamba tauk, la seguru no trauma.

Faktu ne’e hatudu katak VBJ reprezenta persentajen boot liu iha sistema justisa formál Timor nian, maibé to’o ohin loron, instituisaun estadu, partikularmente setor justisa sira la hatudu esforsu no halo ezersisiu ho vizaun institusionál ida klaru atu responde ba realidade hirak- ne’e.

Fokupers lamenta no kondena maka’as kualker aktu violénsia sira ne’e nu’udar siklu violénsia neʼebé kontinua tambá implementasaun Lei Kontra Violénsia Doméstika (LKVD) No.7/2010, seidaúk másimu mesmu iha politika no inisiativa oioin maibe sei iha nível serimonial. Ho núne’e Fokupers mós halo nia auto avaliasaun atu hadia diak liutan Fokupers nia prestasaun servisu, prevensaun no responde ba violénsia hasoru feto no labarik feto sira.

FOKUPERS apresia ba Sua Ekselénsia Presidente da Repúblika ne’ebe kondena ona aktu violénsia doméstika neʼebé akontese iha Taibessi fatin públiku no mos violénsia hasoru feto sira seluk. Fokupers mos husu ba Presidente da Repúblika hodi kontinua superviziona servisu instituisaun relevante sira, sistema judisal sira iha kombate, prevene no responde ba Violénsia Hasoru Feto no violensia domestika. Iha festividade 25 anos de referendum ema hotu-hotu presiza hamutuk hodi kondena no hakotu aktu violénsia oi-oin hasoru feto no labarik feto.

Jornalista : Ermelinda Soares & Antonio Altamirando