Festa Konsulta Popular, Lider Nasionál Balun La Kaer Liman & Komunika Malu

SAPNewsTL, Dili – Durante komemorasaun loron konsulta popular ba dala XXV ne’ebe hetan partisipa hosi Sekretáriu Jeral Organizasaun Nasoins Unidas António Guterres no konvidadu internasionál sira. Lider Nasionál sira balun la kaer liman no komunika malu maske tur besik malu no kleur la hasoru malu.

Serimónia Solene Komemora Loron Referendum ba dala ruanulu resin-lima (XXV) ne’e ho tema “Povu Mak Funu, Povu Mak Terus, Povu Mak Manan Funu no Povu Mak Heroi Boot Ba Ukun Rasik An”.

Serimónia nasionál ne’e hetan partisipasaun hosi Sekretáriu Jeral Organizasaun Nasoins Unidas, António Guterres, Xefe Misaun UNAMET iha Timor-Leste Ian Martim, Vise Ministru Primeiru Ministru Austrália, Vise Primeiru Ministru Malaysia, Prezidente Repúblika José Ramos Horta, Primeiru Ministru Kayrala Xanana Gusmão, Prezidente Parlamentu Nasionál Maria Fenanda Lay, no Prezidente Tribunal Rekursu Deolindo dos Santos.

Serimónia ne’e marka mós presenza husi Membru Governu Dasia, membru Parlamentu Nasionál, Prezidente Partidu FRETILIN Francisco Guterres Lú-olo, Sekretáriu Jeral FRETILIN Marí Bin Amude Alkatiri, Tenente Jeral Falur Rate Laek, Jeneral Lere Anan Timur, konvidadu internasionál, nasionál no povu Timor-Leste.

Eventu solene ne’ebe figura nasionál tolu hanesan Primeiru Ministru, atual Prezidente Partidu CNRT Kayrala Xanana Gusmão, Sekretáriu Jeral Partidu FRETILIN Mari Bin Amude Alkatiri no Eis Prezidente Repúblika Francisco Guterres Lú-olo hola parte hotu iha eventu ne’e, maibe sira na’in tolu la konsege kaer liman no hakat besik ba malu hodi kaer liman ka komunika malu perante iha komunidade internasionál no povu Timor Lorosa’e.

Tuir observasaun jornalista SAPNews iha Estadium Munisipal Dili, durante komemorasaun loron konsulta popular ne’e nota katak “Primeiru Ministru Kayrala Xanana Gusmão to’o uluk fatin serimónia hodi hamutuk ho populasaun sira, enkuantu Eis Primeiru Ministru Marí Alkatiri hamutuk ho Eis Prezidente Repúblika Francisco Guterres Luolo to’o iha fatin serimónia, hafoin Sekretáriu Jeral ONU António Guterres hamutuk ho Prezidente Repúblika to’o iha estadium munisipiu Dili”. Jornalista SAPNewsTL akompanha direta iha Estadium Dili,30/08/2024

Hafoin Sekretáriu Jeral Nasoins Unidas to’o fatin serimónia, iha ne’ebe simu ho tebedai no akompanha hosi Primeiru Ministru Kayrala Xanana Gusmão, António Guterres hakat ba kaer liman no komprimenta lider nasionál sira hanesan Mari Bin Amude Alkatiri, Francisco Guterres Lú-olo, Prezidente Parlamentu Nasionál Maria Fernanda Lay inklui membru governu no konvidadu internasionál sira.

Maske nune’e, maibe Primeiru Ministru  Kayrala Xanana Gusmão la konsege kaer liman ho Sekretáriu Jeral Partidu FRETILIN Mari Bin Amude Alkatiri no Eis Prezidente Repúblika Francisco Guterres Luolo iha Estadium Munisipiu Dili, durante serimónia solene husi inisiu to’o remata, hafoin ida-idak husik fatin serimonia.

Entretantu, Eis Prezidente Repúblika Taur Matan Ruak mós la marka presenza iha serimónia komemorasaun loron konsulta popular ne’ebe hetan marka presenza hosi Sekretáriu Jeral Organizasaun Nasoins Unidas (ONU), António Guterres.

Iha diskursu, Xefe Governu Dasia Xanana Gusmão husu ba joven sira atu muda hanoin no komportamentu, estuda makaas no sai matenek, tanba rai Timor-Leste sei entrega ba joven sira nia liman.

“Povu mak funu, povu mak hamrik no povu mak manan funu, ohin ita hetan ukun rasik an tanba sira mak halo funu no manan funu,  joven sira tenki muda imi hanoin, komportamentu, hodi estuda sai matenek tanba rai ne’e sei entrega ba imi nia liman”. Tenik Xefe Governu Kayrala Xanana Gusmão liu hosi diriji minutu ida hakmatek iha Estadiu Munisipal Dili, 30/08/2024

Lider Nasionál ne’e deklara povu mak halo funu no povu mak heroi tanba sira mak halo funu no manan funu.

“Povu mak halo funu, povu mak heroi, tanba povu ne’e mak manan ukun an, viva povu Timor-Leste”. Xanana Deklara

Primeiru Ministru ne’e husu ba joven sira atu muda ida-idak nia mentalidade, kapasidade, no hahalok hodi prepara no hadia an beibeik hodi labele servi deit nia amigu maibe serví povu no nasaun ne’e tanba povu mak manan funu.

“Prepara an no prepara an, muda imi nia hanoin, mental, karater, kapasidade, labele hatene servi amigu deit, maibe servi rai ne’e, servi povu ne’e, tanba povu ne’e mak manan ukun an. Ita sei presiza esforsu barak, barak teb-tebes hodi lori rai ne’e ba oin, maske ita estadu frajil maibe ita la’os estadu falladu hanesan país sira seluk”. Primeiru Ministru hateten

 

Iha fatin hanesan, Sekretáriu Jeral Organizasaun Nasoins Unidas, Antonio Guterres konsidera rezisténsia Timorense nunka deziste tanba prinsípiu Xanana Gusmão ne’ebe sempre reziste hodi manan.

“Timor-Leste hasoru poder armas, hasoru bombardeamentu, destruisaun, hetan prizaun, maibe tanba ho rezisténsia timorense nunka desiste, resisténsia timorense ho lideransa Xanana Gusmão nia prinsípiu resistir para vencer, resisténsia timoroan garante duni to’o finalmente hetan liberdade no direitu”.Tenik Sekretáriu Jeral Organizasaun Nasoins Unidas, Antonio Guterres liu hosi diskursu iha Estadium Munisipal Dili, 30/08/2024

Sekretáriu Jeral Organizasaun Nasoins Unidas, akresenta Xanana Gusmão nia lideransa la’os deit lidera povu ba ukun an maibe lidera povu to’o dalan demokrátiku, rekonsiliasaun entre timoroan no timoroan ho indonéziu sira.

“Xanana Gusmão lider ne’ebe kombatente iha batalla, konsistente iha kadeia, lider ne’ebe lidera povu Timor-Leste, la’os deit lidera povu ba independénsia maibé to’o iha dalan ba estadu demokrátiku, dalan ba rekonsiliasaun entre Timoroan no Timoroan ho Indonéziu sira”.Nia deklara

Eis Primeiru Ministru Portugal ne’e konta mós, José Ramos Horta ne’ebe halo komunikasaun ho país hotu-hotu no lider hot-hotu hodi hato’o direitu Timor-Leste nian kona-ba ukun rasik an, ikus mai konvense duni komunidade internasionál.

“Ha’u labele haluha mós servisu barak mak halo nu’udar Primeiru Ministru Portugal ne’ebe konvense no presiza garante direitu internasionál, presiza respeita alta determinasaun povu Timor-Leste, lahaluha ha’u hasoru Ramos Horta ne’ebe ko’alia ho nasaun no lider hotu-hotu hodi dehan ba sira hotu kona ba direitu Timoroan ba ukun rasik an, finalmente possivel konvense komunidade internasional.” Sekretáriu Jeral Organizasaun Nasoins Unidas, Antonio Guterres hateten

Antonio Guterres admira ho faktu ne’ebe hatudu katak Timor-Leste sai nasaun demokrátiku no ezemplar, respeitu ba direitu umanu no halo parseria extremamente ho komunidade internasionál no sai país fundador G7+.

 “Ha’u nia admirasaun profundu, ho faktu ne’ebe transforma Timor-Leste sai país demokrátiku no ezemplar, profundu respeitu ba direitu umanu no iha parseiru extremamentu ho komunidade internasionál, Membru Comunidade dos Países da Lingua Portugueza (CPLP), País Fundador G7+, hola parte iha organizasaun mundial altu komérsiu no sei adere ba ASEAN”.Nia dehan

António Guterres salienta, Timor-Leste enfrenta dejafiu boot ba seguransa alimentar, kualidade edukasaun no saúde, inklui apoia solidariedade internasionál ne’ebe la sufisiente ba batalla dezenvolvimentu nasionál.

“Timor-Leste hasoru dejafiu boot, garante ninia sidadaun ba seguransa alimentar, kualidade edukasaun, saúde kualidade no asuntu sira seluk tan ne’ebe infelismente solidariedade internasionál la sufisiente, hakarak solidariedade internasionál ne’ebe forte hodi apoia Timor-Leste ne’ebe bele manan batalla ukun rasik an, demokrasia no mós dezenvolvimentu”.Nia sublinha

Enkuantu, observasaun iha terenu hatudu katak serimónia solene komemorasaun konsulta popular ba dala XXV ne’e la’o iha ambiente paz, estabilidade no susesu tebes perante iha komunidade internasionál.

Jornalista : Conzita Mota & Marciana da Conceição