Festivál Rabilau ! Olandina Husu Jerasaun Foun Kria Paz & Eskola Didiak
Imajem : Olandina Xavier iha Rabilau Maubisse, 18/10/2024. Foto : Daniel da Silva
SAPNewsTL, Ainaru : Durante Partisipa festivál rabilau, Inan feton Olandina Xavier husu ba foinsa’e sira hodi eskola didiak no kria paz iha sosiedade nia leet tanba fetoran no mane klosan sira mak futuru nasaun nian.
Olandina konsidera futuru iha joven sira liman, tan ne’e nia husu ba fetoran no mane klosan sira hodi eskola didiak, badinas estuda no la’o barak hosi duni ida-idak ninia mehi to’o hetan iha futuru.
“Ba joven sira, imi tenki eskola didi’ak, futuru iha imi nia liman, ohin ami moris iha susar laran, ami lakohi imi moris tan iha terus nia laran hanesan ami agora, ha’u hakarak katak imi tenki moris diak no ksolok iha loron aban bainrua”. Hatete Olandina Xavier iha Rabilau Maubisse, 18/10/2024.
Olandina hatutan, oan feto no mane sira ne’ebé tama iha banku ensinu sekundáriu no superior hodi labele para eskola ka forma uma kain sedu tanba inan aman sira hodi terus no susar mak buka osan sustenta imi nia estudu.
“Ha’u husu atu oan sira keta para eskola no forma família sedu, imi tenki eskola to’o gradua hanesan ha’u nia oan ne’ebé gradua ona iha ISFIT (Institutu Supeior Filosofia no Teolojia) no agora kontinua mestradu direitu iha Portugál, tanba imi oan sira mak futuru, aban bainrua imi mak sei troka ami, wainhira ami laiha ona”. Nia dehan
Xavier mós husu jerasaun foun sira hodi kria paz no estabilidade, labele involve iha konflitu no estraga malu maibé haree malu nu’udar maun ho alin iha rai Timor Lorosa’e ne’ebé ema rihun ba rihun mate mak sosa nia liberdade.
“Joven sira buka hadomi malu, respeita malu, kuidadu malu, haree malu didiak, labele hanoin halo problema, fahe malu no estraga malu. Uluk ami sente no haree ho matan katak isin asu mak dada, ran asu mak lambe tanba ne’e ami lakohi imi nia futuru repete saida mak ami sente ona iha tinan 24 nia laran (1974-1999)”.
Xavier mós husu ba inan aman sira hotu hodi dudu oan sira ba asesu ensinu superior, nune’e oan sira nia futuru bele sai diak no moris iha prosperiedade.
“Ha’u husu ba inan aman sira hotu, atu dudu no tau matan ba oan no beioan sira hodi eskola, estuda, esforsu, badinas hosi bele hetan sira nia futura ne’ebé furak iha sira nia moris”. Nia hameno
Sidadaun Olandina Xavier halo ona tinan 55, iha oan mane na’in ida ne’ebé gradua ona iha ISFIT no oras ne’e kontinua ona estudu mestradu direitu iha Portugál.
Enkuantu, inan feton ne’e mós husu ema hotu atu bele ba vizita sítiu turístiku rabilau hodi haree paisajem furak sira no halo rekreasaun.
Jornalista : Marciana da Conceição