Fo Kuitadu Ba ICCTL ! Pe. Florindo : Profeta Falsu, Promesa Falsu & Ilegal
Imagem : Pe. Florindo de Jesus iha Igreja RAEOA, 14/04/2025
SAPNewsTL, RAEOA : Durante selebra misa domingu ramos, Padre Vigáriu Florindo de Jesus hateten ICCTL ne’e hanesan profeta falsu ne’ebé lori promesa falsu tanba ninia hanorin sira la tuir buat ne’ebé uma kreda hanorin.
“Profeta falsu tanba ninia hanorin sira la tuir buat ne’ebé uma kreda hanorin ita, buat hotu ne’ebé la tuir igreza nia hanorin no ukun fuan igreza katólika konsidera ida ne’e hanesan profeta falsu, promesa falsu no ilegal, nune’e buat hotu tenki la’o tuir justisa, parte igreza sei toma responsavel ba ida ne’e”. Teni Pe. Florindo de Jesus ba SAPNews iha RAEOA,13/04/2025
Ligadu ho sarani Oe-Cusse oan balun ne’ebé involve, Padre Vigáriu ne’e deklara nia parte seidauk hatene kona ba ida ne’e maibe nia husu ba sarani katólika hotu atu mantein ninia fiar no labele monu ba lasu.
“Grupu ICCTL ne’ebé mosu no viral (tenar) iha média, loron hirak liu ba tanba sira la satisfas ho buat balun sira ses an, atu dehan katak tanba igreza ne’e hari’i husi Jesus Kristu iha tinan rihun rua ba kotuk maka to’o agora metin nafatin, ha’u husu ba sarani sira atu mantein ninia fiar no labele monu ba lasu ema nian”.
“Jesus dehan ‘Ha’u aman, perdua ba sira tanba sira la hatene sa mak sira halo’, kuitadu ba sira, tempu paskoa hanorin ita atu perdua sira ne’ebé halo aat ba ita, ita tenki iha fuan ne’ebé paz, haraik an no fuan transformativu, Jesus tama iha ita nia fuan hodi halakon hahalok ne’ebé foti an, loko an, no egoista”.
Pe. Florindo de Jesus
Pe. Florindo dehan, domingu ramos hanesan loron ne’e ne’ebé loke odamatan ba sarani sira hodi tama ba semana santa hodi hanoin Jesus nia terus, mate no moris hias.
“Uma Kreda selebra Domingu Ramos, selebrasaun ne’e hanesan odamatan ba sarani sira selebra Jesus nia paixaun no resureisaun, ita hanoin kona ba Jesus ninia terus no moris hias, hahú ho Domingu Ramos, Kinta-Feira Santa, Sábadu Aleluia no Domingu Resureisaun”.
“Ita halo reflesaun hamutuk kona ba Jesus ho fiar ne’ebé klean ho fuan no laran tanba husi nia terus no mate iha kruz mak atu soi no salva kristaun fiar na’in sira, iha fiar katak ita sei moris ho kristu iha nia moris”.
Padre Vigáriu akresenta, “Dala barak ita sente ita mak diak liu no los liu, ita sai santu liu maibe ita haree ema seluk ladiak, hanoin aat ema no halo buat ne’ebé ladiak, la presiza presenza ema seluk nian maibe ita konsidera ema hanesan ema ne’ebé bosok, no laiha kapasidade”.
“Wainhira ema seluk presenza iha ita nia leet, ita tenta buka dalan hot-hotu atu hatun, hamonu no hafoer ema, atitude sira hanesan ne’e mak ita hanaran profeta falsu no promesa falsufalsu”.
Florindo mós husu atu sarani sira labele sai profeta falsu, lori promesa falsu ba familia sira no sosiedade iha Timor-Leste.
Selebrasaun loron Domingo Ramos ne’e hetan partisipasaun maksimu hosi sarani Região Administrativa Especial Oe-Cusse Ambenu (RAEOA).
Jornalista : Sérgio Delekuar – Jurnalis