Fransisco Colo Husu Rogério Lobato, Servi Povu Ho Neutralidade

SAPNewsTL,Oe-cusse : Lider Komunitariu, Suku Costa, Fransisco Colo, Parabeniza, Prezidente Autoridade, Reziaun Administrativa Espesiál Oecussi Ambenu (RAEOA), Rojerio Tiago Lobato, ho estrutura tomak ne’ebe mak simu tomada de posse no nia parte husu hodi servi povu ho neutralidade.

Prezidente autoridade ne’ebe mak ohin hetan tomada de posse husi Primeiru Ministru, Kay Rala Xanana Gusmão, deklara nia mai husi partidu Frente Revolucionaria de Timor-Leste Independente FRETILIN, nia prezensa laos atu hare’e deit nia familia maibe nia atu hare’e no servi povo atoni Oe-cusse.

“Ha’u fo parabens ba Prezidente Autoridade foun ne’ebe simu ona posse entaun, ha’u hare katak Oe-cusse oan hotu-hotu sei hare’e no sedauk bele hala’o kritika tanba presidente Aurtoridade no estrutura tomak foin tomada de posse no sira sei hare tuir servisu sira hodi halo balansu,”

 

“Ohin loron foin hahu halo serimonia tomada de posse. Hau sente balun diak, balun lao ladun diak tanba ita ema dala ruma iha falla liu husi falla ne’e mak presiza atu hadia ba futuru”. Hateten Sefi Suku Costa Fransisco Colo ba Jornalista sira Iha Salaun Hotel Bintang Lima hafoin remata serimonia tomada de Posse ba Prezidente Autoridade RAEOA (30/01/2024).

Lider komunitariu ne’e informa, area dezenvolvimentu kona-ba infraestrutura Governu Timor-Leste husi lideransa sesante sira la’o diak, povu hare’e obra fisiku la’o diak hanesan eskola, estrada balun sira halo iha villa laran, no obra balun ne’ebe mak povu hare’e seidauk, tanba ne’e autoridade foun presiza hadia no kontinua obra ne’ebe mak lideransa sesante halo ona.

“Problema bé mos ha’u senti ita presiza tau importansia, ha’u sei koalia ho departamentu SAS tanba hau nia komunidade balun hanesan hela iha area palaban ne’e sira dalaruma la asesu bé mos ho diak, no ita sei komunika malu oinsa halo jestaun ne’e ho diak para komunidade bele asesu bé mos, iha parte seluk ita sei hare’e mos agrikultor, ita sei halo liña koordenasaun diak para servisu ne’ebe mak ladun diak ita sei hadia iha futuru”tenik Fransisco Colo

Nia hatutan, Suku Costa iha prosesu tuir mai sei prepara pedidu suku nian ba Prezidente Autoridade foun atu bele hare hodi solusiona problemas ne’ebe komunidade Suku Costa enfrenta liliu kria divisaun suku no dezenvolve kreatividade joventude nian.

Enkuantu, estrutura sira ne’ebe simu pose ho termu juramentu no asinatura ho kargu atu servi RAEOA, André Lao, hanesan Sekretáriu Rejionál ba Administrasaun, Elvira Manat, hanesan Sekretáriu Rejionál ba Finansas, Luís de Jesus Neno, hanesan Sekretáriu Rejionál ba Saúde, Inácia Tamele, hanesan Sekretária Rejionál ba Edukasaun no Asuntus Sosiais, Filomena Sila, hanesan Sekretária Rejionál ba Agrikultura, no Marcelino Marques Coro, hanesan Sekretáriu Rejionál ba Terras no Propriedades, Rejistu no Notariadu no João Mendes Gonçalves hanesan Koordenadór Komisaun ZEESM-TL, Régio da Cruz Salu no Herculano de Sousa hanesan Vise-Koordenadór ZEESM-TL

 

Jornalista : Sergio Lelan