Fundadora Mídia Juvenil SAPNewsTL ! Aquelina Mangalhães Hakotu Iis
SAPNewsTL, Ermera : Família boot Média SAP News Timor Leste lakon ninia Membru Jornalista Aquelina Mangalhães, Jornalista feto ida ne’ebe simples, badinas, kalma, nonok, konsistensia, firme no brani desde funda mídia ne’e to’o ohin loron nia hakotu iis.
Jornalista Mídia Juvenil, Mídia Sa’ani Assamana Prazer News Timor-Leste (SAPNewsTL) lakon ninia Jornalista Aquelina Mangalhães tanba sofre moras, Feto foinsa’e ida husi Postu Administrativu Letefoho, Munisipiu Ermera
Hafoin rona novidade tristeza ne’e, Presidente Mídia SAPNewsTL sente triste tanba lakon ninia Jornalista feto ida ne’ebe simples, badinas, kalma, nonok, konsistensia, firme no brani desde funda mídia ne’e to’o ohin loron nia hakotu iis.
“Ami família boot Mídia SAPNewsTL sente triste tanba lakon feto ida, fundadora Mídia SAPNewsTL, Jornalista ida ne’ebe badinas, haraik an, firmeza, brani, kalma, konsisténsia, no nunka sura ninia kolen maske la’o dalan naruk no hakat liu prosesu difisil barak”. Tenik Presidente SAPNewsTL Clementino Bragança Machado, Dili, 25/12/2023
Lider Mídia Juvenil ne’e hatutan, Maktoban Jornalista Aquelina Mangalhães ninia kontribuisaun ba SAP News ne’e boot tebes, labele sura, kontribuisaun ne’ebe klean no nunka atu haluha, tanba mídia ne’ebe hari’i husi juventude no estudante universitariu, laiha rekursu finanseira maibe ho deit ninia vontade no esperansa la’o hamutuk nafatin iha terus no susar nia laran to’o minutu ikus maromak mak bolu.
“Maktoban Aquelina Mangalhães, nia ne’e hanesan protagonista ida ba SAP News, Aquelina Mangalhães ninia kontribuisaun ne’e boot teb-tebes ba Mídia Akadémika, Juvenil no estudantil ida ne’e, ninia dedikasaun no kontribuisaun hotu ami la bele sura, no nunka atu haluha, Mídia ida hari’i laiha osan no hasoru situasaun difisil tebes, maibe Aquelina hamrik firme no servisu to’o minutu ikus maromak mak bolu nia”.Clementino Machado konta
Prezidente SAPNews ne’e mos fo sentidu kondolénsia profunda ba familia Aquelina Mangalhães ne’ebe lakon oan feto ida ne’ebe sei joven, tanba Maromak iha planu ne’ebe la hanesan ho ema nia hanoin no hakarak.
“Hakarak hato’o deit mensajen ba ita hakmatek ba iha Reinu lalehan, hamutuk ho na’i Maromak no Anju sira. ami la haluha ita nia di’ak tomak durante hamutuk ho ami, ami husu deskulpa karik buat balu naksalak durante ita nia hamutuk iha Knua Media SAPNews, ami nia sentidu Kondolensia Profundu ba Família enlutada”.
“Ami sura la nahas ba ita nia Kontribuisaun hotu no ami nafatin konta no hakerek ita nia Istoria. ita boot la mate, apenas muda deit ba mundu seluk, maibe ita nia ispíritu luta nafatin ho ami, ita ba ona, maibe ita boot rai no husik hela média ne’e ba ami, ami kompromete sei kontinua ita nia obra ne’e iha mundu ne’e, hakmatek iha maromak nia kadunan santu, boa viajem, adeus no adeus, obrigadu barak tebes ba dedikasaun tomak, até um dia”. Presidente SAPNews sublinha
Aquelina Mangalhães moris iha Postu Administrativu Letefoho, Munisipiu Ermera, Hafoin remata estudu iha banku sekundaria, Matebean tuir kursu jornalizmu iha Grace For Developmet (GFD) durante fulan neen, tuir mai hamutuk ho nia maluk sira inisia no funda midia juvenil SAPNewsTL iha loron 26 Fulan Fevereiru 2021.
Hafoin hari’i Midia ne’e, Aquelina Mangalhães simu responsabilidade husi membru sira hodi sai xefe departamentu informasaun to’o ohin loron, nia hakotu iis iha nia rain moris fatin Munisipiu Ermera.
Jornalista : Ermelinda Soares