Governu Hili Afonso & Natércia Lidera PNTL, Feto Dahuluk Sai Segundu Komisáriu
Imajem : Primeiru Ministru Kay Rala Xanana Gusmão promove Natércia Martins ba segundu Komisáriu Polísia Nasionál Timor-Leste (PNTL). Foto : Média PM
SAP News TL : Governu liu hosi reuniaun Conselho de Ministros kuata-feira ne’e nomeia Afonso dos Santos ba Komisariu Jeral no Natércia Martins ba segundu Komisáriu Polísia Nasionál Timor-Leste (PNTL).
Nomeiasaun iha Conselho de Ministros ne’e lidera hosi Primeiru Ministru Kay Rala Xanana Gusmão liu hosi reuniaun Konselhu Ministru iha kuarta-feira, 25 Marsu 2026.
Nomeasaun Superintendente Natercia Martins ba pozisaun Segundu Komisáriu PNTL hanesan momentu markante dahuluk iha istória estrutura lideransa PNTL, hafoin ukun rasik an.
Natercia Martins sai feto primeiru ne’ebé nomeiadu ba pozisaun Segundu Komisáriu iha jornada PNTL, nomeiasaun ne’e hatudu progresu konkretu iha implementasaun politika igualdade jéneru no reflete esforsu atu asegura partisipasaun feto iha nível desizaun iha Timor-Leste.
Avansu ida ne’e bele konsidera hanesan sinal forte katak instituisaun seguransa labele deit dominadu husi mane, maibé mos fó oportunidade ba feto sira atu lidera no kontribui iha dezenvolvimentu nasional.
Komisariu Jeral PNTL nomeiadu, Afonso dos Santos orijem hosi suku Zulo, postu administrativu Zumalai, munisípiu Covalima, Segundu Komisariu PNTL Natércia Martins hosi Suku Ulmera, postu administrativu Bazartete, munisípiu Likisa.
Povu Timor-Leste espera katak lideransa foun sei fó impaktu pozitivu ba profesionalismu, disiplina no servisu polísiamentu ba povu ho lideransa inkluzivu no forte, PNTL bele kontinua hadia nia papel atu garante seguransa, justisa no estabilidade iha nasaun.
