Gradua Iha IOB ! Marcela : Laiha Susesu Ida Sein Sakrifisiu

SAPNewsTL, Dili : Hafoin simu graduasaun, Graduada Institute Of Business (IOB) Faluldade Informasaun no Komunikasaun Teknolojia, Graduada Marcela Mesquita de Jesus Lemos fo agradese ba Aman Maromak tanba bele tulun nia to’o realiza mehi sai realidade

“Uluk knanain ita Agradese ba Aman Maromak tanba bele haraik kbiit, tulun no matenek mai ha’u ohin loron selebra loron espesial ne’e hodi marka jornada foun iha mundu akademiku”.

“Agradese teb-tebes ba papa no mama, Ha’u oan nia susessu ne’e mai husi pai ho mãe ne’ebe halo sakrifisiu oioin, terus, susar, esforsu to’o gradusaun, maske hasoru difikuldade oioin, maibe ha’u nia mama no papa nafatin hakaas an to’o finaliza ha’u nia estudu iha IOB”. Tenik Graduada IOB Marcela Mesquita de Jesus Lemos ba Jornalista SAPNews iha Kampus IOB, Fomentu Dili, 19/12/2023

Graduada Fakuldade Informasaun Teknologia Departamentu Gesatun Informátika, Marcela Lemos hatutan, dala wa’in nia mama ho papa ho servisu ne’ebe barak, la’o loron manas no udan maibe la dehan katak sira kolen.

“Dala wa’in, ha’u nia mama no papa senti kolen maibe nunka hatete mai ha’u katak sira kolen, ha’u nia papa deside ba servisu iha Bobonaru, no ha’u nia mama deside hodi halo business iha Dili, Imi nain rua la hatene udan la hatene loron manas, tan deit buka osan hodi suporta oan ba eskola, obrigadu barak tebes ba domin murak ida ne’e.”

Marcela Lemos konsidera, susesu ne’e la fasil maibe mai husi sakrifisiu ne’e halo hodi gasta tempu, sakrifika sentimentu no gasta enerjia, liliu esforsu tomak familia nian tanba sira sempre buka dalan no servisu makaas liu husi halo fila liman no servisu makaas hodi sustenta oan ba eskola.

“Ha’u nia motto hau dehan, ‘Laiha Susesu Ida, Sem Sakrifisiu’ katak susesu ne la fasil, susesu tenki rezultadu husi sakrifisiu, terus, tanis, hamlaha, pasiensia, esforus no orasaun. Atu hetan susesu ne’e tenki sakrifika ita nia tempu, sentimentu no domin iha prosesu hotu-hotu”. Nia sublinha

Graduada IOB ne’e mos husu ba foinsa’e sira ne’ebe sei la’o no frekuenta estudu iha mundu akademiku atu labele baruk hodi aprende no estuda makaas maske hasoru difikuldade barak.

“Ha’u husu ba kolega estudante sira ne’ebe mak hala’o nia estudu iha ensinu superior sira hotu labele baruk atu estuda no aprende nafatin ho pasiensia, esforsu no orasaun maske hasoru difikuldade oioin, ita tenke hasoru ho esperansa no Hamnasa hodi esforsu nafatin, tanba dalan ba susesu mak esforsu no sakrifisiu.” Marcela husu

Enkuantu, Marcela Mesquita de Jesus Lemos estuda iha Institute of Business (IOB) iha tinan 2019, Feto foinsa’e ne’e mai husi Postu Administrativu Bobonaro, Munisipiu Bobonaro.

Jornalista : Jonh Marito