Guvernu Sei Fasilita Jornalista Kontinua Estudu Iha Ensinu Superior

SAPNewsTL, Dili : Durante partisipa iha Semináriu Internasional ne’ebe realiza husi Centro Audiovisual Max Sthal Timor Leste (CAMSTL Sigla Português), Sekretaria Estadu Komunikasaun Sosial (SEKOMS) Espedito Loro Dias Ximenes haktuir SEKOMS sei asina akordu hodi fasilita jornalista sira kontinua estudu iha ensinu superior

Sekretaria Estadu Komunikasaun Sosial, Espedito Loro Dias Ximenes saran lia hirak, wainhira hatan ba sujestaun ne’ebe hato’o husi Estudante UNTL Sérgio Alves da Costa kona ba Jornalista ne’ebe maioria la kontinua estudu iha nível universitáriu

“Kualidade Informasaun, ita hotu sei tau atensaun, SEKOMS sei halo MoU (Memoradum of Understanding) ho Ministériu Edukasaun Ensinu Superior (MEES) ho UNTL, UNITAL no UCT hodi fasilita jornalista senhor sira hodi kontinua estudu iha Universidade sira ne’ebe iha departamentu Komunikasaun Sosial.”Tenik SEKOMS Espedito Loro Dias Ximenes ba partisipante sira iha Salaun Fundasaun Oriente, 07/11/023

Governante ne’e hatutan, sai jornalista ne’e lalos kampu de trabalhu maibe hanesan vokasaun ida hodi servi povu no nasaun ho responsabilidade.

“Ba ha’u, sai jornalista ne’e vokasaun ida, sai jornalista ne’e lalos kampu de trabalhu ida ba ita”. Sublinha Espedito liu husi nia palestra

Iha Fatin hanesan, Magnifiku Reitor UNTL João Soares Martins hateten, UNTL iha Graduadu Komunikasaun Sosial, atu garantia kualidade notisia média sira bele rekruta Graduadu Komunikasaun Sosial

“UNTL iha Graduadu area Komunikasaun Sosial, atu bele garantia kualidade notisia bele rekruta Graduadu Komunikasaun Sosial iha UNTL”. Tenik Reitor UNTL João Soares Martins

Magnifiku Reitor UNTL ne’e mos husu ba finalista sekundariu ne’ebe hakarak kontinua estudu iha UNTL bele konkore liu husi regime espesial no regime oportunidade.

Enkuantu, Semináriu Internasional ne’ebe realiza husi Centro Audiovisual Max Sthal Timor Leste ne’e la’o durante loron tolu (07-09/11/2023), Objektivu husi Semináriu Internasional ne’e hodi komemora ezistensia CAMSTL ba dala XX no rekunesimentu internasio husi UNESCO ba CAMSTL iha Timor Leste.

Jornalista : Marcella Mesquita Lemos