Hadia Kresimentu Ekonómia, SEKoop Asina MoU Ho WVTL

SAPNews TL, Díli – Promove ligasaun merkadu, hodi asegura dezenvolvimentu sustentavel no kresimentu ekonómiku. Sekretariu Estadu Kooperativa (SECoop sigla Portugués) asina Memorandu Entendimentu (MoU) ho parseiru World Vision Timor-Leste (WVTL), hodi haforsa serbisu kooperativa ba komunidade lokál.

Tuir Sekretariu Estadu Kooperativa Arsenio Perreira hateten, haktuir asina, Memorandu Entendimentu (MoU) ne’e importante tebe-tebes atu fornese kapasitasaun hodi haforsa Kooperativa kréditu no agrikola iha Timor-Leste, inklui hametin kooperasaun entre parseiru World Vision Timor-Leste (WVTL) ho SECoop.

“World Vision Timor-Leste (WVTL) no Sekretariu Estadu Kooperativa (SECoop) ho orgullu anunsia asinatura Memorandu Entendimentu (MoU) ida ho objetivu hasa’e kooperasaun hodi fornese kapasitasaun ba kooperativa kréditu no agrikola sira” Dehan Sekretariu Estadu Kooperativa Arsenio Pereira ba Jornalista iha Akait Dili,(24/06/2024).

Nia salienta WVTL suporta ona estabelesimentu kooperativa kréditu no agrikola hamutuk 226 iha Aileu, Baucau, Bobonaro, Ermera, Covalima, Manatuto no Rejiaun Administrativa Espesial Oe-Cusse Ambeno. Grupu sira-ne’e iha kapitál kombinadu ho valór millaun $2.2, Tenik nia.

“Parseria ida-ne’e ho objetivu atu fó kbiit ba kooperativa kréditu no agrikola sira hodi hetan susesu, no atu dudu sira-nia progresu rasik liuhusi fornese rekursu no abilidade sira ne’ebé ita presiza, inklui formasaun pratika, hadi’a jestaun finanseiru, no promove ligasaun merkadu hodi asegura dezenvolvimentu sustentavel no kresimentu ekonómiku iha ita nia rain”.

Entretantu, Diretor Nasional, Jared Berends, hato’o nia agradesimentu ba apoiu ne’ebé firme husi SECoop no subliña importansia husi MoU nu’udar símbolu ba vizaun no forsa konjunta ne’ebé fahe entre WVTL no SECoop atu haforsa komunidade lokál sira, hamenus ki’ak. transforma moris no hari’i futuru ida-ne’ebé prósperu ba Timor-Leste.

“Liu husi memorandu entendimentu ida ne’e, ha’u hakarak hato’o agradesimentu ba Sekretáriu Estadu Kooperativa ne’ebe sai hanesan aparelu estadu nian hodi halo kombinasaun serbisu hamutuk ho organizasaun Word Vision Timor-Leste. Ho objetivu atu hadia programa dezenvolvimentu bazeia ba komunidade iha teritoriu nasionál”.

Diretor Nasional, Jared Berends hatutan, World Vision mak organizasaun ida-neʼebé servisu iha Timor-Leste dezde tinan 1995, oras ne’e hala’o servisu iha Aileu, Baucau, Bobonaro, Covalima, Manatuto, Ermera no Oe- Cusse. WVTL dedika-an atu hadi’a labarik no familia sira nia moris liuhusi programa dezenvolvimentu bazeia ba komunidade.

“Programa pilotu ne’ebe Word Vision Timor-Leste trasa foka liu ba setor Saúde, Edukasaun, no dezenvolvimentu setor, Ekonómiku, iha ita nia nasaun. WVTL servisu atu kria mudansa ba nafatin no hari’i futuru ida-ne’ebé naroman liu ba komunidade sira ne’ebe kriativu”. Nia hakotu

Jornalista : Dircia Baptista Belo & Geronimo da Putificação