Hadia Kualidade Moris ! Regio Deklara Kria Fundu Espesial Ba Ekonomia

Imajem : Presidente Autoridade RAEOA Régio da Cruz iha Oe-Cusse, 24/09/2025

SAP News TL, RAEOA : Hafoin partisipa expozisaun ne’ebe realiza husi OXFAM no MDI, Presidente Autoridade RAEOA Regio da Crus afirma nia parte sei kria fundu espesial ba desenvolvimentu sosial no ekonómiku liu hosi instituisaun finanseira lokal.

“Ita sei kria fundu espesial ida ba desenvolvimentu sosial no dezenvolvimentu ekonómiku, kriteria atu asesu ba fundu investimentu ida ne’e tenke liu husi instituisaun finanseira lokal”.

“Grupu hirak ne’ebe iha Oe-cusse ne’e ita tau grupu ida naran Rai Osan ba Mudansa (Romanse) atu grupu sira impresta osan ne’ebe boot hodi garante sira-nia rezilénsia tanba instituisaun ne’e diak no boot ona”. Hateten Presidente Autoridade RAEOA Régio da Cruz iha Oe-Cusse, (24/09/2025)

Prezidente Autoridade ne’e afirma nia parte sei hari’i sentru finanseiru ba makro, mediu mikro ba uma kain hotu atu bele iha osan hodi investe iha empreza ho rekezitu ne’ebe rigorozu no fo fiar ba kanalizasaun grupu fornesedor sira.

“Ita sei hari’i sentru finanseiru ida ba grupu kiik no mediu sira hodi lori zona ekonomia ida ne’ebe diak ba baze”

PA ne’e konsidera Mata Dalan Institutu (MDI) serbisu ho vizaun ne’ebe diak tebes, nune’e nia parte apresia sira-nia prestasaun servisu.

Tinan ne’e, governu iha programa movimentu empredorizmu Oe-Cusse, iha ne’ebe foku ba atinjimentu indikador progresu, iha parte aspeitu hospitalidade, produtividade no industria ne’ebe oferese kualidade no garantia higiene.

“Ne’e mak prinsipiu poder lokal no dezentralizasaun, empredorizmu tenki iha fuan, husu SEFOPE atu hari’i komisaun rejional ida ba movimentu empredorizmu ne’ebe defini ona zona produsaun sira”.

Movimentu empoderizmu Oe-cusse haree ba produtividade, industria agregadu ba merkadu domestiku, haree mós ba hijiene, benefisiáriu 40% tenki ba feto.

“Industria, hospitalidade no produtividade juventude iha setor privadu sira atu lori lais ita ba iha merkadu ne’ebe haleu ita”.

Iha fatin hanesan, Sekretariu Estadu Formasaun Profisional Empregu (SEFOPE) Rogeiro Araújo Mendonca hatete kada tinan sempre konvida autroridade lokal sira hodi partisipa, programa refere halo hodi identifika joven sira ne’ebe mak partisipa ona formasaun no identifika inan aman sira ne’ebe hakarak hasa’e produsaun iha sira nia suku no aldeia.

“Governu presija identifika katak ema sira ne’e persiza duni apoiu finansiamentu ruma hodi bele suporta sira-nia negosiu, entaun ida ne’e importante tebes hodi governu identifika meius ida hanesan ne’e hodi bele apoiu fila fali grupu sira”.

Planu asaun anual tinan 2026, kada postu tenke aposta programa refere, nune’e sira ne’ebe mak iha postu bele sente katak dezenvolvimentu ne’e la to’o deit iha Munisipiu maibe to’o ba postu.

“Kada grupu ami aloka ba benefisiáriu, ita tau iha $ 4 mill mai kraik, ita haree depende ba proposta, depois hare’e ba fatin no ekipamentus ne’ebe maka sira presija”.

Ligadu ho partisipasaun juventude iha formasaun, governante ne’e orgullu tanba joven sira iha interese hodi tuir formasaun lian no ospitalidade.

“Orgulhu tebes haree joven RAEOA hakarak ba tuir formasaun iha Dili, entaun SEFOPE hamutuk ho Prezidente Autroridade RAEOA hodi halo investimentu, nune’e joven sira bele tuir iha Oe-Cusse, karik laiha mak sira tun ba Dili”.