Hadia Povu Nia Moris ! MDRHC Lansa Atividade Ekonomia Produtiva Iha Bazartete
Imajem : Vise Primeiru Ministru, Ministru Dezenvolvimentu Rural & Habitasaun Comunitáriu (VPM-MDRHC), Mariano Assanami Sabino iha Likisa, 06/12/2024.
SAPNewsTL, Likisa — Vise Primeiru Ministru, Ministru Koordenadór Assuntu Sosiál no Ministru Dezenvolvimentu Rurál no Abitasaun Komunitaria, Mariano Assanami Sabino, Lansa Atividade Ekonomikus Produtivus Interagradu Iha Area Rural Aldeia Mota-Ain Suku Mota-Ulun, Postu Administrativu Bazartete Munisípiu Liquiça.
Vice-Primeiru Ministru (V-PM) Mariano Assanami Sabino informa Aldeia Mota-Ain definitivu ba implementa revitalitazasaun aldeia kona-ba programa integradu Peskas, Haki’ak Ikan-Nila, Ikan-Lele, Ikan-Salmaun.
“Iha ne’e revitalitazasaun aldeia, programa integradu peskas, haki’ak ikan-nila, ikan-lele, ikan-salmaun, lansamentu ida ne’e importante halo mudansa ba mentalidade, oinsa fiar a’an para hamrik iha ita nian ain leten, uza ita nia potensia rasik ho atividade ekonomikus produtivus interagradu, inklui dezenvolve fatin turistiku sira iha postu ne’e”. Dehan Vice-Primeiru Mariano Assanami Sabino, iha Aldeia Mota-Ain, Sabadu (07/12/2024)
Nia salienta, Partidu oioin no artemasiais oioin oinsa mak atu bele hamutuk iha ida de’it, bele iha artemasiais, religiaun, organizasaun no mós multikulturais importante, maibe presiza integra atividade produtiva, oinsa mak sira bele iha rendimentu, individu ne’ebé iha grupu laran atu bele dezenvolve kooperativa sira ne’ebe iha komunidade nia le’et.
“Entaun, iha ne’e Centru Dezenvolvimentu Aldeia (CDA) kooperativa produtivu, kria mikro kreditu, oinsa halo jestaun integradu iha ne’e, inklui planu estratéjiku ba futuru, hari’i salaun multifunsaun sira, aldeia sei kontrola no halo jestaun iha ne’e bazeia ba orsamentu ne’ebe governu aloka”.
Kria Ministeiru Dezenvolvimentu Rural tanba hafoin tinan barak ukun an kampu servisu kontinua laiha, malnutrisaun aumenta, produsaun la sa’e, no ki’ak barak, nune’e ministeriu ne’e muda mentalidade komunidade hahu husi baze hodi hametin soberania alimentar, kria kampu servisu no hasa’e rendimentu iha rural.
“Ministeriu rural ne’e mai atu ita servisu hamutuk no kompleta malu hodi hamenus kiak. malnutrisaun no kria a kampu servisu, hasa’e produsaun iha rural, haki’ak saida mak ita han no han saida mak ita kuda, nune’e ita labele dependente ba hahan husi liur”. Assanami sublinha
Governante ne’e hatutan, Ministeriu ne’e mosu hodi hametin liutan identidade timoroan nian, oinsa moris nu’udar timoroan ne’ebe ho identidade rasik.
“Iha dimensaun lima importante mak ita hatur hosi aldeia mak sa’e ba hanesan dimensaun sosial (moris saudavel, iha kampu servisu no asesu ba edukasaun, saude agrikultura, no turismu), politika (multirelijiaun, organizasaun oioin, partidu oioin ne’e laos atu haketak maibe hamutuk iha diversidade no demokrasia), kultural (sosiedade sivilizadu, saudavel, demokratiku), ekonomia (hetan rendimentu diak, asesu merkadu, moris diak) no identidade nasional (karater no hanoin oinsa). Nia afirma
Tuir Assanami orsamentu ne’ebé aloka ba programa refere ho total $50 mill ne’ebe sei utiliza ba periodu tinan 2024, nune’e parte Governu sei halo monitorizasaun hodi avalia progresu implementasaun no haree rezultadu husi programa ne’ebe implementa iha lokal implementasaun sira, inklui observa produtu sira ne’ebe mak komunidade sira fa’an, nune’e estadu kontinua apoiu hodi nafatin promove ninia prinsipiu.
“Ita tau osan $50.000, ita sei aumenta hodi hasa’e rendimentu ba komunidade sira iha ne’e, haki’ak animal, kuda produtu sira ne’ebe ita han, aldeia tenki sai sentru ne’ebe halo ema kontente, ita tenki produtivu, rai labele abandona deit ka fa.an tiha tanba ita nia oan sira nia futuru presiza rai, ita presiza uza potensia ne’ebe ita iha”.
Enkuantu, aldeia refere sei halo kolam ba ikan lele, boek no ikan sira seluk, halo restaurante no transforma ba sitiu turistiku, nune’e bele hadia povu nia moris hahu husi aldeia, suku, postu no munisipiu.
Serimonia lansamentu ne’e partisipa hosi Sekretariu Estadu Peskas, Prezidente Autoridade Munisipiu Likisa, Parte Seguransa PNTL, no komunidade sira.
Jornalista : Conzita Mota