Hametin Lasu Global ! Parlamentu Nasionál Autoriza Vizita PR Horta Ba Ucrânia

Imajem : Parlamentu Nasional autoriza Presidente Repúblika José Ramos Horta kona-ba vizita ofisial ba Ucrânia, Dili, 03/09/2025.

SAPNewsTL, Dili : Parlamentu Nasionál (PN), liu husi reuniaun plenária extraordinária komisaun permanente autoriza dezlokasaun ba vizita ofisial Prezidente Repúblika José Ramos Horta ba Ucrânia, entre loron 10 to’o 11 fulan setembru 2025.

Tuir publikasaun Média Parlamentu Nasional haktuir katak Plenária extraordináriu PN iha loron 03 fulan setembru tinan 2025, autoriza dezlokasaun ba vizita ofisial Prezidente Repúblika ba Ucrânia, entre loron 10 to’o 11 fulan setembru 2025.

Aprovasaun ne’e “ho votus a favor 9, kontra 0 no abstensaun 0. Deslokasaun ofisial ida ne’e hodi partisipa iha konferénsia ho tema “Education Shaping the world”. Sita Média Parlamentu Nasional iha loron 03/09/2025.

Simeira internasionál iha Kiev oferese oportunidade úniku ida atu hametin lasu globál sira iha edukasaun, promove troka koñesimentu sira no parseria estratéjiku sira ba benefísiu dezenvolvimentu umanu no sosiál.

Nune’e, Prezidente Repúblika sei auzente iha Timor-Leste entre loron 5 no 13 fulan-setembru tinan 2025.

Reuniaun plenária ne’ebé hahu ho exekusaun Hino Nasionál no minutu ida hakmatek ne’e prezide husi Prezidente Parlamentu Nasionál exersisiu, Alexandrino Afonso Nunes no deputadu hamutuk na’in 8.