Hapara Atanásio Iha Dalan, Grupu Rua Tuda To’o Balun Hetan Kanek
Imajem : Vítima Atanásio da Conceição iha Kampung Baru, Comoro,18/03/2026.
SAPNewsTL, Díli : Akontese insidente (konflitu) iha área Kampung Baru, Suku Comoro, postu administrativu Dom Aleixo (tuku 7:00) rezulta ema na’in 4 husi parte vítima hetan kanek iha ain, liman, kotuk laran no oin tanba hetan tuda no baku ho besi-kanu.
Vítima Atanásio da Conceição informa nia fila hosi ense mina ba motor mak hetan hapara husi ema balun iha Bairo laran no baku nia ulun, nune’e nia hato’o ba família hodi ba konfirma to’o baku malu no hetan kanek.
“Ha’u ho motor ba ense mina iha pertamina, fila mai, mane ida hamrik iha estrada klaran modelu hanesan abuza, entaun ha’u lori motor ba kedas estrada ninin, nia hamrik kedas iha motor oin entaun ha’u trava, hotu nia baku ha’u nia ulun”.
“Hafoin ida ne’e, ha’u mai kedas uma ho alin mane nain rua ba ami baku malu, hotu ami dame kedas iha ne’eba, hafoin ida ne’e ami la’o ba uma nia bolu tan hodi dehan “hoi, aban ami sei baku o”.Informa Vítima Atanásio da Conceição ba Sapnews Pro iha Kampung Baru, Comoro, 18/03/2026
Atanásio hatutan, “Hotu ida ne’e ami nain tolu mai uma no bolu hau-nia maun no alin sira hodi ba rezolve, maibe, maun to’o ba husu “se mak baku hau nia alin”, entaun nia dehan “ha’u mak baku”.
“Tanba nervozu entaun maun sira baku malu no sira baku ami ho besikanu no uza fatuk tuda kona ha’u-nia apa nia ain to’o kanek, ami-nain haat hetan hotu kanek”. Nia informa
Autor ne’ebe halo uluk agresaun fiziku hasoru vítima ho família ne’e mós balun hetan kanek, nune’e Sapnews Pro tenta atu halo komfirmasaun ho sira maibe seidauk konsege tanba kalan ona.
Entretantu, hafoin akontesimentu ne’e viziñu telefone kedas Polícia Esquadra Dom Aleixo no família ba kedas kantor polisia maibe to’o agora Polícia Nasional Timor-Leste (PNTL) Dom Aleixo seidauk to’o iha fatin akontesimentu.
