Hatan Ba Deklarasaun Deputada Olinda ! Zeka Ameasa Hasai Estudante Husi Eskola
Imajem : Adjuntu Eskola Colégio São João Paulo II Bedois, Zeka M.X. Salsinha hala’o konferénsia imprensa iha Bedois, 04/06/2025. Foto : Dircia Baptista Belo
SAPNewsTL, Dili : Estrutura Eskola Ensino Secundário Geral Colégio São João Paulo II realiza komunikadu imprensa hodi lamenta deklarasaun Deputada Olinda Guterres kona-ba manorin balu halo kobransa ilegal ba estudante sira, nune’e estrutura eskola lamenta no ameasa hasai estudante husi eskola.
Ekipa Kobertura – SAPNews
Porta voz, Hermenegildo Soares Andrade hateten deklarasaun ne’ebe Deputada Olinda Guterres fo sai katak manorin halo kobransa ilegal ne’e falsu.
“Deklarasaun distinta Deputada Olinda Guterres, iha loron 2 fulan Junhu tinan 2025 iha Uma Fukun Parlamentu Nasional ne’ebe hateten iha profesores balu halo kobransa ilegal ba Estudante iha Eskola Colégio São João Paulo II Bedois, ho osan montante 20 dolar ba kada estudante husi 10º ano to 12°, informasaun ne’e lalos”. Dehan porta voz Hermenegildo Soares Andrade iha Bedois, 04/06/2025
“Ami nu’udar profesor husi Ensino Secundário Geral Colégio São João Paulo II, Bedois kontra ba Distinta Deputada Sra. Olinda Guterres tanba halo deklarasaun falsu ida ba públiku, bazeia ba asuntu ne’ebe Deputada levanta la bazeia ba regulamentu internu husi eskola Ensino Secundário Geral Colégio São João Paulo II, Bedois tuir mata dalan katak alunu labele lori telefone mai eskola no profesor hetan sei entrega ba alunu nia inan no aman iha fim do ano”.
“Ami dúvida ho distinta deputada ne’ebe ko’alia liu asuntu ba nia familia (bei oan) iha reuniaun plenaria nasional, tuir los iha problema nasional balu ne’ebe mais importante liu atu parlamentu Nasional atu diskute, ami profesor sira lamenta ho distinta deputada Olinda Guterres nia kapasidade atu distingue problema nasional, problema familiar no problema regulamentu interna eskola nian”. Nia sublinha
Iha fatin hanesan, Adjuntu Eskola Colégio São João Paulo II Bedois, Zeka M.X. Salsinha ameasa eskola sei hasai alunu refere wainhira la klarifika iha loron tolu nia laran.
“Eskola iha regulamentu, sira rasik mak lori osan mai fo ami, iha ona karta para hapara naran ida fo 20 dolar ne’e iha eskola Sekundária Bedois, iha ne’e la akontese buat ne’e, ami-nia sansaun eskola mak hanesan ne’e, loron tolu la klarifika hasai husi eskola”. Dehan Diretor Adjuntu Zeka M.X. Salsinha
Hafoin notísia publika, Mídia Sapnews seidauk halo komfirmasaun ho parte Deputadu Olinda Guterres no estudante sira ne’ebe deskonfia vítima ba konbransa ilegal.