HNGV : Selebra Loron Mundial Ba Ema Moras, “Hadomi Hodi Tahan Ema Seluk Nia Terus”
Imajem : Vise-Ministru Flávio Brandão iha HNGV, 11/02/2025.
SAPNewsTL, Díli – Hospital Nacional Guido Valadares (HNGV) selebra Loron Mundial ba Ema Moras ba dala XXXIV hamutuk ho loron padroeira Nossa Senhora de Lourdes, ho tema: “Ema Samaria nia laran luak: Hadomi hodi tahan ema seluk nia terus” (Lc. 10:25-37).
Vise-Ministru Saúde ba Operasionalizasaun Ospitál (VMSOO), Flávio Brandão Mendes de Araújo, hateten, selebrasaun ne’e la’os deit seremónia, maibé mos momentu reflesaun ba pessoál saúde sira atu hadi’a liu tan servisu no prestasaun ba pasiente sira.
“Ohin, ita hotu iha fatin ida ne’e hodi selebra loron Mundial ba Ema moras. Ne’e la’os deit selebrasaun, maibé momentu reflesaun ida ba ami hotu oinsa atu halo diak liu tan ami nia servisu no prestasaun sira,” dehan Vise-Ministru Flávio Brandão liu husi nia diskursu iha HNGV, quarta-Feira, 11/02/2025.
Nia akresenta, tratamentu saúde la’os depende de’it ba ekipamentu médiku no ai-moruk, maibé mos presiza domin hanesan forsa ida ne’ebé importante iha prosesu kura moras.
“Laos uza deit ekipamentu mediku, Ai-moruk, maibe oinsa maka pesoal saúde sira hotu reflekta karakter domin hodi fo energia domin ne’ebe fo moris no ajuda pasiente sira. Iha momentu hanesan ne’e lori ita atu hare’e katak ita idak-idak halo servisu, ita fo duni enerjia domin ba ita-nia pasiente ka lae?”
“Ita hotu-hotu tenke radiasaun enerjia foun para ita bele rezulta timoroan ne’ebe hanoin no hahalok saudável. Se enerjia hirus, odiu no vingansa maka barak iha ita, entaun laiha ona espasu ba domin”. Nia Subliña
Tuir nia, mensajen bíblia kona-ba hadomi hodi tahan ema seluk nia terus fó inspirasaun ba pesoál saúde sira atu servisu ho laran luak.
“Ohin ha’u tuur lee hela buat ida hakerek dehan hadomi hodi tahan ema seluk nia terus, mensajen ida forte tebes neébé foti husi biblia. Biblia fo hela mensajen ba ita katak domin ka hadomi ne’e meius tratamentu ida, enerjia domin ne’e modalidade tratamentu boot ida”.Nia Salienta.
Nia mos husu pesoál saúde sira atu hametin valor pozitivu sira iha fatin servisu, tanba se laran prenxe ho odiu no sentimentu negativu, sei difísil atu kria ambiente ne’ebé fó pasiente sira konfiansa no hakmatek.
Iha fatin hanesan, pasiente Leorinda Deolinda Pintu fo agradese ba mediku no enfermeiru sira iha HNGV ne’ebé fó tratamentu di’ak no simu pasiente sira ho laran luak.
“Ami agradese ba ita-boot sira hotu ne’ebé servisu hamutuk hodi tau matan ba ami. Ami la sente katak ami mesak, tanba husi tempu primeiru mai to’o iha ospitál ne’e, ami sente hanesan iha uma rasik,” dehan Leorinda.
Nia hatutan, atensaun no maneira atendimentu pesoál saúde sira halo pasiente sente katak sira la’os de’it hetan tratamentu médiku, maibé mos hetan domin durante prosesu kurativu.
“Ita-boot sira-nia maneira atu atende ami, molok fó ai-moruk ne’e ami sente ona katak imi hadomi duni ami no ami la sente mesak katak ami parte ida husi imi nia moris”. Nia informa
