“Imi Sei Hadomi Malu Nu’udar Ha’u Hadomi Imi”

SAPNewsTL, RAEOA : Padre Administrador Parokia Nossa Senhora do Rosário de Oe-Cusse Júlio do Carmo konsidera kinta-feira nu’udar símbolu atu ema hatudu hahalok haraik-an hodi servi iha nia knar sira hotu no hadomi malu.

Liafuan maromak nian mak matadalan ba moris rohan laek ba ema fiar nain sira. Ema nebe moris ho roman liafuan Maromak nian sei hatudu hahalok haraik-an hodi servi iha nia knar sira hotu nebe nia assume nudar ema fiar nain.

Ukunfuan foun Maromak nian ba ema fiar nain sira mak hadomi malu. Basá Maromak hadomi ona ita, tan ne’e mak haruka nia oan mane mesak mai hodi saran nian-an hodi mate iha Kruz ba umanidade tomak. Han kalan ikus hamutuk ho apostolo sira mak acontecimento unico ema ho Maromak. Iha nebe Maromak fo nia isin rasik, sai aihan moris rohan laek ba ema fiar nain sira.

Ema fiar nain sira nebe fiel ba Maromak nia liafuan hodi moris tuir, Maromak sei transforma sira nia isin lolon sai horik fatin kmook, hodi transmite grassa Maromak nian ba ema seluk.

Iha triduo pascal ita celebra evento boot importante tolu, jesus han kalan ikus, no fase apostolo sira ain. 2. Paixao do senhor ka Jesus nia terus, 3. vigilia pascal ka sabado santa.

Iha han kalan ikus nian, Jesus ho nia apostolo sira, Jesus demostra ba nia apostolo sira, hahalok importante ida, mak haraik-an hodi servi ho domin. Haraik-an mak xave ba amizade fraternal nian, katak fo an ba malu hodi servi malu iha domin ida deit ba malu.

Ho hahalok ida, Ikus mai forma iha ema nia-an sai ema nebe lolos ba ema seluk (to be man and woman for others). Sai ema lolos ba ema seluk, individuo ida-idak preciza kunhese didiak ninia-an rasik, liu-liu ninia arogansia sira nebe bloqueia ka taka dalan ba vontade diak hodi kria relasaun fraterna ho ema seluk.

Jesus mai ho doutrina foun hodi sobu hahalok arogancia sira nebe moris buras iha ema nia fuan ho hahalok haraik-an hodi servi ho domin iha knar sira hotu, jesus nebe husik hela nía unuk hodi tun ba fase apostolo sira nia ain, hatudu domin laran luak maromak nian, nebe husik hela nia trono iha leten aas ba, hodi tun mai mundo, hodi servi nia emar sira, to’o ikus saran nia-an ba mate, hodi haraik hela nia isin no nia ran ba nia emar sira iha eucaristia santa, hodi hameno hela ba nia apostolo sira” halo ida ne’e hodi hanoin ha:u”.

Eucaristia mak sacramento domin nian, iha nebe ema fiar nain sira halibur hamotuk, hodi partilha domin maromak nian ba malu, fo-an ba malu hodi servi malu. Servi malu katak rona malu, hodi kompriende ba malu, hodi tetu hamutuk buat nebe diak ba ema nia moris diak.

Servidor nasaun nian, buka atu rona didiak ba povo sira nia halerik, no buka atu kompriende, tanba sa sira halerik ? Iha buat ruma la los karik, se ita ukun los no diak karik, tanba sa povo sira halerik nafatin ? Buka dalan ho matenek tomak atu fo solusaun nebe justu ba halerik sira povo nian.

Ba povo sira, nudar cidadaun nebe diak, laos egizi deit ita nia direito, maibe ha’u nia obrigasaun nudar cidadaun ida hau cumpri ka lae, no buat diak sa mak hau halo ba nasaun. Cidadaun nebe diak, buka atu uza nia matenek tomak hodi kontribui ba diak nasaun nian, hahu kedas iha ninia familia.

Familia nebe fiel ba ninia comprimisso matrimonial, nia sei sai servidor ida nebe diak iha sosiedade nia leet, basa iha familia nia laran, mak nia aprende oinsa sai aman ka inan ida nebe diak ba oan sira nia moris diak.

Familia Cristaun, buka atu sai modello cristo nian iha moris lorloron nian. Cristo nebe saran nia-an ba nia povo sira, nune mos kaben mane sira iha familia, buka atu saran-an tomak ba familia nia moris diak.

Jesus nia han kalan ikus ho nia apostolo sira, mak husik hela ba mundu sacramento de uniaun iha nebe Maromak ho ninia povo sai uniaun ida deit iha domin nia laran. Jesus nebe haraik hela ninia isin no ran ba nia apostolo sira iha ilas pao no tua nudar aliansa foun nebe kesi metin ema ho Maromak, ema ho Maromak sai ida deit.

Tanba ne’e mak saun Paolo koalia ba sarani sira iha korinto dehan,” imi nia isin lolon mak templo horik fatin Maromak nian” (1 Cor 3,16) Maromak nebe fo nia isin no ran completo mai ita iha eucaristia santa, halo ita sai ida deit ho Maromak. Nudar orasaun de uniaun Cristo nian ba aman Maromak,” aman hau harohan atu sira sai ida deit hanesan hau ho ita ida deit”.

Bainhira los mak ema hotu sai uniaun ida deit ho Maromak hodi reconhece katak Jesus Cristo deit mak dalan, lialos no moris.

Reliagiaun hotu-hotu haklaken ka hanorin kona ba dalan ba Maromak ho sira ida-idak nia doutrina, no maneira oinsa moris iha sira nia religiaun tuir fiar nebe sira iha ba Maromak. Religiaun hotu-hotu, haklaken no hanorin ba nia emar sira kona ba lia los ka kebenaran.

Reliagiaun hotu-hotu hanorin no haklaken ba nia emar sira oinsa mak mak bele hetan moris nebe diak iha felicidade nia laran. Buat hotu-hotu centro iha nai Jesus Cristo, maske religiaun sira seluk la reconhece Cristo nudar Maromak tuir sira nia doutrina hanorin, maibe hala’o hela lalaok sira hotu Jesus Cristo nian iha sira nia hanorin sira.

Urgulho sai ema Cristão, hatudu modello cristo nian iha sociedade nia leet, no cristo nia hanorin sira tenke sai ita nia cultura diak nebe tenke metin no buras iha ita hotu nia fuan husi gerasaun ba gerasaun. Jesus la husu buat barak husi ita atu fo ba nia, maibe nia hakarak atu ita hadomi malu, nudar nia hadomi ita, ida ne mak tenke sai identidade ema fiar nain catolico nebe los, liu-liu nudar ema timor oan nebe metin iha nia lisan no kultura respeita malu no hadomi malu.

Maromak nia mandamento ka ukun fuan mak sai mata dalan ba moris diak ema fiar nain sira hotu nian. Jesus mai lori roman foun ba ema hotu, atu hetan salvasaun husi nakukun mundo nian nebe mai hafalun ema ho hahalok foti-an no loko-an nebe ikus mai kria separasaun ba malu iha moris sociedade nian.

Jesus hatudu dalan ba ema hotu, atu moris iha domin nia laran, nudar nia rasik hanorin hela mai ita ema fiar nain sira atu moris tuir, mak hahalok de servi. Oferece-an ba ema seluk nia diak, mak ema Cristaun nia character.

Maibe infelizmente ema barak mak seidauk hatudu character ema cristaun nebe lolos, ema fingidu mak barak, iha oin hatudu ema Cristaun, maibe iha kotuk hatudu hahalok gentio nian, katak la hatudu domin ba maun alin sira.

Liafuan no hahalok traisaun sei moris buras hela iha sociedade nia let, cria grupo sira hodi hatun malu, liu-liu grupo partidos politicos, nebe mai sobu uniaun povo nian, ho ida-idak nia ideología nebe la hanesan hodi lori duvida ba povo sira. La hatene ida nebe mak diak liu hodi servi povo, tanba hotu-hotu mai ho comprimisso falsas sira, nebe lori esperansa falso ba povo sira.

Cristo mak sai modelu fiar nain sira hotu nian, nia hanorin ita atu sai servidor nebe diak, nakonu ho domin ba ita maun alin sira, nia nebe fo nia isin no ran mai ita iha eucaristia santa, ita mos sacrifica ita nia-an nudar ema fiar nain, hodi dedica ita nia an ho domin ba ita maun alin sira iha ita nia knar de servi.

Jornalista : Ekipa Kobertura