IX Governu Foku Ba Dezenvolvimentu Infraestrutura, Saúde & Edukasaun
Imajem : Prezidente Repúblika José Ramos Horta & Primeiru Ministru Kayrala Xanana Gusmão iha Palasiu Presidensial Aitarak-Klaran, 13/02/2025. Foto : Média PR
SAPNews TL Díli : Hafoin remata enkontru semanal ho Prezidente Republika (PR) Jose Ramos Horta, Primeiru Ministru (PM) Kayrala Xanana Gusmão hateten IX Governu Konstitusional sei define setor tolu (3) sai prioridade ba dezenvolvimentu hodi benefisia povu.
Xefe Governu Kay Rala Xanana Gusmão afirma governu sei tau prioridade ba setor esensial tolu (3) hanesan Infrastrutura, Saude no Edukasaun hodi benefisia povu.
“IX Governu sei tau prioridade ba dezenvolvimentu setor importante sira hanesan Infrastrutura, Saude no Edukasaun sai baze ba dezenvolvimentu iha territóriu nasionál. Konsellu Ministru haree problema kona ba dezenvolvimentu ba ita nia rai, IX Governu define katak setor tolu ne’e sai baze ba Dezenvolvimentu”. Dehan PM Xanana Gusmão, hafoin remata enkotru semanal ho Prezidente Republika (PR) José Ramos Horta iha Palasiu Presidensial Aitarak-laran, kinta 13/02/2035.
PM Xanana argumenta, planu prioridade ba tinan 2025, Governu sei reforsa implementasaun servisu iha munisipiu hodi haree didiak no kurizi planeamentu dezenvolvimentu ba periodu 2026
“Buat ne’ebe besik iha ita nia uma sira ne’e mak ita dehan urjente, buat ne’ebe dook mak populasaun nia leet ne’eba ita mos la’o tuir planu sira hodi fortifika no avalia serbisu sira iha munisipiu, laos programa sira sentraliza deit iha kapital Dili.” PM Xanana salienta.
Xefe Governu afirma, IX Governu sei servisu hamutuk ho xefe suku no Administrador munisipiu sira hodi halo planeamentu no dezenvolvimentu iha kada munisipiu.
“Kuandu governu lokal sira bele dezenvolve, hodi haree no tau prioridade hodi hamosu ideia foun, hodi hanorin Administrador no xefe suku iha kada postu administrativu atu hadia estrada, eletrisidade to’o iha area rurais no presiza mos iha mediku sira atu halo tratamentu ba komunidade sira iha area remotas”.
Primeiru-Ministru Kay Rala Xanana Gusmão mos hato’o ba Prezidenti Republika José Ramos Horta kona-ba viajen lokal ne’ebe sei hala’o ba iha Reziaun Administrativu Espesial Oe-cusse Ambenu (RAEOA).
“Semana ne’e, ha’u sei ba diskute ho Atoni sira hodi diskute ho presidente autoridade RAEOA ne’ebe responsavel ba dezenvolvimentu , tanba ZEEMS lolos ne’e dehan katak Governu lokal, ita temi rai refere nia oan mak kaer, ha’u husi manatutu ha’u labele ba kaer fali Governu lokal iha Aileu”. nia
Entretantu, kona-ba fundu minarai ne’ebe sei mohu iha tinan 2035 ligadu ho ezekusaun governante sira nian, lider nasional ne’e komfirma katak nia parte hatene hela.
Jornalista : Vinsensius Saldanha Morais De Araujo
