Kazu Na’ok Motor & Telefone ! PNTL Sei Kaer Na’in Ba Ofisina Ne’ebe Modifika

SAPNewsTL, Dili – Relasiona ho kazu motor lakon no na’ok motor iha teritóriu Nasionál, Polísia Nasionál Timor-Leste (PNTL), Departamentu Investigasaun Kriminál Nasionál (DIKN) sei halo operasaun hodi identifika bengkel (ofisina) hirak ne’ebé durante modifika motor naok hodi submete ba prosesu.

Komandante Departamentu Investigasaun Kriminál Nasionál (DIKN) Superintendente Polisia João Belo dos Reis hateten, Polísia sei halo operasaun hodi identifika bengkel sira ne’ebé durante ne’e modifika motor hodi submete ba prosesu.

“Parte Polísia investigasaun kriminal nafatin halo operasaun buka tuir grupu no individu sira ne’ebé durante ne’e naok motor ho Telefone no sasán iha Teritoriu Timor-Leste”.

“Ita nia servisu informasaun detekta, depois aprezenta mai parte departamentu investigasaun kriminal rasik halo operasaun hamutuk ho ita nia parseiru sira atu halo atuasaun ba krimi ne’ebé mak akontese iha dalan estrada públiku ita bele hapara ka hamenus,” Dehan Komandante Departamentu Investigasaun Kriminál Nasionál (DIKN) Superintendente Polisia João Belo dos Reis iha Kuartel Jerál PNTL Kaikoli (11/06/2024).

Nia dehan kazu naok ne’ebé durante ne’e akontese, polísia Alerta ba inan aman sira atu eduka oan sira, tanba oan sira la’o livre latama uma sira kaer telefone no kaer motor sira depois inan aman sira la hase sasan sira ne’e mai husi ne’ebé mak oan sira uza.

Nia Dehan aktu krime sira atu reduz, kontribuisaun husi inan aman nian hola parte edukasaun nian ida ne’e importante, kuandu inan aman rasik la eduka, maibe husik nafatin laiha informasaun ba polisia ida ne’e oan sira kontribui ona ba krime.

“Kazu sira ne’e akontese maioria aksaun ne’e individual, maibé balun mos ita identifika aksaun organizadu, ita sei buka tuir bengkel sira ne’ebé mak modifika motor nauk sira no loja sira ne’ebé mak hadia telefone naok. Depois ita sei buka tuir responsabiliza sira nia aktus ne’ebé sira halo tanba ida ne’e kontribui hotu ba situasaun krimi iha dalan públiku,” informa nia.

Aleinde ne’e, Polísia mós sei buka tuir ema sira ne’ebe produz xave motor hodi fasilita malu naok motor sira iha Dili laran no iha Munisípiu sira, bainhira identifika hetan sira sei resposavel ba aktu ne’ebé komete.

“Ita sei lansa operasaun, buka tuir hotu atu identifika ema sira ne’ebé envolve produz xave motor, ita sei prosesu tuir lei ne’ebé vigóra iha Timor-Leste”. Nia afirma.

Enkuantu, tuir dadus balun ne’ebe SAPNews asesu durante ne’e kona ba kazu motor lakon, telefone lakon, laptop lakon, sasan lakon ne’e akontese ona iha Munisipiu sira, kazu hirak ne’e maioria akontese iha Munisipiu Dili inklui kazu hadau telefone iha motor leten ne’ebe mosu iha Praia dos Coceiros Pantai Kelapa hodi rezulta labarik feto ida lakon vida tanba monu husi motor.

Jornalista : Ermelinda Soares