Kondisaun Santu Padre Di’ak Uituan ! Papa Francisco Agradese Ba Povu Nia Orasaun
Imajem : Santu Padre Papa Francisco.
SAPNewsTL : Kondisaun saúde husi Santu Padre ne’ebé krítiku iha Ospitál Gamelli Roma durante loron sanulu hahú diak uituan, tan ne’e Papa Francisco agradese ba povu tomak nia orasaun.
Tuir komunikadu ne’ebé SAPNews asesu liu hosi Vatican News katak kondisaun klínika Papa Francisco ne’ebé iha estadu krítiku hahú diak uitaun.
“Kondisaun klínika Santu Padre ne’ebé ho kondisaun krítika, hatudu diak uitoan, Ohin mós laiha epizódiu sira krize respiratóriu asmátiku nian; no teste laboratóriu balun hatudu melloria”.Sita Vatican News iha loron, 24/02/2025. Boletim loraik Vatican News
Imajem : Komunikadu hosi Vatican News
“Monitorizasaun ba insufisiénsia kmaan moras rins la’ós ona preokupasaun ida. Terapia ho oksijéniu kontinua, maski ho fluxu no persentajen oksijéniu ne’ebé redús uitoan”.
Iha loron 24 Fevereiru dader, Papa Francisco simu eukaristia, loraik hahú ninia servisu, iha oras kalan nia telefone ba pároku Gaza hodi expresa ninia proximidade.
“Iha dadeer, nia simu Eukaristia, iha lokraik, nia retoma fali ninia atividade serbisu. Iha kalan, nia telefone Pároku Parókia Gaza nian hodi espresa nia proximidade paterna”.
Tuir mai, “Papa Francisco agradese Maromak nia povu tomak ne’ebé halibur iha loron hirak ne’e hodi reza ba ninia saúde”.
“Kalan ne’e Papa Francisco hakmatek, toba no mantein ninia deskansa”. Sita komunikadu sala imprensa Santa Sé, 24/02/2025
To’o ohin loron, Santu Padre internadu iha Ospital Gamelli, Roma kompleta ona loron sanulu (10) tanba sofre moras respiratóriu asmátika.
Mai ita hotu kontinua reza ba Amu-Papa ninia saúde, atensaun no evita informasaun falsu sira ne’ebé nitizen balun fo sai iha kanal sosial média sira, informasaun klaru kona-ba Papa Francisco bele asesu liu hosi Média Vatican News.
Jornalista : Sérgio Delekuar
