Konsidera Sai Inimigu Ba Governu ! Mouris Resigna & Husu Deskulpa Ba Públiku

Imajem : Eis PAM-Dili Grigorio da Cunha Saldanha Mouris iha Matadoru,28/01/2025

SAPNewsTL, Dili : Grigorio Saldanha Mouris deside resigna an husi kargu Prezidente Autoridade Munisipál Dili (PAM-Dili) tanba kauza hosi irregularidade administrativu no falta autonomia nu’udar PAM-Dili hafoin kaer kargu durante besik tinan 1 (01/03/2024-28/01/2025).

Tuir komunikadu ne’ebé SAP News TL liu hosi Ministériu Administrasaun Estatál (MAE) katak MAE realiza ona serimónia termu entrega kna’ar no funsaun hanesan Prezidente Autoridade Munisipiu Dili, tuir karta rezignasaun ne’ebé apresenta hosi PAM sesante, Grigorio Saldanha Mouris.

Serimónia termu entrega refere realiza bazeia ba karta aprezenta pedidu renúnsia kargu Prezidente Autoridade Munisipal Dili, tanba situasaun kritiku sira iha Autoridade Munisipal Dili, hanesan :

1. “Intensaun atu transfere Unidade Jestaun Projetu (PMU) husi Autoridade Munisípiu Dili (AMD) ba Ministériu Administrasaun Estatál (MAE) tau iha risku fiskalizasaun tékniku servisu limpeza urbana iha Dili, nomeadamente jestaun solidu munisipal lixu (MSW) no rekolla lixu manuál, tanba AMD depende krusialmente ba sira-nia apoiu”;
2. “Prolongamentu kontratu ba empreza limpeza urbana husi MAE, sem komunikasaun previa ho Autoridade Munisipiu Dili, maske empreza hirak ne’e ida tama iha “lista metan” iha Autoridade Munisipal Dili (AMD) tanba desobediénsia no abandona kna’ar durante semana ida”.

3. “Maske AMD nian atu hadi’a dezempeñu empreza limpeza sira nian, inklui akizisaun veíkulu foun sira hodi transporta lixu, no preparasaun prosesu selesaun foun ba tinan 2025, desizaun sira ne’ebé MAE halo kompromete ami-nia esforsu sira”.

4. “Hasai autoridade AMD nian kona-ba GMT (Jestaun Merkadu no Turizmu). Uluk iha ámbitu SEATOU nian, hamosu ona problema sira. Iha jestaun SEATOU nian, GMT hala’o aktu violénsia no na’ok hasoru vendedór ambulante sira no rezidente sira, lahó koñesimentu ka kontrolu hosi AMD, hodi hamosu atribuisaun responsabilidade sira ne’ebé la justu ba nia”.

5. “Nu’udar sidadaun, veteranu no PMA, Ha’u deklara Ha’u-nia opozisaun maka’as ba despeju no espulsaun rezidente no vendedór ambulante sira sein kria kondisaun mínimu, liuliu iha tempu udan, maski sira okupa espasu públiku sira. Ha’u konsidera prátika ida-ne’e hanesan kustu boot tebetebes ba povu Timor-Leste, ne’ebé, maski durante okupasaun Indonézia, kontribui ho desizivu ba luta ba independénsia”.

Bazeia kestaun hirak temi iha leten, Grigorio Saldanha Mouris deklara katak :

1. “Iha ha’u-nia pozisaun nu’udar PAM, falta autonomia administrativa, tanba AMD nia dependénsia maka’as ba MAE, impede Ha’u atu asegura preparasaun nesesária ba desentralizasaun governu lokál, hanesan estabelese husi polítika IX Governu Konstitusionál”.
2. “Ha’u-nia preokupasaun mak ema konsidera nu’udar adversáriu ka inimigu husi polítiku ba IX Governu”.

3. “Dezde Ha’u simu pose, Ha’u ho Ha’u-nia ekipa servisu hodi hadi’a AMD, kombate indisipliña, korrupsaun, nepotizmu no prátika familiár, tuir kompromisu sira husi Governu Konstitusional da-sia, maibé infelizmente, obstákulu sira ne’ebé ami hasoru”.

4. “Maibé, esforsu atu halo auditoria (daudaun ne’e la’o daudaun) bele hamosu konflitu ho figura sira ne’ebé iha influénsia”.

“Sente hanesan la hetan apoiu institusionál hodi kumpri promesa sira ne’ebé ita halo ona ba povu Timor Leste, liu-liu kapitál Díli. Nune’e, halo ha’u-nia prezensa iha kargu PAM Díli ne’e, la sustentável ona atu kuntinua.” Tenik Eis PAM-Dili Gregorio da Cunha Saldanha Mouris ba Jornalista sira iha Matadouro, 28/01/2025

Saldanha hatutan, “Maski nune’e, hau nia dever atu hato’o ha’u-nia agradesimentu ba fiar no kolaborasaun husi ha’u-nia kolega sira iha AMD, husi ha’u-nia superiór sira iha MAE no Governu IX, iha lideransa Maun Boot Xanana Gusmão.”

“Ikus, ha’u hakarak husu deskulpa ba povu sidade Díli tamba ha’u tenki para iha dalan klaran, maski iha ona planu oinsá dezenvolve sidade Díli ba oin kona ba lixu, merkadu, rate, jardin, no atendimentu sira seluk ba komunidade nia nesesidade sira. Nune’e, dala ida tan ha’u deklara ba públiku ha’u nia Rezignasaun nudar PAM Díli”.

Eis PAM Dili ne’e husu PAM foun hodi servisu makaas no lolos hodi lori mudansa no dezenvolvimentu sidade Dili.

“Ha’u deseja susesu ba PAM foun atu kontinua serbisu lailais maibé lolos hodi lori mudansa sira, no afirma ha’u nia kompromisu ba dezenvolvimentu sidade Dili, no moris diak ba sidadaun sira hotu”. Nia hakotu

Imajem : MAE Tomas Cabral hala’o hand over ba Eis PAM-Dili Grigorio Saldanha Mouris

Ministru Administrasaun Estatal Tomas Cabral enkamiña mós pedidu renunsia hosi kargu Prezidente Autoridade Munisípiu Dili ba S.E Primeiru Ministru, hodi bele tetu no foti desizaun tuir baze legál ne’ebé vigora, no S.E Primeiru Ministru despacho iha loron 14 Janeiru 2025 “Aprovo!

“O MAE deve ver a melhor forma de propôr uma nova proposta de nomeação, que corresponde às necessidades da gestão da Capital! Entretanto o MAE, deve propôr uma substituição temporária do PAM, que não deve ultrapassar 30 dias”.

Fo hanoin fali katak Gregorio da Cunha Saldanha Mouris asume kargu Prezidente Autoridade Munisipiu Dili iha loron 1 fulan Marsu tinan 2024, submete nia karta resignasaun iha loron 13 fulan Janeiru 2025 no ofisialmente husik kargu iha loron 28 fulan janeiru 2025.

Serimonia entrega funsaun ne’e hala’o fo biban ba nomeiasaun foun husi Primeiru Ministru, bazeia ba dispozisaun nú 1 artigu 21, husi Dekretu-Lei nú 3/2016, loron 16 fulan-marsu, ne’ebé publika fila fali husi Dekretu-Lei nú. 84/2023, loron 23 fulan-novembru, kompeténsia atu nomeia no ezonera ba Prezidente Autoridade Munisipál sira eskluzivu ba Sua Exelénsia Primeiru-Ministru.

Daudaun ne’e Diretor Jeral Antonio A. Guterres asume kargu hanesan Prezidente Autoridade Munisipiu Dili interinu hodi hein nomeasaun foun hosi Primeiru Ministru Kayrala Xanana Gusmão.

Jornalista : Ermelinda Soares