Konsumu Udan-Been ! Feto & Labarik Halerik Ba Bee-Moos Iha Laletek Becora
Imagen: Komunidade aldeia Kakeu Laran halerik ba bee-moos, 04/11/2025
SAPNewsTL, Díli : Fenômenu mudansa klimátika ne’ebe hamosu bailoron naruk, laos de’it sai dezafiu ambiental, maibé fó ameasa direita ba komunidade vunerável sira liu-liu inan feton no bebe sira ne’ebe hela iha area foho-lolon, aldeia Kakeu-laran konsumu de’it udan-been ne’ebe laiha higiene no la moos hodi fó ameasa ba sira-nia saúde.
𝐆𝐮𝐢𝐥𝐡𝐞𝐫𝐦𝐢𝐧𝐨 𝐑𝐚𝐦𝐨𝐬 & 𝐌𝐚𝐫𝐜𝐞𝐥𝐚 𝐌𝐞𝐫𝐲 – 𝐒𝐀𝐏𝐍𝐞𝐰𝐬 𝐓𝐋
Tuir komunidade Aldeia Kakeu-laran, Suku Becora Postu Administrativu Kristu Rei Munisipiu Dili, Joanina de Jesus deklara, durante tempu bailoron naruk, hafoin udan monu rai, nia ho oan no familia sira susar tebes hetan bee-moos, nune’e udan-been sai alternativa ba sira hodi kosumu iha tempu udan monu rai.
“Agora tempu bailoron ne’e ami be’e araska, se udan ami lori udan-been, ami hotu-hotu hodi udan be’en mak fase ropa, fó haris labarik no uza ba tein no hemu” Dehan komunidade Aldeia Kakeu-laran, Joanina de Jesus ba SAPNews, iha nia rezisténsia, Becora, Segunda-Feira, (04/11/2025).
Nia fundamenta, bainhira udan monu rai obrigadu sira utiliza udan-been sai alternativa ba konsumu loro-loron nian, tanba familia venerável ne’e, enfrenta situasaun defisil asesu ba fornesimentu bee-moos husi governu.
“Tempu udan, ami halo jestaun ba udan-been, entaun udan-been ne’ebe ami tau iha masa, ami lori pasador taes tiha, depois nono mak fó bebe sira hemu inklui fó haris labarik sira, situasaun ida ne’e ami hasoru kleur ona maibé seidauk iha ema bo’ot ida atu resolve problema bee-moos laiha ne’ebe ami hasoru”.
Tenki Inan feto Joanina.
Dona da Casa ne’e salienta, impaktu ambiental hanesan bee maran, la’os de’it fó risku ba rai no aihoris sira, maibé sai prekupasaun bo’ot ba feto no lararik sira, tanba feto mak enfrenta direta situasaun difisil iha komunidade nia le’et, bainhira fenomenu akontese.
“Bainhira bebe moris, ami senti araska tebe-tebes tanba be’e masa kiik ida, ami uza fó haris bebe iha dader no lokraik, maibé ami nono oitoan mak fó haris sira, situasaun ida ne’e bele lori risku mai ami no bebe kiik oan”.
Nia konta, bainhira bee-moos laiha hodi utiliza ba konsumu loro-loron nian no fó haris labarik sira, obrigadu inan feton ne’e uza de’it bee aqua ne’ebe nia fa’an hodi fó haris bebe.
“Iha ne’e ha’u fa’an kios maibé ami araska liu ona be’e mós laiha, ha’u foti de’it be’e aqua ne’ebe fa’an hodi fó haris bebe, dala ruma tempu udan bainhira mota tun be tenki merak liu loron hat ou lima mak foin moos maibé ami nafatin ba kuru lori mai nono mak hemu, dalaruma bebe sira ami nono tiha be depois mak fó sira hemu” Dehan nia.
Inan feton Joanina hatutan, kauza husi mundansa klimátika lori dezafiu bo’ot ba nia ho oan sira, tanba bainhira nia laen la’o sai husi uma ba servisu, nia hanesan inan tula responsabilidade bo’ot iha nia kabaas leten, la’o ho distânsia dok kuaze metru atus ida resin hodi soe hela oan sira hodi ba kuru bee-moos.
“Maske bebe moris foin halo fulan rua ou tolu, maibé ha’u tenki kele bebe lori ba kuru be’e , selae ha’u fó hela ba ama kous ha’u la’o ho distânsia metru atus ida resin ba kuru be’e, entaun be’e ne’ebe ami ba kuru dader, ami uza oitoan hodi tein, meudia ami uza oitoan no kalan uza oitoan, tanba ami araska los”.
Enkuantu, ho situasaun difisil ne’ebe familia ne’e enfrenta durante tempu naruk, nia parte husu ba governu liu husi Bee Timor-Leste Empreza Publika (BTL-EP) atu solusiona imediata problema ne’ebe sira hasoru.
“Kada tinan ami araska mak be’e ne’e deit, ami husu governu tau matan netik mai ami, tempu bailoron hanesan ne’e ami araska los ba be’e, ami husu ba governu mak fasilita be’e mai ami, tanba ami-nia oan sira ba eskola dalaruma harus uza be gayun ida deit, obrigasaun hanesan sira tenki ba eskola hodi buka matenek ba sira an”.
Iha fatin hanesan, avo Jacinta Pereira hateten, maske nia ho idade 65 maibé nia kontínua la’o ho distansia dok hodi luta buka bee-moos, tanba nia ho familia sira ne’ebe hela iha area foho-lolon Aldeia Kakeu-laran Suku Becora enfrenta problema bee-moos laiha.
“Sé bailoron hanesan ne’e, udan-been laiha tan, ami lori saida mak fase roupa, ami hadau malu mak be’e ida leten ne’e, be’e ida de’it se ropa foer barak ami ba buka be’e iha mota ulun, ami buka be’e sa’e ba bekae ne’eba, ami ba la’o ho distansia dok, ami tein hahan mak lori ba to’o kalan mak fila mai uma”.
Komunidade Aldeia Kakeu-laran ne’e aprofunda, bainhira inan feton sira tur ahi, iha tempu udan monu rai ka bailoron naruk hamosu difikuldade bo’ot ba labarik sira, tanba kauza husi bee laiha.
“Bainhira bebe oan moris, ami buka be’e araska tebe-tebes, obrigadu ami tutur ropa foer la’o ho distansia dok, sa’e ba mota ulun hafoin hetan be’e-moos, mane sira ba tiha servisu la’o sai badiu tiha, obrigadu ami feto tutur ropa foer kous bebe sira, ami ba buka be’e moos, ami sa’e aibubur laran mak la’o tesik ba, be laiha ami araska los”.
Avo Jacinta fundamenta, hanesan feto sai vuneravel tebe-tebes ba mudansa klimátika, tanba maske senti kolen maibé, kontinua hafalun kolen, ho hamnasa la’o ho labarik sira hodi buka bee ba konsumu.
“Ita senti kolen hela mós obriga an, ami tenki ba kuru be’e mós, labarik kiik sira ne’e ami lori hotu ba bee-matan, ema sira ne’ebe ense ami nia be’e ami tenki fo osan 50 centavus ou um dolar para sira ense be’e ba masa sira ne’ebe ami lori mai, entaun sira ne’ebe ense ami-nia be’e, ami fó sigaru ba sira fuma'” Nia Hakotu.
Hafoin notísia ne’e públika Mídia Sapnews seidauk halo komfimasaun ho parte Bee Timor-Leste ligadu ho problema bee-moos iha área Bekora tanba sei okupadu ho servisu seluk.