Lansa Programa Tatoli Hakbesik ! Expedito Husu Média Estatál Labele Halo Propaganda
Imajem : SEKomS Expedito Dias Ximenes hamutuk ho Prezidente Konsellu Diretivu Tatoli,I.P iha Dili, 07/05/2025. Foto : Media SEKomS
SAPNewsTL, Dili : Hafoin lansa programa Ajensia Tatoli Hakbesik no Tatoli Klarifika, Sekretáriu Estadu Komunikasaun Sosiál (SEKomS) Expedito Loro Dias Ximenes deklara média estatál labele sai propagandanista ba públiku bainhira divulga informasaun.
Sekretariu Estadu Komunikasaun Sosial, Expedito Loro Dias Ximenes hateten, lansamentu programa Tatoli Hakbesik kabé ba politika IX Governu konstitusionál nian hodi trasmite informasaun ba públiku kona-ba desentralizasaun ne’ebe governu sei hala’o.
“Lansa programa ne’e tanba IX governu hakarak besik liu ba povu liu husi meius komunikasaun no husu oinsa mak ita tenki hatun informasaun ho kualidade, Tatoli hanesan media estadu la bele sai fali propagandanista (halo propaganda), tenki publika faktu ne’e realidade, Tatoli tenki lori informasaun ne’e faktus, atu hakbesik ba povu”.Dehan SECOMS Expeditu Loro Dias ba Jornalista sira, Iha edifisiu Tatoli.Ip Segunda (07/04/2025)
Sekretáriu Estadu Expeditu afirma, lansamentu programa Tatoli Hakbesik tulun públiku atu hatene politika desantrilizasaun ne’ebe governu trasa, nune’e públiku bele asesu informasaun ho faktu konkretu ne’ebe governu transmite liu husi meius komunikasaun sira.
“Tatoli Hakbesik ne’e IX governu konstitusional hakarak iha tinan 2026 sei fo atensaun tomak ba politika desantralizasaun, Tatoli ne’e katak lori mensajen ba liur, hakbesik ne’e laos de’it tanba atu halo kobertura maibé hakbesik ne’e lori informasaun ho kualidade, katak politika IX governu nian iha politika desantrilizasaun hatudu faktus, Tatoli tenki sai ajensia ida ne’ebe los, papel ida Clearing house ne’e ho avansu teknologia laos de’it jornalista, media, meius komunikasaun sosial deit mak produs informasaun, agora ita haree ema hotu ne’e mak iha android bele produs informasaun”.
Expeditu hatutan Governu depozita komfiansa ba média estatál ajensia Tatoli no RTTL-EP atu bele sai matan no tilun ba lian laek sira hodi divulga informasaun ba konsumidor sira bazeia ba faktus atu indika konfidensialidade entre públiku no média estatál inklui sai fornesedor ba média konvensional sira sein duvida.
Prezidente Konsellu Diretiva Ajensia Tatoli, I.P Noemio Falcão
Iha fatin hanesan, Prezidente Konsellu Diretiva Ajensia Tatoli, I.P Noemio Falcão fundamenta, Tatoli iha planu anual ba tinan 2026 nian ne’ebe sei halo kompleta difikuldade planu refere, maibé sei haree fila fali ba rekursu ne’ebe agora iha, nune’e ba oin halo kontaktu barak ho sosiedade, administrador Postu, Xefe Suku, autoridade sira, sosiedade sivil no públiku tomak.
“Programa rua ne’e mak Tatoli Hakbesik, hanoin média estatal hanesan kanal importante ne’ebe mak bele rekolla informasaun hotu, no dezenvolve prosesu ne’ebe mak governu hala’o daudaun, no oinsa mak prosesu ne’e atinji tuir prosesu meta governu nian, no ami iha planu ba tinan 2026 atu kria programa, Tatoli klarifika tanba konsiente katak dezenvolvimentu, teknologia ohin loron iha dezafiu barak”.
Diretor Jeral Dezentralizasaun Antonio Augusto Guteres apresia ho lansamentu programa Tatoli Hakbesik tanba bele transmite informasaun ho faktu no kredivel hodi responde ba polítika desentralizasaun ne’ebe governu trasa.
“Ha’u orgullu ho lansamentu Tatoli nian, apresia ho programa rua ne’ebe lansa ida Programa Hakbesik ne’e koresponde ona ba desentralizasaun kodigu estratejiku objetivu haat (4) ne’ebe mensiona ona katak lori governu besik ba povu, iha Tatoli mós hakbesik ba povu hakbesik ba sosiedade hotu, hodi transmite informasaun politika no programa governu nian”.
Entertantu, iha serimónia lansamentu programa Tatoli Hakbesik partisipa husi Sekretáriu Estadu Komunikasaun Sosiál Expeditu Loro Dias, Diretor Jeral Dezentralizasaun Antonio Augusto Guteres, Administrador Postu, Xefi Suku autoridade lokal, estudante UNTL Departamentu Komunikasaun Social no media sira.
Jornalista : Dircia Belo & Anina Martins