Lembra Kristu Nia Terus & Mate ! Sarani Zumalai Hala’o Via Sakra Ho Distánsia Liu KM 1
Imajem : Sarani Zumalai hala’o viasakra
SAPNewsTL, Zumalai : Sarani Kapela Imaculada Coração de Maria Harekain hala’o viasakra ka dalan kruz hodi lembra ba Kristu Jesus ninia terus, no mate tanba ho ninia mate salva umanidade husi mate nia ukun.
Via Sakra ne’e la’o husi Bairo Leoriti ba to’o kapela ho distânsia kilómetru ida resin, durante viasakra ne’e, sarani hala’o orasaun no hananu hodi hanoin hikas Na’i Jesus Kristu nia terus no mate iha Kruz.
Sexta-feira da Paixão mak loron importante tebes ba sarani katólika no krisatun sira iha mundu tomak, inklui mós iha Timor-Leste hodi selebra no adora Maromak iha leten aas ba.
Selebrasaun ba Jezús Kristu nia Paixaun,
loron ne’e dedika hodi hanoin hikas fali Jezús Kristu nia terus, ninia krusifikasaun (prega iha kruz), no ninia mate iha foho Kalváriu tutun.
Ba sarani sira, Jezús mate la’ós de’it nu’udar ema di’ak ida, maibé nu’udar sakrifísiu boot hodi sosa fali ema nia salan. “Nia mate atu fó salvasun no moris foun ba mundu”.
Iha Viasakra ne’e, sarani sira halo orasaun hodi la’o tuir estasaun 14 ne’ebé hatudu Jezús nia hakat husi simu sentensa mate to’o hakoi iha rate.
Iha via sakra ne’e mós sarani sira refleta ba Nai Jerus Kristu nia futar liafuan sira hanesan :
1. “Aman, perdua ba sira basa sira lahatene buat sa mak sira halo” (Lucas 23:34). Liafuan ida ne’e hatudu domin no misericórdia boot. Maski Jesus hetan sofrimentu, nia husu Maromak atu perdua ema sira ne’ebé halo aat ba nia. Ne’e hanorin ita atu aprende perdaun, maski ema halo sala ba ita.
2. “Ohin ita sei hamutuk ho hau iha paraizu.” (Lucas 23:43)
Jesus koalia ho ema aat ida ne’ebé arrepende iha kruz. Liafuan ida ne’e hatudu katak Maromak nia miserikórdia la iha limite. Maski iha momentu ikus, ema bele hetan salvação se nia arrepende ho fuan no laran moos.
3. “Feto, ne’e ita-nia oan, hare’e ne’e ita-nia inan” (João 19:26–27). Iha ne’e, Jesus entrega nia inan ba dissípulu. Ne’e hatudu responsabilidade no domin família. Maski iha dor (kanek, moras no terus), nia hanoin nafatin ema sira ne’ebé nia hadomi.
4. “Ha’u-nia Maromak, tanbasá ita husik hau?” (Mateus 27:46). Liafuan ida ne’e hatudu dor espiritual boot. Jesus sente hanesan husik, maibé ne’e mos hatudu nia solidariedade ho sofrimentu ba ema hotu. Nia simu dor tomak atu salva humanidade.
5. “Hau hakarak bee.” (João 19:28). Ne’e hatudu katak Jesus ema loos, nia sente susar no hakarak bee. Maibé mos bele entende espiritualmente katak nia hakarak justisa no salvasaun ba ema sira.
6. “Hotu ona.” (João 19:30)
Liafuan ida ne’e importante tebes, tanba hatudu katak misaun Jezus iha mundu remata ona. Nia halo tuir Maromak nia planu atu salva ema hotu.
7. “Aman, iha O nia liman, hau entrega hau-nia espíritu.” (Lucas 23:46). Liafuan ikus ne’e hatudu konfiansa total ba Maromak. Jesus entrega nia-an tomak ba Aman. Ne’e hanorin ita atu fiar no entrega ita-nia moris ba Maromak.
