Lere : “Liberta Povu Hosi Ki’ak, Presiza Kombate Korupsaun, Ema Balun Riku Matak”
Imajem : Lider Troika Lere Anan Timur & Sekretariu Jeral FRETILIN Mari Bin Amude Alkatiri iha CCD Fatuhada,11/09/2025.
SAPNewsTL, Díli : Durante konferénsia imprensa kona-ba Disolusaun ASDT-FRETILIN ne’ebé hala’o iha CCF, Líder Troika Lere Anan Timur hateten atu liberta povu hosi kiak no mukit presiza kombate korupsaun.
Marciana da Conceição – SAP News TL
Lere Anan Timur hateten papel FRETILIN ba luta libertasaun nasional, FRETILIN luta atu liberta patria no liberta povu, “patria ita liberta tiha ona, agora falta liberta povu husi kiak no mukit”.
“Atu liberta povu husi kiak no mukit, ba ha’u presiza kombate korupsaun, kuandu ita halakon korupsaun, bele dehan ita liberta ona povu husi kiak”. Hateten Líder Troika Lere Anan Timur iha CCF Fatuhada,11/09/2025
Lere hatutan, “ohin loron ita tau kestaun ba estabilidade no dalaruma ita preokupa arte marsiais, arte marsiais laos ameasa boot ba estabilidade Timor, ameasa boot ba estabilidade Timor mak kestaun politika”. Tenik nia
“Ha’u hanoin kestaun politika mak importante tanba politika mak kombate korupsaun ne’e. Ohin loron ema riku matak, ema ne’ebé uluk lakohi an, ohin loron sai riku no moris diak, nia oan sira ba eskola sai doutor hotu maibe sira ne’ebé uluk terus ba rai ida ne’e, kuitadu ! ida ne’e mak sai problema ba ita-nia rai”.
Lere Anan dehan, lolos ne’e FRETILIN mak nain ba ukun rasik aan, haree iha sede veteranus dehan “veteranus mak rin ba nasaun no nain ba ukun aan”.
“FRETILIN laiha karik veteranus laiha no ohin loron mós ita la ulun moras ba veteranus, mas tanba FRETILIN iha ne’e mak ita ulun moras ne’e”.
“Ne’e mak konseitu veteranus mak rin ba nasaun no nain ba ukun aan, lolos ne’e FRETILIN, maibe tanba demokrasia. FRETILIN luta ba demokrasia agora hotu-hotu nain ba ukun aan no nasaun ne’e”.
Lere dehan, “Ha’u bele dehan katak FRETILIN ohin ka FRETILIN uluk, FRETILIN nafatin, ema maka sai no ema mak tama, maibe ema ne’ebé iha konviksaun nunka sai no metin nafatin iha FRETILIN tanba iha prinsipiu”.
Veteranus maka rin ba nasaun no nain ba ukun aan, será ke ita-nia oan sira ne’e aban bairua sai nain no rin nafatin ka lae?
“Agora jerasaun patriota maka tenke servisu makas para ita labele halakon FRETILIN”. Nia husu
Ligadu ho polémika sosa karreta ba deputadu sira, Lere Anan Timur konsidera ne’e asuntu sensível.
“Ohin ita rona Parlamentu Nasionál atu sosa kareta ka la sosa kareta, ita bele dehan ida ne’e asuntu ida ne’ebé sensivel tanba Indonezia loke ona dalan sobu uma, sunu karreta, baku seguransa no polisia, ha’u mak kaer forsa ema ida la baku”. Nia teni
Iha fatin hanesan, Sekretariu Jeral Partidu FRETILIN Mari Alkatiri konsidera situasaun polítika aat tebes tanba desenvolvimentu la la’o.
“Edukasaun no saúde la la’o, ekonomia la sustentável, ita uza sala osan, Primeiru Ministru (Xanana Gusmão) hateten tinan tolu ka haat tan osan laiha ona”.
“Ita nia palavra orden uluk ne’e mate ka moris ukun rasik aan, sira ne’ebé mate ona bele ukun aan? Tanba saida sira fo aan ba mate?, tanba iha kauza ida, kauza ne’e mai husi valores”.
Alkatiri hatutan, “Ita luta ba rai ida ne’ebé ita dehan patria”, maibe patria ne’ebé ita luta, laiha povu moos laiha patria. Ita iha povu mak iha patria, laos iha patria mak iha povu. Signifika katak ita kore deit patria la kore povu husi kiak no mukit luta seidauk hotu, ne’e kauza, povu tenke ukun nia aan, tenke kore husi mukit no moris ho dignidade”.
Sekretariu Jeral ne’e sublinha povu mak sai alvu prinsipal iha luta ba libertasaun katak FRETILIN mak povu no povu mak FRETILIN.
“Molok atu funu tama FRETILIN hahu kedas tun ba povu nia leet hodi organiza povu, ne’e signifika saida?, sentru ba ita-nia luta mak povu mais baze ba ita nia luta mos povu, ne’e mak dehan FRETILIN mak povu no povu mak FRETILIN”.