Lobato : Joven Labele Terus Tan, Katuas Sira Tenki Kria Kondisaun Di’ak

Imajem : Prezidente Autoridade Região Administrativa Espesiál Oe-cusse Ambenu (RAEOA) Rogerio Tiago Lobato. Foto : Media CNC

SAPNewsTL,  RAEOA — Dalan ba hametin rekonsiliasaun entre Povu Timor-Leste no Nusa Tenggara Timur (NTT), Prezidente Autoridade RAEOA Rogerio Tiago Lobato enkoraja Povu RAEOA promove rekonsiliasaun no hametin kooperasaun ho NTT hodi hateke ba dezenvolvimentu, atu joven agora labele terus tan, katuas sira tenki kria kondisaun ba sira.

Prezidente Autoridade Região Administrativa Espesiál Oe-cusse Ambenu (RAEOA) Rogerio Tiago Lobato hateten, tempu atu hirus malu hotu ona, oras ne’e tempu atu dame malu, hodi promove rekonsiliasaun atu hetan paz no prosperidade entre povu Timor-Leste ho povu NTT, tamba ne’e agora tempu atu kria paz hodi hakete ba dezenvolvimentu.

“Rekonsiliasaun bainhira konflitu iha 1999, mundu hakfodak, ita nia maun bo’ot hakuak ema sira ne’ebe mak halo funu ne’e dehan grande coração, entaun dalan ba hametin rekonsilasaun ezize koragem, ita tenke dame malu”. Dehan Prezidente Autoridade Região Administrativa Espesiál Oe-cusse Ambenu (RAEOA) Rogerio Tiago Lobato, liu husi nia Diskursu iha RAEOA, Sexta (18/10/2024)

Prezidente RAEOA afirma, estabelesimentu rekonsiliasaun atu reafirma fila fali sidadaun hotu-hotu ne’ebe mak terus, sofrimentu no sai vitima iha funu laran, atu bele kria paz, estabilidade, tamba ne’e lider masimu Kay Rala Xanana Gusmão liu husi terus bo’ot, nia sente no nia enkoraza IX Governu atu tuir dalan rekonsiliasaun.

“Ha’u sente katak faktu ita simu uluk ita nia maluk sira, la hanoin hanesan ita ko’alia nakloke ba malu kona-ba rekonsiliasaun, kultura ne’e ha’u bele dehan katak pasu ida bo’ot ne’ebe ita to’o, tamba ne’e maun bo’ot Xanana liu husi terus bo’ot, nia sente no nia enkoraza IX Governu atu tuir dalan rekonsiliasaun, dame malu ho ema ne’ebe antes ne’e ita sai inimigu ba malu”.Lobato hateten

Nia hatutan, tanba konflitu obriga populasaun Timoroan minoria deside halai ba Kupan, Atambua Indonesia, ne’e duni lider sira iha papel moralidade hatudu sentidu estadu, hodi promove fraternidade hodi halo vizita ba Timoroan sira ne’ebe rezidente iha area Indonesia nian.

“Ita nia joven sira husi Timor-Leste sira mai to’o deit iha fronteira, labele liu ba rai ketak no ita nia joven sira husi rai ketak labele liu mai ita nia rai, tanba ne’e atu promove fraternizasaun hodi halo vizita ba Timoroan sira ne’ebe hela iha area Indonesia, presiza dalan ba hametin paz no rekonsiliasaun, ne’e hanesan sentimentu sai husi sira nia laran, ne’e duni ita hanesan katuas ita tenke kria kondisaun atu sira nia futuru bele diak, labele terus tan hanesan ita uluk liu, ita tenke promove fratenizasaun”.

Nia salienta, iha estadu direitu demokratiku fó espasu ba joven sira ko’alia ba malu, troka imprensaun, ideia no kria amizade hodi hateke ba futuru, tanba juventude sira sei la’o iha dalan ida ne’ebe naruk, oinsa joventude sira iha fronteira servisu hamutuk dezenvolve area ekonomia.

“Ita hanesan jerasaun tuan, ita tenke hamutuk tanba ita nia kultural ne’e dehan katak bainhira ita iha problema, ita tenke nahe biti bo’ot, ha’u sempre dehan katak ‘as grande caminhadas é mesma com um pequeno caminhada’, ita atu la’o iha dalan ida ne’ebe mak naruk, ita tenke promesa ho pasu paz, nune’e ita bele iha kooperasaun liu husi ekomonia.”Nia hakotu

Enkuantu, partisipa iha enseramentu festival fronteira 2024 ne’e mak Vise Ministru Asuntu Parlamentares Aderito Hugo da Costa, Diretor CNC Hugo Maria Fernandes, Membru Governu sir, delegasaun hosi NTT no komunidade RAEOA.

Jornalista : Genoveva Lopes Sarmento