Loron 11-12 Jullu, UNTL Sei Gradua Finalista 1.728

SAPNewsTL, Díli – Universidade Nacional Timor Lorosa’e (UNTL), sei fo graduasaun ba estudante finalista hamutuk 1.728 iha loron 11-12 Fulan Jullu 2024 tinan ne’e.

Tuir informasaun ne’ebe SAPNews asesu liu husi DEMCOM UNTL katak UNTL nia Diretór Nasional Atendimentu Estudante (DNAE), Rui Loco Pires, hateten, universidade sei realiza graduasaun iha semestre impár 2024 ne’e ba finalista hamutuk rihun ida atus hitu ruanulu resin ualu (1728).

“Ita sei halo graduasaun ba finalista hamutuk 1728 no dadaun ne’e DNAE sei hein hela despaxu ba Dipploma Ministerial husi MESSK (Ministériu Ensinu Superiór Siénsia no Kultura) no espera katak ita bele halo graduasaun iha fulan Jullu tinan 2024”, dehan Diretór DNAE Rui Loco Pires iha Kampus Sentral, Díli (18/06/2024), hakerek husi média ofiser Denilson Amandio Barros

Diretór DNAE ne’e informa total graduandu 1728 ne’e kompostu husi  fakuldade 10 iha UNTL, entre sira inklui ona ho mestradu no pós-graduasaun.

“Totál graduandu 1728 ne’e kompostu husi Faculdade de Agricultura (127), Faculdade de Engenharia Ciência e Tecnologia (323), Faculdade de Educação Artes no Humanidades (521), Faculdade de Medicina e Ciência da Saúde (291)”.

“Faculdade de Ekonomia e Gestão (94), Faculdade de Direto (64), Faculdade de Ciências Sociais (200), Faculdade de Filosofia e Ciências Humanas (52), Faculdade de Turismo Artes Indústrias Criativas e Culturais (43), inklui Mestradu no Pós-Graduasaun (13)”. Informa Diretór DNAE

Serimónia graduasaun ne’e sei la’o durante loron rua (11-12/07/2024) iha Gináziu Munisipál Dili, iha ne’ebe loron dahuluk sei prense graduandu total 954 ne’ebe kompostu husi fakuldade agrikultura, fakuldade engenharia siénsia no teknolojia, fakuldade medisina e siénsia da saúde, fakuldade siensia sosiais, no Mestradu e pós-graduasaun.

Graduasaun loron daruak sei prense graduandu hamutuk 774 ne’ebe kompostu husi fakuldade direitu, Faculdade de Filosofia e Ciências Humanas, Faculdade de Turismo Artes Indústrias Criativas e Culturais, Faculdade de Educação Artes no Humanidades, no Faculdade de Ekonomia e Gestão.

Enkuantu, misa agradesimentu ba graduandu sira sei hala’o iha loron 8 fulan jullu iha igreja Motael no ensaiu ba graduasaun sei hala’o iha loron 9 jullu 2024.

Fo hanoin fali katak durante tinan 20, Universidade Nasional Timor Lorosa’e produz ona graduandu hamutuk rihun ruanulu resin (20.000 ital), estudante ativu por volta de 24.000 iha tinan 2024, estudante pasivu por volta de 21.000 liu, entre sira estudante 9.000 resin mak ameasa sofre Drop Out wainhira la halo re-administrasaun no re-inskrisaun tuir data ne’ebe UNTL fo sai hodi registu hikas ba ensinu aprendijajem iha tinan ida ne’e.

Jornalista : Marciana da Conceição