Manan Kimani ! Délio Fo Agradese Ba Maromak & Timoroan Nia Orasaun

Imajem : Boxista Timoroan Délio Anzaqueci Mouzinho hamutuk ho nia Sponsor iha Canadá, 08/06/2025. Foto : DAM

SAP News TL, Canadá : Hafoin konkista vitória, Boxista Timoroan Délio Anzaqueci Mouzinho fo agradese ba Aman Maromak no timoroan hotu tanba rezultadu ne’e la ses hosi Maromak nia tulun no orasaun ne’ebe harohan hosi Kardeal Dom Virgílio do Carmo da Silva, Padres, Madres no timoroan sira.

Marciana Da Conceição Jurnalis – Mídia Sapnews

“Eventu Boxing ida ne’e la ses husi Aman Maromak nia Tulun, grasa wain no bensaun husi Cardeal, Bispu, Padres, madres, inan aman, familia no maluk doben Timor oan sira hotu Iha orasaun, akompanha ha’u no lori ona ha’u to’o pontu ida ne’e”.

“Ha’u sente katak karik la iha orasaun, motivasaun, dedikasaun husi parte relevante sira, ha’u sei la to’o iha pontu ida ne’e, tan nee ha’u agradese nafatin ho domin boot ba apoiu tomak”. Sita Délio Anzaqueci Mouzinho liu hosi nia página oficial Facebook, Canadá, 08/06/2025.

Durante fight iha ring leten, Boxista timoroan Délio Anzaqueci tuku barak liu ba Boxista Canadá Kimani Crawford nia oin iha ronda dahuluk no daruak.

Iha ronda daruak Délio Anzaqueci kontinua tuku makaas ba Kimani Crawford nia oin, halo nia menuz kontrolu no la forsa hodi halo autodefeza iha ronda dahuluk no daruak.

Nune’e, jogu ne’e termina iha ronda daruak hodi resulta Délio Anzaqueci Mouzinho konkista vitória no halakon Kimani Crawford iha Fight Night Ricibucto ne’ebe realiza iha Canadá.

Wainhira manan, Délio Anzaqueci Mouzinho foti Bandeira Timor-Leste hodi hatudu ba mundu perante partisipante sira iha Canadá.

Lembra fali, katak antes Délio Anzaqueci Mouzinho deklara katak nia sei sa’e ring hasoru Kimani Crawford husi Canadá hodi hatudu ba mundu katak Timor-Leste bele rai kiik maibe nia sei hatudu no lori ba mundu liu hosi eventu ne’ebe nia partisipa.