Manorin 588 Simu Pose ! Assanami : “Mestre Hala’o Knar Lulik & Heroiku Iha Dezenvolvimentu”
Imajem : Vise Primeiru Ministru Mariano Assanami Sabino iha GMT Díli, 29/12/2025. Foto : Media Vise PM
SAPNewsTL, Díli : Vise-Primeiru Ministru, Ministru Koordenador ba Assuntu Sosiais, Mariano ASSANAMI Sabino, parabeniza Manorin nain husi Ensinu Sekundariu Jeral no Ensinu Tékniku Vokasional hamutuk 588 ne’ebe simu posse hodi destaka ba munisipiu sira.
Vise-Primeiru Ministru, fo apresiasaun boot ba kontribuisaun manorin nain sira hotu ne’ebe durante ne’e servisu makas hodi forma rekursu umanu hodi kontribui ba dezenvolvimentu nasional.
Assanami Sabino konta iha Japaun, bainhira mosu funu mundial daruak nian ne’ebe ema bombardeia sira-nia nasaun ema barak mate no kanek, bainhira funu remata liu-rai Japaun la’os husu infraestrutura hira mak rahun maibe nia husu mestri hira mak sei moris, tamba sira hatene katak so mestri mak bele produz ema matenek hodi rekupera buat hotu ne’ebe sira lakon iha funu.
Entaun iha Timor, estadu ida ne’e hatur ninia vizaun, Ema mak sai sentru ba dezenvolvimentu, tanba ne’e liu husi IX Governu Konstitusional hahu halo selesaun liu husi teste ne’ebe mais kualifikadu, nune’e profesores ne’ebe atu hanorin tenke iha duni profesionalidade.
“Mestri sira ne’e halo knar lulik, bainhira mestri la iha dezenvolvimentu mos sei la iha, mestri la iha Ministru, Deputadu no sira seluk tan mos la iha hotu, entaun imi hala’o misaun heroiku iha prosesu dezenvolvimentu,” dehan V-PM Mariano Assanami Sabino iha GMT Díli, 29/12/2025. Sita Média VPM
Vise Primeiru Ministru Mariano Assanami Sabino
Governante ne’e dehan manorin nain la’os atu tranfere de’it siensia ba labarik sira maibe tenke hanorin labarik sira oinsa sira nafatin iha karakter rasik, karakter Timorense ne’ebe tuir duni lutador sira nia vizaun oinsa hari’i sosiedade ne’ebe demokratiku, siviku ne’ebe bele lori rai ne’e ba oin.
Ministra Edukasaun Dulce de Jesus Soares sublinha ohin nu’udar loron afirmasaun estadu nian no renovasaun ba esperansa nasionál tanba marka istória bo’ot iha setór edukasaun tanba iha tinan rua nia laran konsege selebra serimónia tomada de pose hamutuk 16 ba kandidatu sira-ne’ebé ingresa ba Karreira Dosente.
“Ministériu Edukasaun mós halo serbisu ona no prontu atu koloka bolseiru balu seluk ne’ebé hela iha lista atu taka fali manorin sira-ne’ebé atu reforma ona. Iha tinan 2026 ha’u lakohi iha eskola ida ne’ebé falta profesór”, dehan Ministra, Sita Média ME.
Sekretáriu Estadu Ensinu Sekundáriu Jerál no Ensinu Sekundáriu Tékniku Vokasionál Sr. Domingos Lopes Lemos hateten, Ministériu Edukasaun kompromisu atu la’o hamutuk ho manorin-na’in sira iha melloramentu kontínúo ba kondisaun edukasionál sira.
“Ita-boot, ne’ebé maka ultrapasa ona ezijénsia sira ne’ebé hosi faze hotu-hotu hosi grupu kandidatu sira ba ensinu sekundáriu, la’ós de’it asina dokumentu aseitasaun no nomeasaun nian. Ita-boot asina hela paktu ida ho futuru ita-nia doben Timor-Leste nian”, dehan Sekretária Estadu.
Governante sira mós husu ba Manorin-na’in sira labele hanorin de’it matéria maibe hanorin valór no atitude sira, sai rigorozu, sai umanu no inkluzivu.
Ministériu Edukasaun mós depozita konfiansa plena ba manorin sira-nia profisionalizmu, étika, dedikasaun, dixiplina no espíritu servisu públiku nian durante hala’o funsaun nu’udar manorin.