Mehi Ne’e Fasil, Maibé Realiza La Fasil ! Susesu Ne’e Dedika Ba Família
Imajem : Graduadu Domingos de Jesus iha Centro Convenções de Dili (CCD), 19/12/2024. Foto : Daniel da Silva
SAPNewsTL, Dili : Hafoin simu graduasaun iha universidade nasional Timor Lorosa’e (UNTL), Domingos de Jesus hateten susesu ne’ebé nia hetan la’os ba nia mesak maibé dedika ba mós ba família sira.
“Ha’u estuda iha Faculdade Engenharia Ciénsia no Teknologia, Departamentu Geolojia no Petróleu, ohin ha’u hetan graduasaun, ha’u orgullu no família sira haksolok, sussesu ne’e la’os hau nian mesak, maibe susesu ne’e familia hotu nian tanba husi sira nia esforsu no apoia mak mehi ne’e sai realidade” Tenik Domingos de Jesus iha Sentru Konvensaun Dili, 19/12/2024
Graduadu ne’e agradese ba Maromak tanba bele tulun nia iha tempu naruk nia laran to’o realiza ninia mehi, mehi família sira nian konsege atinji ona.
“Ha’u nia agradese ba aman kriador, uma no ahi husi lisan Aitula no Pugen, ha’u nia agradese liliu ba Pai no Mãe no familia sira hotu, tanba hetan susesu sira ne’e la ses husi sira nia esforsu ne’ebe mak la senti kolen no la senti loro nia manas tan deit hakarak ha’u atinji mehi ida ne’e”. Nia dehan
“Mehi ne’e fasil maibé atu realiza mehi ne’e la fasil, ha’u rekunhese katak laiha vitória ida ne’ebé fasil ba ita no gratuita sein paixaun, domin no suporta husi pai no mãe sira nian, ha’u hatene katak imi nia kolen no esforsu ha’u selu labele tanba luan hanesan tasi no aas hanesan lalehan, domin puru no inkondisional”.
Domingos hatutan, prosesu estudu ne’ebé la’o dalan naruk sempre kait dejafiu barak, menuz finanseiru, hetan traballu no materia barak ne’ebé le’e ita nia vontade no komitlentu atu aprende.
“Ha’u nia estudu iha dejafiu barak mak ha’u hasoru hanesan hamlaha, hambrok, tanis, hakarak atu hakotu deit ona estudu ne’e, hare ba oin dalan ne’e naruk tebes no hateke ba leten lalehan ne’e aas, maibe ha’u nafatin esforsu hodi realiza mehi ne’e atu pai no mãe bele kontenti ho susesu ida ne’e”.
“Susesu la’os hanesan milagre ne’ebe mosu derepente, maibe bainhira ita nunka esforsu, pasiensia, halo orasaun mak mehi ne’e saugati deit, maibe bainhira ita mehi akompanha ho esforsu, pasiensia no orasaun, fiar katak maromak sei loke dalan hodi atinji ita nia mehi”. tenik nia
Gradua ona iha ensinu superior, la signifika mehi ne’e remata ona maibe ne’e hanesan hakat ida ba kapítulu foun hodi konkretiza matenek ne’ebé hetan iha eskola no kampus.
“Ohin ha’u hakat foun ida ba espasu dejafiante, husik mundu teoria ba mundu prátika, ha’u tama ba kapítulu foun, la’os ikus ba mehi ne’e maibe inisiu husi luta foun ida hodi integra an ba interese sosiedade no nasaun nian, ha’u sei kintinua aprende hosi servi no kontribui ba bem estar kolunidade nian”.Domingos fundamenta
Imajem : Vise Reitor Asuntu Akadémiku no Garante Kualidade Samuel Freita iha Kampus Sentral UNTL, 13/12/2024
Vise Reitor Asuntu Akadémiku no Garante Kualidade Samuel Freiras hateten, tema jeral ba serimonia graduasaun fulan ne’e deskreve ho sentidu katak Graduadu Com Eselensia Caracter e Vizaun Global ho sentidu signifikativu katak aleinde produs rekursu umanu kualidade forma mós karakter ema nian atu bele integra iha públiku hodi partisipa no garante dezenvolvimentu ne’ebé sustentavel.
Samuel mós afirma graduadu gradua ne’ebé UNTL produz ne’e iha kompeténsia no karater hodi integra iha sosiedade katak sira iha kapasidade hodi servi sosiedade no nasaun.
“Graduadu UNTL ne’e garante kompeténsia no kualidade, sira iha kapasidade hodi integra an iha sosiedade, ita laiha dúvida ba sira nia kapasidade”. Nia dehan
Vise Reitor ne’e fo parabeniza ba graduadu sira tanba ho esforsu no dedikasaun bele finaliza ona estudu iha UNTL.
“Parabens ba graduadu sira hotu, parabens ba família sira hotu, ita realiza graduasaun ámbitu natál, entaun ita selebra ita nia susesu ho bensaun no grasa maromak nian”.
Tuir numeru post graduasaun mestradu total estudante 28, Fakuldade Agrikultura hamutuk 170, Fakuldade Enjenharia Siensia no Teknolojia 201,Fakuldade Siénsia Ezata hamutuk 4, fakuldade Turizmu arte no industria kriativu hamutuk 43, Fakuldade Medisina Siénsia Saúde hamutuk 633, Fakuldade Siénsia Sosial hamutk 267, fakuldade ekonomia gestaun hamutuk 222, fakuldade direitu 34, fakuldade edukasaun hamutk 497 no fakuldade filisofia hamutuk 97.
Fo hanoin fali katak, desde 2003 to’o 2024 (Graduasaun I-XXXI), UNTL produz ona graduadu hamutuk rihun ruanulu resin hitu (27.000) resin. Entre sira maioria hetan ona servisu, kontinua estudu no balun seidauk hetan servisu.
Jornalista : Ekipa Kobertura
