Membru F-FDTL Na’in-15 Konklui Formasaun Multimedia Iha Timor-Post

Imajem : Membru F-FDTL nain 15 ne’ebe konklui formasaun jornalismu iha Timor Post, Dili, 02/06/2025. Foto : Média Conselho Imprensa

SAPNewsTL, Díli : Membru FALINTIL-Forsa Defeza Timor-Leste (F-FDTL), na’in-15 konklui formasaun Multimedia iha Sentru Formasaun Jornalizmu Timor Post durante fulan ida.

Ermelinda Soares – SAPNews

Xefe Estadu Maiór Jenerál FALINTIL-Forsa Defeza Timor-Leste (F-FDTL), Brigadeiru Jenerál, José da Costa Soares “Trix”, agradese ba Sentru Formasaun Jornalizmu Timor Post ne’ebé fó formasaun kona-ba multimedia ba Membru F-FDTL na’in-15 hosi komponente oioin.

Iha formasaun durante fulan ida ne’e, sira aprende kona-ba oinsá foti Video iha terenu, editting video, no públikasaun iha media sosiál, liuliu iha Youtube no seluk tan.

“Foku Prinsipál mak ne’e, hakerek no relata servisu saida de’it mak instituisaun F-FDTL, Soldadu ka komandante sira ba halo iha ne’ebé de’it, tantu area enjeñaria ka seluk tan,” Hateten Xefe Estadu Maiór Jenerál José da Costa Soares “Trix”, iha salaun Kuartel Jerál 02/06/2025.

Trix mós husu ba Formandu sira atu nafatin aplika materia ne’ebé aprende ona iha servisu fatin, liuliu hakerek komunikadu imprensa ne’ebé iha ligasaun ho servisu komandu F-FDTL nian iha terenu.

“Instituisaun F-FDTL nia objetivu ida mak formasaun ba rekursu umanu, la’ós de’it ba area Jornalista nian, mais ba fatin hotu-hotu, ba enjeñaria nian, balun ba apoiu da paz,” hateten Brigadeiru.

Diretór Ezekutivu Timor Post, Jacob Ximenes, hateten oportunidade ida-ne’e importante tanba Instituisaun F-FDTL no Media Timor Post bele realiza enseramentu ba formasaun no kapasitasaun ba rekursu umanu insitituisaun F-FDTL nia laran iha area multimedia.

“Kursu Jornalizmu ida ne’e hanesan edukasaun Naun-Formal hodi kompleta edukasaun formal, ita hetan ona iha ano eskoláridade integradu sira. Portantu durante tempu natoon de’it maibé espesifiku no profundu, tanba ne’e importante tebes atu eleva no kapasita-aan area pertinente sira iha instituisaun nia laran,” hateten nia.

Jacob Ximenes, sujere ba Formandu sira atu aplika materia multimedia sira ne’ebé aprende ona husi Formador sira iha formasaun, nune’e bele hato’o informasaun ne’ebé kredivel ba públiku liu husi Instituisaun F-FDTL nian.

Iha Sorin hanesan, Formanda Sentru Formasaun Jornalizmu Timor Post, Mariazihna dos Santos, agradese no orgullu ho Sentru Formasaun Timor Post no Instituisaun F-FDTL ne’ebé fó ona oportunidade hodi aprende kona-ba multimedia.

“Ami husi F-FDTL sente orgullu tebes no agradese ba Timor Post ne’ebé maka durante ne’e sempre nakloke no fó oportunidade mai ami hodi aprende di’ak liután kona-ba media nian liuliu iha area Multumedia mak hanesan Youtube, Video, Kamera, Fotografia no aplikasaun balun ne’ebé hodi edit video,” orgullu nia.

Tuir formadu ne’e katak, durante aprende kona-ba formasaun Multimedia liu husi teoria no prátika hodi tun direta ba terenu oinsá foti video no editing video.

“Espera saida mak ami aprende, ami sei aplika iha kada komponente no unidade sira ne’ebé eziste iha instituisaun FALINTIL-FDTL, ami sujere ba instituisaun F-FDTL se bele ba futuru aumenta tan durasaun tempu ho formasaun nian, nune’e ami bele kompleta liután saida mak ami aprende ona durante ne’e,” sujere Formanda ne’e.

Sekretáriu Estadu Komunikasaun Sosiál (SEKOMS), Expedito Dias Ximenes, fó agradese ba sentru Formasaun Jornalizmu Timor Post ne’ebé ajuda ona Governu hodi fasilita formasaun ba instituisaun F-FDTL ligadu ho servisu Media Officer nian.

“Ha’u reprezentante Nonu-Governu, ha’u hakarak agradese ba Instituisaun F-FDTL ne’ebé bele autoriza formandu-15, atu sai media Officer katak Jornalista Instituisaun nian, ne’e sira nia servisu mak prinsipál tenke domina téknolojia, no sira bele hatene oinsá mak halo komunikadu Imprensa”. Nia sublinha