Membru PNTL Atua LG Ho Kondisaun Moras Mental ! Kazu Submete Ona Ba MP
Imagem : Membru PNTL halo atuasaun ba LG iha Area Buanurak, Viqueque, 06/02/2025.
SAPNewsTL, Viqueque : Relasiona ho Membru Polísia Nasionál Timor-Leste (PNTL) Munisipiu Viqueque na’in haat (4) ne’ebé halo agresaun fiziku hasoru sidadaun inisial LG, Komandante PNTL Munisípiu Viqueque António Rego Fernandes deklara la baku LG maibe halo atuasaun tanba LG tenta atu sunu motor no karreta iha Komandu PNTL Viqueque.
“Orseik haleu oras 13 liu, ita nia sidadaun inisial LG ho motor Megapro marka S-8470, nia haleu aredores Komandu PNTL lori iskeiru ida ho intensaun atu sunu karreta no motor ne’ebé iha paragem edifísiu PNTL nian maibé membru PNTL hakilar no duni LG ho karreta patrolla to’o asegura iha area Buanurak”.Tenik Komandante PNTL Munisípiu Viqueque António Rego Fernandes ba SAPNews iha Viqueque, 07/02/2025
Imagem : Komandante PNTL Munisípiu Viqueque António Rego Fernandes.
Hafoin duni tuir LG ne’ebé halai ho motor, wainhira membru PNTL halo atuasaun, LG tenta halo asaun hasoru polísia iha fatin akontesimentu, nune’e membru polísia halo atuasaun no lori ba detensaun.
“Ha’u hatene kona ba aktu krime, ha’u la hatene kona-ba kondisaun moras mental, suspeitu momentu ne’ebá mai ho kondisaun diak no motor mai hodi hakilar katak ‘diak liu motor no karreta sira ne’e, ha’u sunu hotu’, LG la deklara katak nia moras mental, wainhira polísia kaer, suspeitu nafatin uza liman hodi hasoru polísia, entaun polísia uza ninia forsa ne’e, halo atuasaun hodi asegura nia no lori ba detensaun”.
Kona-ba polísia kaer rambo-rambo hodi baku inisial LG, Komandante PNTL Viqueque ne’e hatan katak “Rambo-rambo ne’e iha karreta leten, depois ne’e hanesan plátiku ida, baku lisuk dala-ida deit, oras ne’e nia kondisaun diak hela, laiha kanek, ohin dia 7 dader, ita submete ona ba Ministériu Públiku hodi kontinua ba prosesu tuir mai”.Nia informa
Iha sosin seluk, SAPNews hala’o entrevista ho vítima nia maun Afonso Menezes Gomes haktuir vítima inisial LG moris ho kondisaun moras mental, nia servisu nu’udar tékniku agrikultura Munisipiu Viqueque iha Postu Administrativa Viqueque Villa.
“Ha’u nia alin ninia naran isinial LG, nia tékniku agrikultura Munisipiu Viqueque, nia kondisaun moras mental, maibe desde uluk nia hadomi no respeitu ema hotu”. Afonso Menezes Gomes informa ba SAPNews liu hosi via telefónika, Viqueque, 07/02/2025
Família LG ne’e dehan, wainhira ema ida halo sala ka krime ruma lolos lori ba tribunal hodi kondena krime ne’ebe nia komete maibe la’os baku hanesan ne’e.
“Nia oras ne’e sei iha sela PNTL Viqueque, ami família triste tanba baku nia iha estrada ninin, karik nia sala ona bele lori ba tribunal hodi kondena nia, ami hein katak justiça sei iha ba ami nia alin”. Nia sublinha
Fo hanoin fali katak kazu ne’e akontese iha dalan ninin, área Buanura, postu administrativu Viqueque Villa, munisipiu Viqueque, loron Kinta-Feira, 06 Fulan Fevereiru tinan 2025. Agresaun ne’e mosu tanba kauza hosi LG tenta atu sunu karreta no motor ne’ebé para iha edifísiu komandu PNTL Munisipiu Viqueque.
Nune’e, SAPNews sei kontinua tenta halo komfirmasaun ba parte revevante sira liliu Komandu Jeral PNTL no Provedoria Direitos Humanos e Justiça (PDHJ) kona ba agresaun fíziku ne’ebé membru PNTL balun halo hasoru ema sivil sira iha espasu públiku.
Jornalista : Sérgio Delekuar
