Meta PEDN Seidauk Atinji ! Governu Tenki Prioritiza Setor Agrikultura & Turizmu

SAPNewsTL, Díli – Estudante Universidade Nasional  Timor Lorasae (UNTL sigla Portugués) Faculdade Economia no Jestaun, Marcelino Quintão, parabeniza Povu Timor-Leste ne’ebe selebra eventu istóriku 20 de Maio hodi refleta sakrifisiu heroi sira nian durante tinan 24.

Senadu Estudantil Fakuldade Ekonomia no Gestaun Marcelino Quintão informa, hanesan  akedemiku  senti  orgullu bainhira partisipa iha eventu importante ida ne’e, sai hanesan reflesaun ba asu wa’in bui bere no maubere sira ne’ebe
luta durante tinan 24 hasoru inimigu hodi
liberta Timor-Leste nia Independensia.

“Hanesan joven ida senti orgullu ba Timor ukun aan, maibe atu buat hotu la’o ho diak liu ba futuru, joven sira tenki aproveita oportunidade sira  hanesan ne’e hodi estuda, aprende prepara ita nia aan ba futuru atu diak liu tan,” Dehan, Senadu Estudantil FEG Marcelino Quintão ba Jornalista média SAPNews Timor-Leste, hafoin partisipa serimónia 20 de Maio iha Palásiu Prezidensial, Aitarak laran, Segunda (20/05/2024)

Nia afirma, ohin loron Governu investe maka’as ba dezenvolvevimento setór importante sira hahu diak, espera liu husi planu estratéjiku Dezenvolvimentu nasionál 2011-2030 povu Timor-Leste bele moris ho ekonomia altu bem estar hahu husi baze mai to’o Governu sentral.

“Ita mos haree ba dezenvolvevimentu iha ita nia rain  diak uitoan ona tanba daudaun ne’e ita haree ba planu estrategiku 2011 ate 2030, Ita haree katak povu hotu tenke moris ho ekonomia altu maibe ita seidauk atingi ita nia metas ho planu estrategiku” Nia salienta.

Estudante akademiku ne’e hato’o nia rekomendasaun ba IX Governu atu bele tau atensaun masimu hodi investe ba iha setor importante no produtivu sira hanesan, Ekonómia, Edukasaun, Turismo setor sira seluk ne’ebe sai baze fundamentu ba moris diak povu no nasaun Timór-Leste

“Ha’u rekomenda ba Governo dasia tenki tau importansia investe makas ba iha setor produtivu sira hanesan, Agrikultura, setor Turismu setor rua ne’e importante atu bele dezenvolve ekonomia rai laran tanba setor rua ne’e sai alternativu ba iha dezenvolvevimento nasionál”.

Enkuantu, Veteranu Manuel Martins hato’o mos parabéns ba povu Timór-Leste iha nasionál no internasionál ne’ebe komemora restaurasaun independénsia hodi reflete sakrifisiu heroi no heroina sira nian durante luta hasoru invazor Indonesia.

“Ohin loron ita hotu kontenti bele selebra tan loron istóriku ida ne’ebe antes ne’e ema barak terus iha ailaran hodi sosa ukun rasik aan ida ne’ebe determinadu liu husi referendum no konsege hakilar ba mundu internasionál katak Timor tenki ukun an, ikus mai iha loron 20 fulan Maiu tinan 2002 Timor-Leste restaura nia independénsia hodi livre husi inimigu no torturasaun sira”.

Nia hatutan, independénsia ida ne’e kontribuisaun maka’as husi povu maubere no bui bere sira ne’ebe brani se hirus matan ba kilat musan hodi sosa ukun rasik aan, tamba ne’e Governu tenki identifika funu nain sira ne’ebe to’o ohin loron sei moris iha terus nia laran.

“Ukun aan ida ne’e laos mai hanesan prezenti maibé ema barak mate mak hetan ukun an, Governu tenki ukun ho didiak hodi hare funu nain sira ne’ebe sei terus, Agora bo’ot hotu ona hamutuk ho povu  maubere sira mak ohin loron Timor ukun an, tenki tau matan ba sira terus no susar ida ne’e, iha balun hetan kontenti uitoan no balun sei terus, ita hanesan povu hamutuk hodi serbi ba ita nia rai”.

Veteranu ne’e mos husu ba governante sira hodi kontinua ukun ho justisa, paz no estanilidade ba ema hotu hodi dezenvolve nasaun no kore povu husi kiak no mukit.

Jornalista : Ermelinda Soares