Mina Bayu-Undan Seida’uk Maran, Explorasaun Sei Kontinua To’o Laiha Valor Ekonómiku
Presidente Autoridade Nasionál do Petróleu (ANP, I P) Gualdino do Carmo da Silva iha UNTL Hera, 24/07/2024. Foto : Dircia Baptista Belo
SAPNewsTL, Dili – Presidente Autoridade Nasionál Petróleu Timor-Leste, Institutu Públiku (ANP-TL) Gualdino do Carmo da Silva informa explorasaun mina iha kampu Bayu-Undan sei kontinua la’o tanba mina seidauk maran.
Lideransa Autoridade Nasionál Petróleu Timor-Leste, Institutu Públiku (ANP-TL) Gualdino do Carmo da Silva informa lia hirak ne’e wainhira partisipa iha konferénsia ne’ebe hala’o entre Departamentu Indústria, Siénsia no Rekursu (DISR Sigla Ingles) no ANP, I.P iha auditóriu UNTL Hera.
Presidente ANP, I.P Gualdino do Carmo hateten explorasaun mina iha kampu Bayu-Undan sei kontinua la’o tanba mina seidauk maran maske tun daudauk ona.
“Bayun-Undan sei produz nafatin, mesmu ke la barak hanesan uluk, ANP servisu nafatin ho kompanha atu nafatin extrai ekonomikamente rekursu petrolíferu ne’ebe iha rezervatóriu to’o laiha ona valor ekonómiku”. Hateten Presidente Autoridade Nasionál Petróleu Timor-Leste, Institutu Públiku (ANP-TL) Gualdino do Carmo da Silva iha UNTL Hera, 24/07/2024.
Gualdino do Carmo dehan, antes ne’e kompanha explorador fura posu sanulu resin, maibe ohin loron hela deit posu 3-5 lima tanba mina maran ona.
“Bayu-Undan kuandu ita sei halo osan, ita sei kontinua, estadu mos hetan no kompanha mos hetan tanba agora sei iha posu tolu to’o lima mak iha mina, uluk iha posu iha 8-10 liu, uluk sa’e, agora tun”. Nia sublinha
Enkuantu, antes ne’e kampu bayu-undan iha posu perfurasaun hamutuk sanulu resin hitu (17), wainhira hahú halo explorasaun, maibe hafoin tinan 18 iha faze perfurasaun hodi sustenta despeza públika estadu nian to’o loron, rekursu naun renovavél ne’e maran daudaun ona hela posu tolu-lima (3-5).
Fo hanoin fali katak, fundu petróliferu Timor-Leste nian ne’ebe iha Banku Sentral hela billiaun 18.45 tanba kauzu husi menuz perfurasaun no menuz reseitas inklui retornu.
Tuir previzaun ne’ebe antes ne’e Organizasaun La’o Hamutuk (LH) halo fo sai katak iha posibilidade fundu petrolíferu sei dura to’o deit iha tinan 2034, enkuantu governu la halo investimentu ba setor produtiva sira ha esan hodi substitui fundu minaria iha tinan hirak mai.
Jornalista : Marcela Mery da Costa & Dircia Baptista Belo